Zviito zve Aphostori 7:1-60
7 Asi mupristi mukuru wakabvunzisa kuti: “Izvi izvirokwazvo here?”
2 Estevha wakadaira kuti: “Hama uye abereki, purutanai. Mwari we rukudzo akadzipangidza kuna tsekuru edu Abrahamu paainga aciri ku Mezopotamiya, asati aenda koogara ku Harani,
3 uye akamubvunza kuti: ‘Buda mu nyika yo anyaukama ako uye enda ku nyika yandicakupangidza.’
4 Hino iyena wakabuda mu nyika yo Akardheu uye wakaenda koogara ku Harani. Pedzepo, mumasure me kufa ka baba ake, Mwari akamubvunza kuti auye koogara mu nyika ino yamuri kugara zvino.
5 Asi, aazi kumupasa nhaka mu nyika iyona, kunyazi mbuto yokuti atsike; asi akamugondesa kuzomupasa nyika iyona kuti igare yake pamwepo no ana* ake aizomuteera, kunyazi hazvo wainga asati aano mwana.
6 Uyezve, Mwari akamubvunza kuti ana ake aizogara anhu e nyika yo kunza* mu nyika isiripi yawo, uye kuti anhu e nyika iyona aizoaita aranda uye aizoatambudza ke makore 400.
7 Mwari akati: ‘Uye inini ndicatonga nyika iya icaaseenzesa hinga aranda, uye mumasure mazvo, awona acabudemo uye acandiitira basa rakacena mu mbuto ino.’
8 “Akaapasawo citenderano ce ucekeri, Abrahamu wakagara baba a Izaki uye wakamuita ucekeri pa zuwa rocisere, uye Izaki wakagara baba a Djakobo, uye Djakobo wakagara baba e madzitsekuru 12.
9 Uye madzitsekuruwo akaitira shanje Zuzee uye akamutengesa ku Aedjipitu. Asi Mwari ainga anaye,
10 uye akamununura pa matambudziko ake ese, omuzwira nyasha uye omupasa ungwaru pamberi pa Faraoo, mambo we Edjipitu. Uye iyena wakamugadza kuti atonge nyika ye Edjipitu uye aonerere nyumba yake yese.
11 Pedzepo kakaoneka nzara mu Edjipitu mwese no ku Kanaa, kainga kutori no dambudziko rakakura kamare, uye madzitsekuru edu ainga asina zviro zvokurhya.
12 Asi Djakobo wakazwa kuti ku Edjipitu kainga kuno zvokurhya, uye wakatuma kekutanga madzitsekuru edu kuti aendeyo.
13 Paakaendeyo kecipiri, Zuzee wakapanganidzira hama dzake kuti iyena wainga ari ani, uye Faraoo wakaziya anyaukama a Zuzee.
14 Hino, Zuzee wakadainzisa baba ake Djakobo no anyaukama ake, ese awona aikwana kuita 75.
15 Hino Djakobo wakateredza ku Edjipitu, wozofira ikona, uye madzitsekuru edu akazofirawo ikona.
16 Awona akaatora oenda nawo ku Sikemu uye akaakanda mu Guwa rakatengwa na Abrahamu ku ana a Amori ku Sikemu, iyena wakaritenga no mare yo prata.
17 “Nguwa yokuti Mwari adzadzise cipikirhwa caakaitira Abrahamu payainga yecikhwedera, anhu aitunhudzirika ku Edjipitu.
18 Hino mu Edjipitu makagara na mambo umweni wainga asikazii ngezva Zuzee.
19 Iyena wakacengedza dzinza redu uye wakabata zvisikazi kunaka abereki edu eciabambidzira kuti asiye zviana zvawo kuti zvife.
20 Ii ndiyo nguwa yakabarhwa Mozesi, iyena wainga wakarungama maningi.* Iyena wakarerhwa pa nyumba ya baba ake ke mwedzi mitatu.
