Zviito zve Aphostori 6:1-15
6 Mu mazuwa awona afundi paainga ecitunhudzirika, Adjudha aireketa Cigrego akatanga kugurunguta ngezve Adjudha aireketa Cihebheru, ngokuti afirhwakadzi awo ainga ecisiiwa sure pa kukowaniswa ke zvokurhya zve zuwa no zuwa.
2 Ngokudaro, aphostori 12 akaunganidza afundi ese uye akabhuya kuti: “Azvizi kunaka kuti tisiye soko ra Mwari kuti tiite basa re kukowanisa zvokurhya.
3 Hino hama, sanangurai pakati penyu anarume 7 anopupurirhwa zvakanaka,* akadzara no mwiya uye ungwaru, uye isusu ticaagadza kuti aite basa iri rinodikana kuizwa;
4 asi isusu ticakanda ndangariro dzedu pa kuita munamato uye pa basa re kufundisa masoko a Mwari.”
5 Zvaakabhuya zvakadakadza anhu ese, uye akasanangura Estevha, mwanarume wainga wakadzara no kutenda uye no mwiya mucena, uyewo Firipi, Prokoro, Nikanori, Timoni, Parmena, na Nikorau waigara ku Antiyokiya uye wakatendeuka kuti agare Mudjudha.
6 Awona akaatora oenda nawo ku aphostori, mumasure mekuti aphostori aita munamato, akaatsanzikira nyara.
7 Ngokudaro, soko ra Mwari rairumbwa recibararika, uye afundi aitunhudzirika maningi mu Djerusarema; uyezve apristi akawanda akagara atendi.
8 Estevha wainga wakadzara no nyasha dza Mwari uye simba, iyena waiita zvipangidzo zvakakura uye zvishamiso pakati pe anhu.
9 Asi anarume anganani e cikwata cinozwi Sinagoga yo Akasudzunuka, pamwepo no anganani e ku Sirene no Areshandriya, kutobatanidzawo no anganani e ku Sirisiya no e ku Aziya, akaenda kuna Estevha kuti areketedzane naye.
10 Asi awona akakonerhwa kumukunda nge ndaa yo ungwaru no mwiya mucena wainga uri paari paaireketa.
11 Hino awona akabhuya mucifise-fise no anarume anganani kuti abhuye kuti: “Isusu tamuzwa ecituka Mozesi na Mwari.”
12 Uye awona akapfuridzira anhu, akuru no atari; uye akamuunganira omubata zvecisimba oenda naye ku Sinedriyo.
13 Akaunzisa apupuri e manyepo uye awona akabhuya kuti: “Mwanarume uu ari kurumbwa ecireketa zvakashata ngezve mbuto ino yakacena uye ngezve Mutemo.
14 Ngo muezaniso, tamuzwa ecibhuya kuti Djesu uu we ku Nazareta acatsakatisa mbuto ino uye acacinja tsika dzatakapaswa na Mozesi.”
15 Uye anhu ese ainga akagara mu Sinedriyo paakanyasa kumuringira, akaona kuti hope yake yainga yakaita hinga hope yo ngirozi.
Masoko ari pasi
^ Kana kuti: “ano mbiri yakanaka.”
