Zviito zve Aphostori 5:1-42
5 Mwanarume umweni waizwi Ananiya, no mukadzi wake Safira, akatengesa munda.
2 Asi mwanarumewo wakaiga mare imweni uye mukadzi wake waizviziya. Hino, wakatora mare yainga yasareyo woenda nayo kuno aphostori.
3 Asi Pedru wakati: “Ananiya, ngei Sathani waita kuti ushinge kuedza kunyepera mwiya mucena weciiga mare imweni yo munda wawatengesa?
4 Pawainga usati wautengesa, mundewo wainga usiripi wako here? Uye mumasure mekuutengesa wainga usina citenderhwa cokuita caunoda no mareyo here? Hino ngei waronga mu mwoyo mako kuita zviro zvakadaro? Iwewe auzi kunyepera anhu, asi wanyepera Mwari.”
5 Paakazwa masoko aya, Ananiya wakambwera pasi, wofa. Uye ese akazwa zvainga zvaitika akathya maningi.
6 Hino madjaha akamuka, omuputiridza no macira, obuda naye kunza oenda koomukotsa.
7 Mumasure me nguwa nhatu, mukadzi wake wakapindemo, asikazvizii zvainga zvaitika.
8 Pedru wakamubvunzisa kuti: “Ndibvunze: Imwimwi makatengesa munda no mare yakati?” Iyena wakadaira kuti: “Honde, takautengesa no mare iyona.”
9 Ngokudaro, Pedru wakamubvunza kuti: “Ngei imwimwi mapangana kuedza mwiya wa Djehovha?* Tsoka dzo aya akotsa mwamuna wako dzaa pa musuwo; awona acakutora oenda na iwewe kunza.”
10 Ciriporipoco iyena wakambwera pamberi pa Pedru, wofa. Madjaha paakapinda, akamugumira afa; hino akamutora oenda naye kunza uye akamukotsa pa dii raainga akotsa mwamuna wake.
11 Ngokudaro, ungano yese no ese aya akazwa zvainga zvaitika akathya maningi.
12 Kusiya izvona, peciseenzeswa aphostori pairumbwa peciitika zvipangidzo no zvishamiso zvakawanda pakati pe anhu; uye ese aiungana pa Berere ra Soromoni.
13 Izvirokwazvo kuti apana kana umwe we anhu amweni ainga ano ushingi we kubatana nawo; asi anhu aireketa zvakanaka nge zvawo.
14 Anarume no anakadzi akawanda aitenda muna Tenzi uye airumbwa ecitunhudzirhwa kaari.
15 Aitotora anorhwara oenda nawo kunza mu makwanza makuru uye aiaradzika pa zvimakama no pamaponde, kuitira kuti kana Pedru akapinda na ipona, bvute rake ripinde no pamusoro pawo.
16 Uyewo, aiuya anhu akawanda e mathaundi anotenderedza Djerusarema, eciuya no anhu airhwara, pamwepo no aya aitambudzwa no mwiya yakashata, uye ese awona aiporeswa.
17 Asi mupristi mukuru, no ese ainga ari pamwepo naye e cikwata ce Asadhusi, akamuka no shanje dzakakura.
18 Hino awona akabata* aphostori uye akaakanda mu kadheya.
19 Asi pakati pe usiku, ngirozi ya Djehovha* yakafungura misuwo ye kadheya, yakaabudisa kunza, uye yakaabvunza kuti:
20 “Endai mu tempro uye rumbwai mecireketa ku anhu ngezve masoko ese anocokuita no upenyu.”
21 Mumasure mekuzwa masoko aya, akapinda mu tempro pakainga keciedza uye akatanga kufundisa.
Mupristi mukuru no aya ainga ari naye paakaguma, akapika Sinedriyo no dare rese re akuru re ana e Israeri, uye akatuma anhu kuti aende kootora aphostori mu kadheya.
22 Asi arindi* paakaguma mu kadheya, aazi kuagumira. Hino paakahwirira akabhuya kuti:
23 “Tagumira kadheya yakanyasa kufungwa, uye arindi ainga akaima pa musuwo, asi patafungura atizi kuona munhu.”
