Zviito zve Aphostori 27:1-44
27 Ngokuti pakaizwa cisananguro cekuti taizoita rhwendo no navhiyo* tecienda ku Itariya, Pauro no asungwa amweni akakandwa mu nyara dze mukuru-mukuru we masurudado unozwi Juriyo, we cikwata ca Agustu.
2 Takakwira mu navhiyo yo Adramatiyo yainga yaakuda kuenda kumuceto ke provhinsiya yo Aziya ku mbuto inoima mabharko, uye takatanga rhwendo; Mumasedhoniya umweni we ku Tesaronika unozwi Aristarko wainga anesu.
3 Pa zuwa rakazoteera, takaguma ku Sidhoni, uye Juriyo wakabata zvakanaka Pauro, ecitendera kuti iyena avhakacire shamwari dzake uye kuti idzona dzimubetsere.
4 Patakabva ikona, takakwira bharko topinda nge dhuze no citsuwa ce Shipre kuti tidzidziirire, ngokuti taienda kaibva mhepo.
5 Hino takapinda no ku bahari ro ku Sirisiya no ku Panfiriya uye takaguma ku Mira yo Risiya.
6 Kweneyo, mukuru-mukuru we masurudado wakaona navhiyo yo ku Areshandriya yaienda ku Itariya, uye wakaita kuti tikwire imona.
7 Mumasure me kuhamba padoko no padoko ke mazuwa akawanda, takazoguma ku Kinidhu mumasure me kunetseka maningi. Ngokuti taienda kaibva mhepo, zvaishupha kuti tienderere mberi, takazopinda no ku citsuwa co Kreta kuti tidziirirhwe uye takadarika no ku Sarimoni.
8 Tecihamba no kumuceto ke bahari, takaguma ku mbuto inozwi Pekuzororera Pakanaka, mbuto ii yaigara dhuze no thaundi ro Razeya.
9 Kainga kadarika mazuwa akawanda uye zvino painga pano ngozi kuenderera mberi no rhwendo, ngokuti kunyazi zuwa ro mutsanyo* rainga radarika, hino Pauro wakaangwadza eciti:
10 “Anhumwi, ndiri kuona kuti rhwendo iri ricaita kuti tibatane no matambudziko akawanda uye tiruze zviro zvakawanda, haiwa basi navhiyo no zviro zviri muno, asi tingatoguma pa kuruza upenyu* wedu.”
11 Asi mukuru-mukuru we masurudado pane kuzwa zvaibhuiwa na Pauro, wakazwa zvaibhuiwa no mutekenyi we navhiyo uye no muridzi we navhiyo.
12 Ngokuti mbuto ii ye kuimisa mabharko yainga isikaiti kuti agareyo mu nguwa ye kutonhora, akawanda akaona kuti zvainga zviri nani kuti aenderere mberi no rhwendo kuti aone kuti aikwanisa here kuguma ku Fenisi, mbuto imweni ye kuimisa mabharko iri ku Kreta ku dii rinopinda no kakutsi dhuze no kumabvazuwa uye katemaidumba dhuze no kumabvazuwa; ikona kaiita kugara mu nguwa ye kutonhora.
13 Dutu raibva nge katemaidumba parakatanga kuvhuvhuta padoko no padoko, akarangarira kuti zvaainga ecida zvakwanisika; hino akamutsa ankora, uye akaenderera mberi no navhiyo, ecipinda no ku Kreta, dhuze no kumuceto ke bahari.
14 Asi mumasure me nguwa doko, kakauya dutu rino simba raibva ngo ku dii re citsuwa, dutu irona raiziikanwa kuti Eurakirau.*
15 Dutu iri rakaponda navhiyo no simba, zvekuti zvainga zvisikakwanisiki kurumbwa tecienda kaibva mhepo; ngokudaro, takaremba uye takasiya kuti dutu rititore.
16 Takaenderera tecidziirirhwa no citsuwa cidoko cinozwi Kaudha; kunyazi zvakadaro, tainga tisikakwanisi kuonerera cibharko* cainga cakasungirhwa sure ke navhiyo.
17 Mumasure me kukanda cibharkoco mu navhiyo, akatanga kusunga navhiyo nge pakati ecithyira kuti iyona yaizogorera ku Sirte;* akacitisa zvinoita kuti navhiyo ihambe uye iyona yakatorhwa nge dutu.
18 Ngokuti taindundwa no dutu rino simba, pa zuwa rakazoteera akatanga kukhandira mu bahari zviro zvainga zviri mu navhiyo.
19 Uye pa zuwa rocitatu, awona akatanga kukhandira mu bahari no nyara dzawo kamare zviro zvaiseenzeswa pa kuhambisa navhiyo.
20 Ke mazuwa akawanda, zuwa no nyeredzi azvizi kubuda uye dutu rino simba raitiponda. Hino kariro yedu ye kupona yakatanga kupera.
