Zviito zve Aphostori 4:1-37
4 Airi aya paainga ecireketa no anhu, apristi, mukuru-mukuru we tempro uye Asadhusi, akaakhwederera.
2 Awona ainga akanyangadzwa ngokuti aphostori ainga ecifundisa anhu uye ainga eciziisa pamhene ngezve kumutswa ka Djesu kubva ku akafa.
3 Hino akaabata* uye akaakanda mu kadheya dakara zuwa rakazoteera, ngokuti kainga kadoka.
4 Asi akawanda ainga apurutana mharidzo akatenda, uye numero yo anarume yakakwana kuita 5000.
5 Pa zuwa rakazoteera, anyautongi, akuru, uye atari akaungana mu Djerusarema,
6 pamwepo no Anasi, uwo wainga ari mutungamiriri we apristi, Kaifasi, Juau, Areshandre, no ese aya ainga ari anyaukama e mutungamiriri we apristi.
7 Akakanda Pedru na Juau pakati pawo uye akaabvunzisa kuti: “Ndiani akamupasai simba rokuita zviro izvi uye mazviita mu zina raani?”
8 Hino Pedru wakadzadzwa no mwiya mucena, woabvunza kuti:
“Atungamiriri e anhu uye akuru,
9 kana teciizwa mibvunzo nyamasi nge ndaa ye ciro cakanaka caizwa ku mwanarume wakaremara, uye kana mecida kuziya kuti ndiani waita kuti mwanarume uu apore,
10 ziyai mwese imwimwi no anhu ese e Israeri kuti mu zina ra Djesu Kristu we ku Nazareta, wamakauraya pa mutanda, asi wakamutswa na Mwari kubva ku akafa, iyena ndiye aita kuti mwanarume uu wakaima pamberi penyu apore.
11 Djesu uu ‘ndiro buwe rakarambwa na imwimwi awaki uye rakazogara buwe guru re pakhona.’
12 Uyezve, apana umweni angaponesa anhu, ngokuti apana zina rimweni pasi pe denga rakapaswa anhu ratinodikana kuponeswa naro.”
13 Paakaona ushingi wa Pedru na Juau, uye oona kuti awona ainga ari anarumewo hawo asikazi kufunda,* akashamisika. Uye akaziya kuti awona ainga akambohamba na Djesu.
14 Awona akakonerhwa cokureketa, ngokuti ainga eciona pakati pawo mwanarume wainga waporeswa.
15 Hino akaabvunza kuti abude mu Sinedriyo uye akasara ecicedza nge zvazvo,
16 aiti: “Ticaitei no anarume aya? Ngokuti, zvezvirokwazvo, peciseenzeswa awona paizwa cishamiso ici uye caziikanwa no agari ese e mu Djerusarema, uye atingazvirambiri.
17 Kuti izvi zvisarumbwe zvecibararika ku anhu, ngatiathyisidzire uye ngatiabvunze kuti asareketezve no munhu eciseenzesa zina iri.”
18 Hino awona akaadainza uye akaabvunza kuti asamborekete kana kufundisa mu zina ra Djesu.
19 Asi Pedru na Juau akaadaira kuti: “Kana mecirangarira kuti zvakanaka pamberi pa Mwari kuti tizwire imwimwi pane kuzwira Mwari, zviri kamuri.
20 Asi katiri, atingasii kureketa zviro zvatakaona no zvatakazwa.”
21 Ngokudaro, mumasure me kuathyisidzirazve, awona akaasiya, ngo kutama kuona cikonzero co kuaphanica uye ngokuti aithya anhu, ngokuti anhu ese ainga ecikudza Mwari nge ndaa ye zviya zvainga zvaitika.
22 Ngokuti mwanarume wainga waporeswa no cishamiso* ici wainga ano makore anodarika 40.
23 Mumasure me kusudzunurhwa, awona akaenda koosongana no afundi amweni uye akaabvunza zvaainga abvunzwa no atungamiriri e apristi uye akuru.
24 Paakazwa izvi, ese akaita pamwepo munamato kuna Mwari eciti:
“Cangamire Tenzi, ndimwi makasika denga, nyika, bahari, no zvese zviri mazviri,
25 uye ndimwi makaseenzesa mwiya mucena kuti muromo wa tsekuru edu Dhavhidhi, musenzi wenyu, abhuye kuti: ‘Ngei madzinza akashatirhwa uye ngei anhu akarangarira zviro zvisina basa?
26 Madzimambo e nyika akagadzirira uye atungamiriri akaungana kuti arhwise Djehovha* uye no mudzodziwa* wake.’
27 Zvezvirokwazvo, Herodhi na Ponsiyo Pirato akaungana mu thaundi rino no anhu e madzinza amweni uye no anhu e ku Israeri kuti arhwise museenzi wenyu mucena Djesu, uya wamakadzodza,
28 kuti aite zvainga zvakasanangurhwa no simba renyu uye no kuda kenyu kuti zviitike.
29 Hino Djehovha,* izwai kuthyisidzira kaari kuita, uye itai kuti aranda enyu arumbwe ecireketa ngezve soko renyu no ushingi,
30 pamunonga mecitambanudza moko wenyu kuti muporese uye pamunonga meciita zvipangidzo uye zvishamiso meciseenzesa zina ro museenzi wenyu mucena Djesu.”
31 Mumasure me kuita munamato we kudeketera,* mbuto yaainga akaungana yakatekenyeka, uye ese akadzadzwa no mwiya mucena uye akatanga kureketa soko ra Mwari no ushingi.
32 Uyezve anhu akatenda, ainga ano mwoyo umwe basi uye mwiya* umwe basi, uye apana kana umwe wawo waibhuya kuti zviro zvaainga anazvo nge zvake ega, asi aipasana zviro zvese zvaainga anazvo.
33 Uye aphostori airumbwa ecipasa upupuri no simba ngezve kumutswa ka Tenzi Djesu, uye Mwari aiakomborera maningi no nyasha dzake.
34 Zvezvirokwazvo, apana kana umwe wawo aishoterhwa no zvokurarama nazvo, ngokuti ese ainga ano minda kana nyumba aizvitengesa uye aiunzisa mareyo,
35 uye aiiendesa ku aphostori. Mumasure mazvo, awona aiikoanisa maererano no zvaidiwa no munhu umwe na umwe.
36 Ndizvo zvakaizwa na Zuzee, uya waidainzwa no aphostori kuti Bharnabhee (zina iri kana rikaturikirhwa rinoreya kuti, “Mwana we Runyaradzo”), iyena wainga ari Murevhi wakabarihwa ku Shipre;
37 iyena wainga uno munda, uye wakautengesa, woendesa mareyo ku aphostori.
Masoko ari pasi
^ Kana kuti: “akaasunga.”
^ Izvi azvirei kuti aphostori ainga asikazi kutofunda kamare, asi zvinoda kureya kuti aazi kufunda mu zvikora zve Anarabhi.
^ Kana kuti: “cipangidzo.”
^ Onai pakazwi Kupanganidzwa ke Masoko.
^ Kana kuti: “Kristu.”
^ Onai pakazwi Kupanganidzwa ke Masoko.
^ Kana kuti: “munamato no mwoyo wese.”
^ Onai pakazwi Kupanganidzwa ke Masoko.