24 Paakazwa izvi, mukuru-mukuru we tempro no atungamiriri e apristi akashamisika maningi, ecidzibvunzisa kuti zvinyi zvaizoitika.
25 Asi munhu umweni wakaguma woabvunza kuti: “Anarume amakanda mu kadheya ari mu tempro ecifundisa anhu.”
26 Hino mukuru-mukuru we tempro akaendeyo kooatora no arindi, asi asikaiti zvecisimba, ngokuti aithya kufurhwa no mapuwe no anhu.
27 Ngokudaro, awona akaatora oaendesa pamberi po Sinedriyo. Uye mutungamiriri we apristi akaabvunza
28 kuti: “Isusu takanyasa kumubvunzai kuti musafundise ngezve zina iri, asi onai basi, madzadza Djerusarema no fundiso dzenyu, uye muri kuda kuti ndaa yo ngazi yo mwanarume uu iuye katiri.”
29 Pedru no aphostori amweni akadaira eciti: “Pakutanga tinodikana kuzwira Mwari hinga mutungamiriri pane kuzwira anhu.
30 Mwari we madzitsekuru edu akamutsa Djesu kubva ku akafa, uya wamakauraya nge kumuturika pa mutanda.*
31 Mwari akamukwidziridza ku moko kwawo wake hinga Muimiriri Mukuru uye Muponesi, kuti aite kuti Israeri icinyuke uye irekererhwe zvitema zvayo.
32 Isusu tiri apupuri e zviro izvi, uye mwiya mucena wakapaswa na Mwari ku aya anomuzwira hinga mutungamiriri, unozvipupurirawo.”
33 Paakazwa izvi, awona akanyangadzwa* maningi uye akada kuauraya.
34 Asi mu Sinedriyo makamuka Mufarisi umweni unozwi Gamariyeri; iyena wainga ari mufundisi we Mutemo anoreremedzwa no anhu ese, uye iyena wakakumbira kuti aphostori ambobviswe kunza ke cinguwa.
35 Hino iyena akaabvunza kuti: “Anarume e Israeri, ngwarirai zvamucaita no anarume aya.
36 Ngo muezaniso, kakambooneka mwanarume umweni waizwi Teudha, iyena waidziti anokosha, uye anhu anganani anokwana kuita 400, akabatana naye. Asi iyena wakauraiwa, uye ese aimuteera akabararika uye mazano ake aazi kubudirira.
37 Mumasure make, mu mazuwa e kutaririswa, pakaoneka Djudhasi we ku Garireya, uye wakaita kuti anhu amuteere. Mwanarume iyena wakafawo, uye ese aimuteera akabarariswa.
38 Ndiyo ndaa, pa nyaya ii, ndinomubvunzai kuti: Musapindire pa nyaya dze anarume aya, asiyei akadaro. Ngokuti kana urongwa uu kana kuti basa iri riri re anhu, arizoendereri mberi;
39 asi kana zvecibva kuna Mwari, imwimwi amungakwanisi kuzviimisa. Kana mukadaro, pamweni munonga mecitorhwisana na Mwari kamare.”
40 Hino akatendera zano rake. Akadainzisa aphostori uye mumasure me kuaponda,* akaabvunza kuti aime kureketa mu zina ra Djesu, pedzepo akaasiya kuti aende.
41 Ngokudaro, awona akabuda mu Sinedriyo ecipfara ngokuti akaoniwa kuti ainga akasisira kutambudzwa nge ndaa ye zina ra Djesu.
42 Mazuwa ese, airumbwa ecifundisa mu tempro uye pa nyumba no nyumba uye eciziisa masoko akanaka ngezva Kristu Djesu.
Masoko ari pasi
^ Onai Apendi. A5.
^ Kana kuti: “akasunga.”
^ Onai Apendi. A5.
^ Kana kuti: “arindi e tempro.”
^ Kana kuti: “pa muti.”
^ Kana kuti: “akarhwadziwa.”
^ Kana kuti: “kuabvenga.”