21 Asi paakasiiwa, mwana we mwanakadzi wa Faraoo wakamutora uye wakamurera hinga mwana wake kamare.
22 Ngokudaro, Mozesi wakafundiswa ungwaru wese we Aedjipitu. Zvezvirokwazvo, iyena wainga ano simba pa masoko ake no mabasa ake.
23 “Hino paainga ano makore 40, iyena wakasanangura kuenda koovhakacira* hama dzake, Aisraeri.
24 Paakaona Muedjipitu ecibata zvisikazi kunaka umwe we Aisraeri, iyena wakanunura uya wainga ecibathwa zvisikazi kunaka uye wakauraya Muedjipituwo.
25 Iyena wairangarira kuti hama dzake dzaizozwisisa kuti Mwari ainga eciaponesa eciseenzesa iyena, asi awona aazi kuzvibata.
26 Pa zuwa rakazoteera, iyena wakaenda kaari paainga ecipondana, uye wakaedza kuasiyanisa eciti: ‘Imwi nai, imwimwi muri hama no hama. Ngei muri kupondana?’
27 Asi uya wainga ecibata zvisikazi kunaka mudoni wake wakamundunda, uye wakati: ‘Ndiani wakugadza kuti ugare mutungamiriri uye mutongi wedu?
28 Uri kuda kundiuraya hinga zvawakaita no Muedjipitu zuro?’
29 Paakazwa izvi, Mozesi wakatiza uye wakaenda koogara ku nyika yo Midhiyani, kweneyo iyena wakawaka uye wakazobara ana airi.
30 “Mumasure me kudarika makore 40, ngirozi yakauya kaari ku renje* mu Dunhu re Sinai, iyona yainga iri pa gwenzi ro minzwa raibaka.
31 Mozesi paakaona izvi, wakashamisika. Asi paaikhwedera kuti anyase kuzviona, wakazwa izwi ra Djehovha* reciti:
32 ‘Inini ndiri Mwari we madzitsekuru ako, Mwari wa Abrahamu, wa Izaki uye wa Djakobo.’ Mozesi wakatanga kutetemera uye aazi kugarazve no ushingi we kuringira.
33 Djehovha* akamubvunza kuti: ‘Khumura masandarya, ngokuti pawakatsika i mbuto cena.
34 Zvezvirokwazvo ndaona kudzvinyirirhwa ke anhu angu ari mu Edjipitu, ndazwa kugomera kawo, uye ndacita kuti ndianunure. Zvino uya, ndicakutuma ku Edjipitu.’
35 Mozesi uya waakaramba eciti: ‘Ndiani wakugadza kuti ugare mutungamiriri uye mutongi wedu?’ ndiye wakatumwa na Mwari hinga mutungamiriri uye muponesi peciseenzeswa ngirozi yakamuuira pa gwenzi.
36 Mwanarume uu wakaatungamirira ecibuda nawo mu Edjipitu, eciita zvipangidzo no zvishamiso mu Edjipitu, mu Bahari Rokupsvuka no ku renje ke makore 40.
37 “Mozesi uu, ndiye wakabvunza ana e Israeri kuti: ‘Mwari acaita kuti pakati pe hama dzenyu pauye muphorofita wakaezana na inini.’
38 Iyena ndiye wainga ari pakati pe ungano ku renje; iyena wainga ano ngirozi payakareketa naye mu Dunhu ro Sinai uye wainga ari pakati pe madzitsekuru edu. Iyena wakatambira masoko akacena, ano upenyu, kuti atipase.
39 Madzitsekuru edu aazi kumuzwira uye akamuramba, uye mwoyo yawo yakahwirira ku Edjipitu,
40 eciti kuna Aroni: “Tiitire anamwari kuti atitungamirire. Ngokuti atizvizii zvaitika na Mozesi uu wakatibvisa mu nyika yo Edjipitu.’
41 Hino mu mazuwa awona, akagadzira cidhori co kan’ombe, oendesa cibairo ku cidhori icona uye akatanga kupfara no mabasa e nyara dzawo.
