Zviito zve Aphostori 28:1-31
28 Patakaguma tiri apenyu, takaziya kuti citsuwa ciya caizwi Marta.
2 Agari e citsuwa icona* akatipangidzira unaki wakakura maningi. Akabakidza muriro uye akatitambira zvakanaka, ngokuti kainga kecinaya uye kecitonhora.
3 Pauro wakaunganidza zvihuni, uye paakazvikanda pa muriro, pakabuda nyoka nge ndaa ye kupisa ke muriro uye nyokeyo yakapomberedza nyara yake.
4 Paakaona nyoka ino vheneno mu nyara make, agari e imona akatanga kubvunzana eciti: “Zvezvirokwazvo mwanarume uu ndi muurai; kunyazi hazvo akwanisa kupona mu bahari, Unatsi* auzi kutendera kuti iyena arumbwe ari mupenyu.”
5 Asi iyena akavhuruzira nyokeyo pa muriro uye apana cakaitika naye.
6 Asi awona aietsera kuti iyena waizozvimba kana kuti waizombwera wofa pa nguwa isikakarirhwi. Mumasure me kuetsera nguwa yakawanda uye oona kuti apana cakashata caitika naye, awona akacinja maonero uye akatanga kureketa kuti iyena wainga ari mwari.
7 Padhuzepo painga pano minda dze mutongi umweni we citsuwa icona, waizwi Pubriyo; iyena wakatitambira zvakanaka uye takagara naye pa nyumba pake ke mazuwa matatu.
8 Asi cakaitika nge cekuti, baba a Pubriyo ainga ari pa kama ecirhwara, ainga aferuka* uye aisorora ngazi.* Hino Pauro wakaenda kooaona, woita munamato, woatsanzikira nyara uye wakaaporesa.
9 Mumasure me kuitika izvi, anhu amweni airhwarawo e citsuwa icona, akatanga kumupsvaka uye aiporeswawo.
10 Kusiya izvona, awona akatireremedza nge kutipasa zvipo zvakawanda, uye pataida kuenda no navhiyo, awona akatipasa zvese zvataida.
11 Mumasure me mwedzi mitatu, takaenda no navhiyo uye kumberi kayo kainga kuno mufanikiso we “Ana a Zeu.” Uye navhiyo iyona yainga iri yo ku Areshandriya uye yakapedza nguwa ye kutonhora yese iri ku citsuwa.
12 Takaguma ku Sirakuza uye takagara ikona ke mazuwa matatu.
13 Patakazobva ikona, takaenderera mberi no rhwendo uye takaguma ku Rejiyo. Mumasure me zuwa rimwe, kakatanga kuita mhepo yaibva katemaidumba uye pa zuwa rakazoteera takaguma ku Puteori.
14 Ikona takagumira hama dzinganani, idzona dzakarumbwa dzecitikumbira kuti tigare nadzo ke mazuwa 7. Uye pedzepo takaenda ku Roma.
15 Hama dze ikona padzakazwa nge zvedu, dzakaenda ku Bazari re Apiyo uye ku Nyumba Nhatu* kuti dzisongane na isusu. Pauro paakadziona, wakatenda Mwari uye wakazwa kubambiswa.
16 Patakazoguma ku Roma, pakatenderhwa kuti Pauro agare ega, asi no musurudado kuti amurinde.
17 Mumasure me mazuwa matatu, iyena wakadainzisa anarume ainyanya kukosha e Adjudha. Paakaungana nawo, iyena wakaabvunza kuti: “Hama dzangu, kunyazi hazvo pasina cakashata candaitira anhu kana tsika dzo madzitsekuru edu, inini ndakasungwa ku Djerusarema uye ndakakandwa mu nyara dze Aroma.
18 Mumasure mekundiita mibvunzo, awona akada kundisudzunura, ngokuti painga pasina cikonzero caiita kuti anditongere rufu.
19 Asi Adjudha akaramba kuti ndisudzunurhwe, izvona zvakaita kuti ndikumbire kutongwa na Sezari, haiwa ngokuti pano ciro candakashaishira dzinza rangu.
20 Ndiyo ndaa ndakumbira kumuonai uye kumuziisai, ngokuti inini ndakasungwa no makorenti aya nge ndaa yo kariro ya Israeri.”
21 Awona akamubvunza kuti: “Isusu atizi kutambira tsamba dzakabva ku Djudhiya dzecireketa nge zvako, uye apana hama dzakabva ikona dzakatiziisa kana kutibvunza ciro cakashata nge zvako.
22 Asi taona kuti zvakanaka kuti timbozwewo newe zvauri kurangarira, ngokuti zvezvirokwazvo, catinoziya nge cekuti ku mbuto dzese kuri kubhuiwa zviro zvakashata ngezve cikwata ici.”
23 Ngokudaro, akapangana zuwa raaizosongana naye, uye akaenda ari cikwata cakakura ku mbuto yaainga ecigara. Uye kubvira comacibesi dakara cousiku, iyena wakaapanganidzira ngezve Umambo wa Mwari eciseenzesa upupuri wakakwana, ecipsvaka kuita kuti awona agutsikane panocokuita na Djesu, ecitsamira pa Mutemo wa Mozesi no Aphorofita.
24 Anganani akatendera zviro zvaaibhuya; asi amweni aazi kutendera.
25 Hino ngokuti ainga asikapindirani, akatanga kuenda, uye Pauro wakareketa kuti:
“Mwiya mucena wakanyasa kubvunza madzitsekuru enyu weciseenzesa muphorofita Isaya,
26 weciti: ‘Enda ku anhu aya uye bhuya kuti: “Zvezvirokwazvo imwimwi mucazwa, asi amuzozwisisi; uye zvezvirokwazvo imwimwi mucaringira, asi amuzooni.
27 Ngokuti mwoyo ye anhu aya yakaoma, awona akafunga nzee dzawo uye akafunga madziso awo, kuitira kuti asaone no madziso awo uye asazwe no nzee dzawo, kana kuzwisisa no mwoyo yawo, otendeuka, uye kuti inini ndiaporese.”’
28 Hino ziyai kuti ruponeso iri rakabva kuna Mwari rakatumirhwa ku madzinza amweni; uye awona zvezvirokwazvo acaripurutana.”
29— —
30 Hino iyena wakarumbwa ari ikona ke makore mairi pa nyumba yaainga arugari, uye waitambira zvakanaka ese aiuya koomuona,
31 eciaparidzira ngezve Umambo wa Mwari, uye ecifundisa ngezva Tenzi Djesu Kristu no ushingi wese,* pasina anomurambidza.
Masoko ari pasi
^ Kana kuti: “anhu ainga asikareketi Cigrego.”
^ Mu Cigrego anoti Dike, zvinorangarirhwa kuti iri i zina re mwarikadzi umweni waiphanica anhu kuti aite unatsi, kana kuti uu ndi unatsi waindorangarirhwa no anhu basi.
^ Kana kuti: “ano febri.”
^ Nhenda ii pa Ciputukezi inozwi Dhezenteriya.
^ Mbuto ii yainga iri mbuto inogumira arendo kana kuti Oteri.
^ Kana kuti: “rusudzunuko pakureketa.”