21 Mumasure me kupedza nguwa yakareba asikazi kurhya ciro, Pauro wakamuka pakati pawo uye wakati: “Anhumwi, imwimwi maidikana kuzwa zano rangu uye motama kubuda ku Kreta; kudai maita izvona, mungadai musikazi kubatana no dambudziko iri uye kuruza zviro zvese izvi.
22 Asi kunyazi zvakadaro, inini ndinomukohomedzesai kuti mugare no ushingi, ngokuti apana kana umwe wenyu acafa, asi navhiyo basi ndiyo icaruzika.
23 Pa usiku wadarika, pakauya pa dii rangu ngirozi ya Mwari wangu, Mwari wandinoitira basa cena;
24 iyona yakati: ‘Usathye hako Pauro. Iwewe unodikana kuenda pamberi pa Sezari; kusiya izvona, Mwari akanda upenyu we anhu ese anewe mu navhiyo mu nyara dzako.’
25 Hino anarumemwi, shingai, ngokuti ndinotenda muna Mwari kuti zvicaitika hinga mushobo wandabvunzwa kamare.
26 Asi tinodikana kukhandirhwa mu citsuwa.”
27 Wainga waa usiku we ci 14 uye tainga teciendeswa kuno no uko mu bahari re Adriya, pakati po usiku, ahambisi e navhiyo akatanga kurangarira kuti tainga taakuda kuguma dhuze no pasina mvura.
28 Akapima kudzika kakhona uye akaona kuti ainga ari mametro 36, pedzepo akaenderera mberi padoko uye akapimazve oona kuti ainga ari mametro 27.
29 Ngokuti aithya kudzipondera pa mapuwe, akakhandira maankora marongomuna nge sure ke navhiyo, ecirangarira kuti kudai kaiedza hako.
30 Asi ahambisi e navhiyo eciedza kupukunyuka mu navhiyomo, akacitisa kabharko mu bahari ecinyepedzera hinga ari kuda kakhandira maankora nge mberi,
31 Pauro wakati ku mukuru-mukuru we masurudado uye ku masurudado: “Kana anarume aya akatama kurumbwa ari mu navhiyo, mwese imwimwi amuponi.”
32 Hino masurudado akaceka mapote e kabharko kadoko uye akakasiya kecimbwera.
33 Pakainga kaakuda kuedza, Pauro wakabambisa anhu ese kuti arhye, eciti: “Nyamasi raazuwa re ci 14 mecietsera no cidaka-daka uye amusati marhya ciro.
34 Hino ndinomukohomedzesai kuti murhye; izvi zvicamubetserai, ngokuti apazopsveteki kunyazi tsitsi rimwe haro re musoro menyu.”
35 Mumasure me kureketa izvi, iyena wakatora pau woita munamato we kutenda Mwari pamberi pe anhu ese, wakaigura uye wakatanga kurhya.
36 Ngokudaro, ese akagara no ushingi uye akatangawo kurhya.
37 Tese tainga tiri mu navhiyo taikwana kuita 276.
38 Mumasure me kurhya oguta, akatora trigu okhandira mu bahari kuti areruse navhiyo.
39 Pakainga kaedza aazi kuziya nyika yaainga ari, asi akaona citsuwa cainga cino madjeca uye akasanangura kuti kudai zvaiita aizoimisawo navhiyo yawo ipona.
40 Akagura mapote ainga akabata maankora uye akazvirekeredza zvombwerera mu bahari, pa nguwa imweyo akarekeredza mapote ainga akasunga zviro zvinoita kuti navhiyo ihambe; pedzepo akamutsa zvinobata mhepo zvo mberi, akaenderera mberi ecienda kumuceto ke bahari.
41 Hino akadzipondera pa madjeca aitenderedzwa no bahari, uye navhiyo yakagorera; dii ro mberi rakabathwa ipona uye yainga isikacakwanisi kuhamba, asi dii ro sure rakatanga kuphwanyika nge ndaa ye kupondwa no mafungu e bahari.
42 Ngokudaro, masurudado akasanangura kuuraya asungwa, kuitira kuti asatize ecisambirira.
43 Asi mukuru-mukuru we masurudado wainga akasanangura kuponesa Pauro uye akaita kuti masurudado asaite zvaainga aronga. Iyena wakabhuya kuti ese aikwanisa kusambirira atange kudzvikira mu bahari kuti asambirire dakara ku citsuwa,
44 uye kuti amweni ateere sure, amweni akapakira pa matabwa uye amweni akapakira pa matimbu e navhiyo. Ngokudaro, ese akaguma ku citsuwa ari apenyu.
Masoko ari pasi
^ Kana kuti: “bharko rakakura.”
^ Zuwa iri rainga riri Zuwa re Kurekererhwa Zvitema, kaiizwa mu mwedzi wa Tisri, ii yainga iri nguwa yokunaya uye nguwa yokuti mabahari aiita mafungu akakura.
^ Kana kuti: “mwiya.”
^ Dutu raibuda kakutsi dhuze no kumabvazuwa.
^ Kabharko kadoko kanoseenzeswa kana pakaoneka tsaona.
^ Onai pakazwi Kupanganidzwa ke Masoko.