42 Hino Mwari akaafuratira, oasiya eciitira basa rakacena ku zuwa, mwedzi no nyeredzi, hinga zvakatarhwa mu bhuku ro aphorofita kuti: ‘Imwi nyumba yo Israeri, mipiro no zvibairo zvamakaita ku renje ke makore 40, makazviitira inini here?
43 Haiwa, imwimwi makawakira tenda Moroki uye nyeredzi ya mwari unozwi Refani, mifanikiso yamakaita kuti muinamate. Ndiyo ndaa, inini ndakamudzingirai ndomuendesai kure kunodarika Bhabhironi.’
44 “Madzitsekuru edu ainga ano tenda yo Upupuri ku renje, maererano no zvakabhuiwa no Uya akabhuya na Mozesi ecimubvunza kuti aigadzire maererano no zviya zvaakapangidzwa.
45 Uye madzitsekuru edu akaipaswa no abereki awo, uye akaiunzisa na Djoshuwa ku nyika ye madzinza amweni akadzingirhwa na Mwari pamberi pe madzitsekuru edu. Iyona yakarumbwa iri muno dakara mu mazuwa a Dhavhidhi.
46 Mwari akazwira nyasha Dhavhidhi uye iyena wakakumbira kuti agare no cikomborero ce kugadzirira nyumba Mwari wa Djakobo.
47 Asi Soromoni ndiye wakazomuwakira nyumba.
48 Kunyazi zvakadaro, Wekumusoro-soro aagari mu nyumba dzakaizwa no nyara dze anhu, hinga zvakabhuiwa no muphorofita kuti:
49 ‘Denga ndiro cigaro cangu ce umambo, uye nyika ndiyo citsiko ce tsoka dzangu. Mungandiwakira nyumba yakaita kudini? Anodaro Djehovha.* Mbuto yangu ye kuzororera yaizogara kupi?
50 Nyara yangu andiyopi yakagadzira zviro zvese izvi here?’
51 “Imwi anhu akaoma musoro uye ano mwoyo no nzee zvisikazi kuizwa ucekeri, munorumbwa meciphikisana no mwiya mucena; munoita hinga zvakaizwa no madzitsekuru enyu.
52 Ndiupi muphorofita asikazi kutambudzwa no madzitsekuru enyu? Imwimwi makatouraya aya akaziisa ngezve kuuya ke munatsi, uya wamakazotengesa no kuuraya,
53 imwimwi makatambira Mutemo peciseenzeswa ngirozi, asi amuzi kuucengeta.”
54 Paakazwa izvi, awona akanyangadzwa maningi uye akatanga kumurumanisira mazino.
55 Asi iyena, wakadzara no mwiya mucena uye wakanyasa kuringira kudenga uye wakaona rukudzo ra Mwari uye Djesu akaima ku moko kwawo wa Mwari,
56 uye wakati: “Ndiri kuona denga rakafunguka uye Mwana we munhu wakaima ku moko kwawo wa Mwari.”
57 Hino, awona akakhuwa no izwi guru ofunga nzee dzawo, uye ese akaenda kaari.
58 Mumasure me kumudzingira mu thaundi, akatanga kumufura no mapuwe. Apupuri akasiya macira awo padhuze pe tsoka dzo mudjaha umweni unozwi Sauro.
59 Paainga ecimufura no mapuwe, Estevha wakakumbira eciti: “Tenzi Djesu, tambirai upenyu wangu.”
60 Hino, iyena wakagodama uye wakati no izwi guru: “Djehovha* musaaphanice ngo citema ici.” Uye paakareketa izvi, iyena wakafa.
Masoko ari pasi
^ Cigrego: “mbeu.”
^ Cigrego: “mbeu yake yaizogara ye nyika ye kunza.”
^ Kana kuti: “wakarungama maningi pamberi pa Mwari.”
^ Kana kuti: “koona.”
^ Onai pakazwi Kupanganidzwa ke Masoko.
^ Onai Apendi. A5.
^ Onai Apendi. A5.
^ Onai Apendi. A5.
^ Onai Apendi. A5.
