Zviito zve Aphostori 8:1-40
8 Sauro wainga ecitendera kuuraiwa ka Estevha.
Pa zuwa irona, ungano ye mu Djerusarema yakatanga kuteererhwa; anhu ese akabarariswa mu Djudhiya yese no mu Samariya, kusiya aphostori basi.
2 Anarume amweni aithya Mwari akatora Estevha oenda koomukotsa, uye akamucema maningi.
3 Asi Sauro wakatanga kutambudza ungano. Iyena waipinda mu nyumba imwe na imwe ecikwekweredzera kunza anarume no anakadzi uye eciaendesa mu kadheya.
4 Asi aya ainga akabarariswa, aienda ku mbuto dzaaitizira eciziisa masoko akanaka.
5 Firipi wakateredza ku thaundi* re Samariya uye wakatanga kuaparidzira ngezva Kristu.
6 Anhu ese aiteya nzee zvaibhuiwa na Firipi, awona aimupurutana uye aiona zvipangidzo zvaaiita.
7 Ngokuti akawanda ainga ano mwiya yakashata uye iyona yaikhuwa uye yaibuda. Uyezve, akawanda ainga akaoma mwiri uye ainga akaremara aiporeswa.
8 Ndiyo ndaa mu thaundi irona makadzara no mupfaro.
9 Uye mu thaundimo mainga muno mwanarume waizwi Simoni, kareko iyena waiita zvo masarapita uye wainga aita kuti Asamariya ashamisike, iyena waidziti mukuru.
10 Anhu ese, kubvira ku mudoko dakara ku mukuru, ainyasa kumupurutana uye aibhuya kuti: “Mwanarume uu ndiye Simba Guru ra Mwari.”
11 Awona ainyasa kumupurutana ngokuti ke nguwa yakareba iyena aiashamisa no masarapita ake.
12 Asi Firipi paakaaparidzira ngezve masoko akanaka e Umambo wa Mwari uye ngezve zina ra Djesu Kristu, awona akatendera, uye anarume no anakadzi akabhabhatidzwa.
13 Simoni wakagarawo mutendi uye mumasure me kubhabhatidzwa wakarumbwa na Firipi; uye iyena waishamisika ngo kuona zvipangidzo no mabasa akakura e simba.
14 Aphostori ainga ari ku Djerusarema paakazwa kuti Samariya yainga yatenda soko ra Mwari, akatuma Pedru na Juau kuti aendeyo;
15 awona akateredzeyo uye akanamata kuti Asamariya atambire mwiya mucena.
16 Ngokuti mwiya mucena wainga usati wauya kaari, asi ainga andobhabhatidzwa basi mu zina ra Tenzi Djesu.
17 Hino akaatsanzikira nyara, uye awona akatanga kutambira mwiya mucena.
18 Simoni paakaona kuti mwiya mucena waipaswa nge kutsanzikira nyara kaiita aphostori, akaapasa mare,
19 eciti: “Ndipeiwo simba irona, kuitira kuti wese uya wandinotsanzikira nyara atambire mwiya mucena.”
20 Asi Pedru wakamubvunza kuti: “Mare yako ngaitsakatike pamwepo na iwewe, ngokuti iwewe warangarira kuti waizopaswa cipo ca Mwari peciseenzeswa mare.
21 Iwewe aungabatanidzwi pa basa iri, ngokuti mwoyo wako auna unatsi pamberi pa Mwari.
22 Asi cinyuka pa maitiro ako akashata uye deketera kuna Djehovha,* kuti kana zveciita, marangariro akashata e mwoyo wako arekererhwe;
23 ngokuti ndiri kuona kuti iwewe uri vheneno inowawa uye uri muranda we zviro zvisina unatsi.”
24 Simoni wakaadaira kuti: “Ndiitireiwo munamato we kudeketera kuna Djehovha,* kuitira kuti zvese zvamabhuya zvisandiitikire.”
25 Hino, mumasure me kupasa upupuri wakakwana uye kureketa ngezve soko ra Djehovha,* akahwirira ku Djerusarema, eciziisa masoko akanaka ku nharaunda dzakawanda dze Asamariya.
26 Asi ngirozi ya Djehovha* yakabvunza Firipi kuti: “Gadzirira uye enda katemaidumba ku gwanza rinobva ku Djerusarema recienda ku Gaza.” (Iri i gwanza re ku renje.)
27 Ngokudaro, iyena wakagadzirira uye wakaenda, wakaona mukuru-mukuru umweni we Etiyopiya, museenzi we pa nyumba ya Kandasi, mambokadzi we Etiyopiya; mukuru-mukuru uu waionerera pfuma yese ya Kandasi. Iyena wainga aenda ku Djerusarema koonamata Mwari,
28 paainga ecihwirira uye paainga akagara mu ngoro, waierenga no izwi rinozwika mupumburu we muphorofita Isaya.
29 Ngokudaro, mwiya wakabvunza Firipi kuti: “Enda, khwederera ngoro iyo.”
30 Firipi wakagogoma ku muceto ke ngoro uye wakazwa mukuru-mukuru ecierenga no izwi rinozwika mupumburu we muphorofita Isaya, hino wakamubvunzisa kuti: “Kodi imwimwi muri kuzwisisa zvamuri kuerenga here?”
31 Iyena wakadaira kuti: “Ndingazwisisa kudini pasina munhu anondipanganidzira?” Hino wakakumbira Firipi kuti akwire uye agare naye.
32 Ndima yo Matarhwa yaaierenga inoti: “Hinga bira, iyena akaenda kouraiwa, uye kuita hinga bira rinogara rakanyarara pamberi pe uya unonga uri kupungura ukuse waro, iyena aazi kufungura muromo.
33 Paainga ecipsverudzwa, aazi kumupangidzira unatsi. Ndiani acapanganidza ngezve mubarirhwana wake?* Ngokuti upenyu wake wabviswa pa nyika.”
34 Hino mukuru-mukuruwo wakati kuna Firipi: “Ndapota, ndibvunze, muphorofita uu ari kureketa nge zvaani? Nge zvake kamare kana kuti ngezve mwanarume umweni?”
35 Firipi wakatanga kureketa, uye ecitangira pa ndima iya yo Matarhwa, wakamuziisa ngezve masoko akanaka anocokuita na Djesu.
36 Paaihamba no gwanzero, akaguma painga pano mvura, uye mukuru-mukuruwo wakati: “Ona! Pano pano mvura; cinyi cingandipingaidza kubhabhatidzwa?”
37 * ——
38 Ngokudaro, akaimisa ngoro, uye Firipi pamwepo no mukuru-mukuruwo akacita oenda mu mvura, uye iyena wakamubhabhatidza.
39 Mumasure me kubuda mu mvura, ciriporipoco mwiya wa Djehovha* wakatora Firipi, uye mukuru-mukuruwo aazi kumuonazve, asi wakaenderera mberi no rhwendo rake ecipfara maningi.
40 Firipi wakazoendeswa ku Asdhodhi, uye paainga ecipinda no nyika iyona wakarumbwa eciziisa masoko akanaka mu mathaundi ese dakara aguma ku Sezareya.
Masoko ari pasi
^ Mabhaibheri amweni anoti: “thaundi rimweni.”
^ Onai Apendi. A5.
^ Onai Apendi. A5.
^ Onai Apendi. A5.
^ Onai Apendi. A5.
^ Kana kuti: “ngezve kaakabva.”
^ Onai Apendi. A3.
^ Onai Apendi. A5.
