Zviito zve Aphostori 25:1-27
25 Hino, mumasure me mazuwa matatu me kuguma mu provhinsiya uye mekuti atanga kutonga, Festo wakakwidza ku Djerusarema ecibva ku Sezareya.
2 Uye atungamiriri e apristi no anarume anokosha e Adjudha, akamubvunza zviya zvaaipumha Pauro. Akatanga kurumbwa ecikumbira Festo
3 kuti iyena aabetsere nge kuaunzisira Pauro ku Djerusarema. Asi awona ainga akafindara kuitira kuti auraye Pauro mu gwanza.
4 Asi Festo wakadaira kuti Pauro waidikana kurumbwa akasungwa ku Sezareya uye iyena kamare ndiye waizohwirira nokukasika.
5 Iyena wakati: “Hino ngaateredze na inini atungamiriri enyu anganani uye amupumhe, kana iyena waitadi kamare ciro cakashata.”
6 Hino mumasure me kugara pakati pawo ke mazuwa asikadariki 8 kana 10, iyena wakateredza ku Sezareya, uye pa zuwa rakazoteera, iyena wakagara pa tribhunari uye wakaita kuti Pauro aunziswe.
7 Pauro paakapinda, Adjudha ainga ateredza ecibva ku Djerusarema akamutenderedza, ecimupumha ndaa dzakawanda dzakakura dzaainga asikakwanisi kupasa zvipangidzo kuti izvirokwazvo here.
8 Asi Pauro wakadzidziirira ecireketa kuti: “Andizi kushaishira Mutemo we Adjudha, kana tempro, kana Sezari.”
9 Ecida kuoniwa zvakanaka no Adjudha, Festo wakadaira Pauro kuti: “Iwewe uri kuda here kukwidza ku Djerusarema kuti utongwe ikona pamberi pangu panocokuita no zviro izvi?”
10 Asi Pauro wakati: “Ndiri pamberi pe tribhunari ya Sezari, pandinodikana kutongerhwa. Andizi kuitira cakashata Adjudha, hinga zvamuri kunyasa kuona.
11 Kana inini ndiri mushaishi kamare uye kana ndaita ciro cinosisira kuti ndiuraiwe, andirambi kufa; asi kana zvandiri kupumhwa no anarume aya azvirokwazvopi, apana ano citenderhwa ce kundikanda mu nyara dzawo kuti aapfadze. Ndiri kukumbira kuti nditongwe na Sezari!”
12 Hino mumasure me kureketa no cikwata ce anopanga mazano, Festo wakadaira kuti: “Sezvo wakumbira kutongwa na Sezari, ucatongwa na Sezari.”
13 Mumasure me mazuwa manganani, mambo Agripa na Bherenisi akaguma ku Sezareya kuti aitire Festo makorokoto.
14 Sezvo awona aizogara ipona ke mazuwa akati kuti, Festo wakapanganidzira mambo nyaya ya Pauro, eciti:
“Pano mwanarume umweni wakasiiwa na Feriji hinga musungwa;
15 pandainga ndiri ku Djerusarema, atungamiriri e apristi no akuru e Adjudha akandiunzisira masoko anocokuita nge zvake uye akandikumbira kuti iyena atongerhwe rufu.
16 Asi inini ndakaabvunza kuti azvitenderhwi no mutemo we Aroma kukanda munhu mu nyara dze aya ari kumupumha asati asongana nawo hope no hope kuti agare no mukana we kudzidziirira pa zviya zvaari kupumhwa.
17 Hino paakaguma kuno, ndakagara pa tribhunari nokukasika pa zuwa rakazoteera uye ndakaita kuti mwanarumewo adainzwe.
18 Aya aimupumha paakamuka kuti arekete, aazi kumupumha kunyazi ngezve ciro cimwe cakashata pa zvese zvandairangarira.
19 Caainga anaco basi ndi maonero akasiyana anocokuita no kunamata kawo uye ngezve mwanarume wakafa unozwi Djesu, asi Pauro wairumbwa ecireketa kuti iyena ari mupenyu.
20 Ndisikazvizii kuti ndaizotonga kudini nyaya ii, inini ndakamubvunzisa kuti iyena anoda here kuenda ku Djerusarema kootongerhwa ikona panocokuita no nyaya idzi.
21 Asi Pauro paakakumbira kuti arumbwe ari mu kadheya ecietsera cisananguro ca Agustu,* ndakakumbira kuti iyena arumbwe akasungwa dakara ndamutumira kuna Sezari.”
22 Hino Agripa wakati kuna Festo: “Inini ndiri kudawo kumuzwa mwanarume iyena.” Festo wakadaira kuti: “Mangwana mucamuzwa.”
23 Hino pa zuwa rakazoteera, Agripa na Bherenisi akaguma ecidzikudza uye akapinda mu nyumba inotongerhwa pamwepo no atungamiriri e masurudado uye anarume anoreremedzwa e mu thaundi. Uye Festo wakabhuya kuti Pauro aunziswe.
24 Festo wakati: “Mambo Agripa no mwese imwimwi muri pano, mwanarume uu wamuri kuona ndiye wakakumbirhwa kandiri no Adjudha ku Djerusarema kutobatanidzawo kuno, ecikhuwa kuti mwanarume uu aadikani kurumbwa ari mupenyu.
25 Asi inini kamare ndakaona kuti iyena aazi kuita ciro cipi haco cinosisira kuti auraiwe. Hino paakakumbira kuti atongwe na Agustu, inini ndakaita cisananguro ce kumuendeseyo.
26 Asi inini andina ciro cakananga ce kutarira Tenzi wangu panocokuita naye. Ndiyo ndaa, ndamuunzisa pamberi penyu mwese, maka-maka imwimwi Munoreremedzwa, mambo Agripa, kuitira kuti mumasure me kumuita mibvunzo, inini ndione zvekutara.
27 Ngokuti ndinoona kuti azvina musoro kutumira musungwa ndisikareketi zvikonzero zvaari kupumhwa.”
Masoko ari pasi
^ Iri i zina rekureremedza re mutungamiriri we Roma.
