Zviito zve Aphostori 3:1-26
3 Pedru na Juau ainga ecikwidza ecienda ku tempro pa nguwa ye munamato, kuma 15 ora,*
2 uye mwanarume umweni wakabarhwa akaremara wainga ecithwarhwa. Mazuwa ese iyena waikandwa pa musuwo we tempro unozwi Musuwo Wakarungama, kuti akumbire zviro* ku anhu aipinda mu tempro.
3 Paakaona Pedru na Juau ecipinda mu tempro, iyena wakatanga kuakumbira zviro.
4 Asi Pedru na Juau akanyasa kumuringira, uye Pedru wakati: “Tiringire.”
5 Hino iyena wakanyasa kuaringira, ecietsera kupaswa zviro nawo.
6 Asi Pedru wakati: “Andina prata kana oro, asi ndinokupasa zvandinazvo. Mu zina ra Djesu Kristu we ku Nazareta, hamba!”
7 Ngokudaro, iyena wakabata moko kwawo wake, womumutsa. Ciriporipoco tsoka dzake no mirenje dzake dzakabamba;
8 uye iyena wakamhuka woima, wakatanga kuhamba uye wopinda nawo mu tempro, ecihamba, ecimhuka-mhuka, ecikudza Mwari.
9 Uye ese akamuona ecihamba uye ecikudza Mwari.
10 Awona akaziya kuti wainga ari mwanarume uya waigara ecietsera kutambira zviro pa Musuwo Wakarungama we tempro, uye akashamisika maningi nge zviya zvainga zvaitika kaari.
11 Mwanarumewo paainga acakabata Pedru na Juau, anhu akashamisika maningi uye akagogoma ecienda kaari pa mbuto inozwi Berere ra Soromoni.
12 Pedru paakaona izvi, akati ku anhu: “Anhu e Israeri, ngei muri kushamisika kudaro, uye ngei muri kutiringira hinga kuti tamuporesa no simba redu kamare kana ngo kunamata kedu Mwari?
13 Mwari wa Abrahamu, wa Izaki, uye wa Djakobo, Mwari we madzitsekuru edu, akudza Museenzi wake, Djesu, uya wamakakanda mu nyara dza Pirato, uye momuramba, kunyazi hazvo Pirato wainga wasanangura kumusudzunura.
14 Zvezvirokwazvo, imwimwi makaramba munhu mucena uye munatsi, uye makakumbira kuti mupaswe munhu wainga ari bhinya,
15 uye makauraya Muimiriri Mukuru we upenyu. Asi Mwari akamumutsa kubva ku akafa, uye isusu tiri apupuri azvo.
16 Uye peciseenzeswa zina rake no kutenda kedu mu zina rake, ndizvo zvaita kuti mwanarume uu wamuri kuona uye wamunoziya apore. Kutenda kunouya peciseenzeswa Djesu, ndiko kaita kuti mwanarume uu aporeswe pamberi penyu kamare.
17 Uye zvino hama, ndinozviziya kuti makazviita ngo kutama kuziya, hinga zvakaitawo atungamiriri enyu.
18 Ngo kuita kudaro, Mwari akadzadzisa zvaainga akabhuya kare eciseenzesa miromo ye aphorofita ake ese kuti: Kristu wake waizotambudzika.
19 “Hino, cinyukai zvitema zvenyu, uye tendeukai kuti zvitema zvenyu zvirekererhwe, kuitira kuti nguwa ye kuzorodzwa iuye yecibva kuna Djehovha*
20 uye amutumirei Kristu, uya waakagadza, Djesu.
21 Denga rinodikana kumucengeta dakara nguwa icahwirinzwa zviro zvese, zviro zvese zvakarekethwa na Mwari eciseenzesa miromo ye aphorofita ake acena e kare.
22 Mozesi wakatobhuya kuti: ‘Djehovha* Mwari wenyu, acamumutsirai pakati pe hama dzenyu muphorofita wakaezana na inini. Purutanai zvese zvaacamubvunzai.
23 Zvezvirokwazvo, wese uya* anotama kupurutana Muphorofita uu, acatsakatiswa zvacose pakati pe anhu.’
24 Uye aphorofita ese akazvireketa, kubvira pana Samueri kuenderera mberi, akanyasa kuziisawo pamhene mazuwa aya.
25 Imwimwi muri ana e aphorofita uye e citenderano cakaita Mwari no madzitsekuru enyu, paakabvunza Abrahamu kuti: ‘Mhuri dzese dze pa nyika dzicakomborerhwa peciseenzeswa mwana* wako.’
26 Mumasure me kumutsa Museenzi wake, Mwari akatanga kumutumira kamuri kuti mukomborerhwe, eciita kuti umwe na umwe wenyu asiye mabasa ake akashata.”
Masoko ari pasi
^ Cigrego: “nguwa yocipfembamwe.”
^ Kana kuti: “zvipo zve usisi.” Onai pakazwi Kupanganidzwa ke Masoko.
^ Cigrego: “yacibva ku hope ya Djehovha.” Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Kana kuti: “mwiya wese.”
^ Cigrego: “mbeu.”
