Zviito zve Aphostori 26:1-32
26 Agripa wakati kuna Pauro: “Iwewe unotenderhwa kureketa kuti udzidziirire.” Hino Pauro wakatambanudza nyara yake uye wakatanga kureketa eciti:
2 “Mambo Agripa, panocokuita no zviro zvese zvandiri kupumhwa no Adjudha, ndiri kupfara ngokuti ndiri kuzvireketa ndecidzidziirira pamberi penyu pa zuwa ra nyamasi,
3 maka-maka ngokuti munonyasa kuziya tsika dzese uye kusama kupindirana kese kunooneka pakati pe Adjudha. Hino, ndiri kukumbira kuti mundipurutane no mwoyo unononoka kutsamwa.
4 “Panocokuita no upenyu wangu wese kubvira ndiciri mudoko, pakati pe anhu angu* uye ku Djerusarema, Adjudha ese
5 anondiziya kubvira kare, anonyasa kuziya kuti inini ndakararama hinga Mufarisi, maererano no cikwata cinonyanya kubatisisa mutemo ce manamatiro edu, kana akada awona angazvipupurira.
6 Asi inini ndiri kutongwa zvino nge ndaa ye kariro yandinayo yakagondeswa na Mwari ku madzitsekuru edu;
7 ii ndiyo kariro iri kuetserhwawo no madzinza edu 12 eciitira Mwari basa rakacena no simba rese usiku no masikati. Inini ndiri kupumhwa no Adjudha nge ndaa yo kariro ii, Mambo wangu.
8 “Ngei musikatenderi kuti Mwari anokwanisa kumutsa akafa?
9 Inini kamare ndairangarira kuti ndaidikana kuita zviri zvese kuti ndirhwise zina ra Djesu we ku Nazareta.
10 Ndizvo kamare zvandakaita ku Djerusarema. Ndakakanda acena akawanda mu kadheya, ngokuti inini ndainga ndatambira no atungamiriri e apristi simba rokuita izvona; uye paya paaidikana kuuraiwa, inini ndaitozvitsigira.
11 Mu masinagoga ese, kakawanda inini ndakaaphanica ndeciedza kuabambidzira kuti asiye kutenda kawo; ngokuti inini ndainga ndakaanyangadzwira maningi, ndakaguma pa kuateerera kunyazi ku mathaundi ari kure.
12 “No cinangwa ici, inini ndaiita rhwendo ndecienda ku Dhamasko no masimba akakura uye ubaba wandakapaswa no atungamiriri e apristi.
13 Uye mu gwanza Mambo wangu, padzaiita 12 dzo masikati ndakaona ciedza cakabva kudenga caidjeka kudarika zuwa, icona cakadjeka pandainga ndiri, kutobatanidzawo paya painga pano aya aiita rhwendo na inini.
14 Tese isusu takambwera pasi, hino ndakazwa izwi recibhuya mu Cihebheru kuti: ‘Sauro, Sauro, ngei uri kunditeerera? Paunorumbwa wecidzipondera pa cibaiso, iwewe ndiwe unokuwadzika.’
15 Uye inini ndakabvunzisa kuti: ‘Ndimwi ani Tenzi?’ Uye Tenzi akadaira kuti: ‘Ndini Djesu, uya wauri kuteerera.
16 Asi purumuka uime. Inini ndauya kauri kuti ndikusanangure hinga museenzi uye mupupuri we zviro zvawaona uye we zviro zvandicaita kuti uone zvinocokuita na inini.
17 Uye inini ndicakuponesa pa anhu e dzinza iri uye e madzinza amweni andiri kukutumira kaari
18 kuti ufungure madziso awo, kuti atendeuke kubva ku cidima kuenda ku ciedza, kubva ku masimba a Sathani kuenda kuna Mwari, kuti arekererhwe zvitema zvawo uye atambire nhaka pakati pe aya akaceneswa nge kutenda mandiri.’
19 “Hino Mambo Agripa, andizi kusiya kuzwira ciono cekudenga,
20 asi ndecitangira ku anhu e ku Dhamasko pedzepo e ku Djerusarema, no e ku mitanha yese ye Djudhiya, uye kutobatanidzawo e madzinza amweni, ndakaaendesera masoko okuti aidikana kucinyuka uye otendeukira kuna Mwari, eciita mabasa anopangidza kuti acinyuka pa zvitema zvawo.
21 Izvi ndizvo zvakaita kuti Adjudha andibate mu tempro uye aedze kundiuraya.
22 Asi ngokuti Mwari anosondibetsera, ndiri kurumbwa ndecipasa upupuri ku adoko no akuru dakara nyamasi uno uye apana candinobhuya kunza ke zviya zvakarekethwa no Aphorofita uye na Mozesi kuti zvaizoitika:
23 Kuti Kristu aizotambudzika uye hinga wekutanga kumutswa kubva ku akafa, aizoziisa ciedza ku anhu aya no e ku madzinza amweni.”
24 Pauro paainga ecireketa, Festo wakati no izwi guru: “Pauro, iwewe waakupenga! Ruziyo rakakura raunaro, riri kukupengesa!”
25 Asi Pauro wakadaira kuti: “Inini andiripi kupenga, Anoreremedzwa Festo, asi ndiri kureketa masoko e zvirokwazvo uye ano musoro.
26 Zvezvirokwazvo, mambo wandiri kureketa naye ndakasununguka kudai, anonyasa kuziya zviro zvese izvi; uye ndino rugondo kuti apana ciro cimwe haco caasikazii pa zvese izvi, ngokuti apana cakaizwa mucifise-fise.
27 Mambo Agripa, munotenda here zvakatarhwa no Aphorofita? Ndinoziya kuti munotenda.”
28 Asi Agripa wakati kuna Pauro: “Pa nguwa doko basi iwewe wainga waakuda kundiitisa kuti ndigare Mukristu.”
29 Hino Pauro wakadaira kuti: “Ndinokumbira Mwari kuti, kunyazi pa nguwa doko kana pa nguwa yakareba, haiwa basi imwimwi, asi kutobatanidzawo ese ari kundizwa nyamasi, kuti agare hinga inini, asi asina makorenti aya akandisunga.”
30 Hino mambo akapurumuka, kutobatanidzawo govhernadhori, Bherenisi uye anarume ainga akagara nawo.
31 Uye paaibuda, aicedzesana eciti: “Mwanarume uu apana caari kuita cakasisira kuuraiwa kana kugara mu kadheya.”
32 Hino Agripa wakabvunza Festo kuti: “Kudai mwanarume uu wainga asikazi kukumbira kutongwa na Sezari, angadai asudzunurhwa.”
Masoko ari pasi
^ Kana kuti: “dzinza rangu.”
