Zviito zve Aphostori 9:1-43
9 Asi Sauro paainga acino shungu dzo kuthyisidzira no kuuraya afundi a Tenzi, wakaenda ku mupristi mukuru
2 uye wakakumbira tsamba dzo kuenda nadzo ku masinagoga e ku Dhamasko, kuti auye ku Djerusarema akasunga ese aya ari mu Gwanza re Cokwadi, anarume kutobatanidzawo no anakadzi.
3 Paainga aadhuze no Dhamasko, ciriporipoco paainga ari pakadjeka nge ndaa yo ciedza caibva kudenga,
4 uye iyena wakambwera pasi, wozwa izwi raimubvunza kuti: “Sauro, Sauro, ngei iwewe uri kunditeerera?”
5 Iyena wakabvunzisa kuti: “Ndimwi ani Tenzi?” Iyena akadaira kuti: “Ndini Djesu, uya wauri kuteerera.
6 Asi purumuka, pinda mu thaundi, uye imona ucabvunzwa zvaunodikana kuita.”
7 Uye anarume aiita rhwendo naye akaima okonerhwa zvokureketa, zvezvirokwazvo akazwa izwi, asi aazi kumuona munhu waireketewo.
8 Sauro wakamuka, asi kunyazi hazvo madziso ake ainga akafunguka, iyena wainga asikakwanisi kuona. Hino akamubata nyara opinda naye mu Dhamasko.
9 Iyena wakapedza mazuwa matatu asikaoni, uye aazi kurhya ciro kana kumwa.
10 Ku Dhamasko, kainga kuno mufundi umweni waizwi Ananiya, uye Tenzi akamubvunza mu ciono kuti: “Ananiya!” Iyena wakadaira kuti: “Ndiri pano Tenzi.”
11 Tenzi akamubvunza kuti: “Gadzirira, uye enda ku gwanza rinozwi re Unatsi; pa nyumba ya Djudhasi, psvaka mwanarume unozwi Sauro, we ku Tarso. Ngokuti pa nguwa ino, iyena uri kuita munamato,
12 uye mu ciono, waona mwanarume umweni unozwi Ananiya ecipinda uye ecimutsanzikira nyara, kuitira kuti aonezve.”
13 Asi Ananiya wakadaira kuti: “Tenzi, inini ndakazwa akawanda ecireketa ngezve mwanarume uu, uye ngezve kutambudza kese kaakaita acena enyu ku Djerusarema.
14 Uye kuno, iyena uno simba raakapaswa no atungamiriri e apristi kuti asunge* ese aya anodainzira zina renyu.”
15 Asi Tenzi akamubvunza kuti: “Enda, ngokuti kandiri mwanarume uu ndi mudziyo wakasanangurhwa kuti aziise zina rangu ku madzinza amweni, ku madzimambo uye ku ana e Israeri.
16 Ngokuti inini ndicanyasa kumupangidza matambudziko ese aacabatana nawo nge ndaa yo zina rangu.”
17 Ngokudaro, Ananiya wakaenda, wakapinda mumbemo, wotsanzikira nyara yake paari, uye wakati: “Hama yangu Sauro, Tenzi Djesu, uya akadzipangidza kauri mu gwanza pawainga weciuya, andituma kuti uonezve uye kuti udzadzwe no mwiya mucena.”
18 Ciriporipoco, mu madziso ake makambwera zviro zvakaita hinga mapande e howe, uye iyena wakatangazve kuona. Hino, iyena wakamuka, wakabhabhatidzwa,
19 wakarhya uye wakagarazve no simba.
Iyena wakagara ku Dhamasko ke mazuwa manganani no afundi,
20 uye iyena wakatotanga kuparidzira ngezva Djesu mu masinagoga, eciti Djesu ndiye Mwana wa Mwari.
21 Asi ese aya aimuzwa akashamiswa uye aiti: “Andiyepi here mwanarume uu waitambudza ese aya aidainza zina iri ku Djerusarema? Iyena aazi kuuya kuno no cinangwa co kuasunga no kuatora* uye woenda nawo ku atungamiriri e apristi?”
22 Asi Sauro wairumbwa ecibamba uye ecishamisa Adjudha aigara mu Dhamasko paainyasa kupanganidza ngo mushobo unogutsa kuti Djesu ndiye Kristu.
23 Hino, mumasure me kudarika mazuwa akawanda, Adjudha akaronga kumuuraya.
24 Asi Sauro wakaziya kuti awona aida kumuuraya. Uye awona aigara akanyasa kurinda musuwo usiku no masikati kuti amuuraye.
25 Afundi ake akamutora cousiku uye akamucitisa ari mu thengu pa mbuto yakafunguka yo muru.
26 Paakaguma ku Djerusarema, iyena wakaedza kubatana no afundi, asi ese aimuthya, ngokuti ainga asikatenderi kuti iyena wainga ari mufundi.
27 Hino Bharnabhee wakaenda koomubetsera uye wakamutora woenda naye ku aphostori; iyena wakanyasa kuapanganidzira kuti Sauro wakaona kudini Tenzi mu gwanza, mushobo wakareketa Tenzi naye, uye mushobo wakareketa Sauro no ushingi mu zina ra Djesu ku Dhamasko.
28 Hino Sauro wakarumbwa anawo, ecihamba akasudzunuka* mu Djerusarema, uye ecireketa no ushingi mu zina ra Tenzi.
29 Iyena waireketa uye waiitirana hasha no Adjudha aireketa Cigrego, asi awona aiedza kumuuraya.
30 Hama padzakazviziya, dzakateredza naye ku Sezareya uye dzakamutumira ku Tarso.
31 Hino, ungano dze mu Djudhiya yese, Garireya no Samariya, dzainga dzaa mu nguwa ye runyararo uye dzaibambiswa; ngokuti dzaipangidza kuti dzaithya Djehovha* uye kuti dzainyaradzwa no mwiya mucena, idzona dzaibudirira.
32 Ngokuti Pedru waiita rhwendo mu mutanha wese, iyena wakateredzawo oenda koovhakacira acena aigara ku Ridha.
33 Kweneyo, iyena wakagumira mwanarume umweni waizwi Eneya, iyena waigara akaradzikwa pa kama ke makore 8, ngokuti wainga akaoma mwiri.
34 Pedru wakamubvunza kuti: “Eneya, Djesu Kristu anokuporesa. Muka urongedze pa kama yako.” Uye iyena wakamuka ciriporipoco.
35 Ese anogara ku Ridha no Mubani ro Saroni paakamuona, akatendeuka kuna Tenzi.
36 Ku Jope kainga kuno mufundi umweni we mwanakadzi waizwi Tabhita, zina iri rikaturikirhwa rinoreya kuti “Dhorika.”* Iyena waiita mabasa akawanda akanaka uye waibetserawo arombo.
37 Asi mu mazuwa awona, iyena wakarhwara uye wakafa. Hino akamusambidza uye akamukanda mu sara ye nyumba ye pamusoro.
38 Sezvo Jope yaigara dhuze no Ridha, afundi paakazvizwa kuti Pedru wainga ari mu thaundiro, akatuma anarume airi kuti amukumbire kuti: “Tapota, uyai kuno nokukasika.”
39 Ngokudaro, Pedru wakagadzirira uye wakaenda nawo. Paakaguma, akamutora woenda naye mu sara ye nyumba ye pamusoro; uye afirhwakadzi ese akamutenderera, ecicema uye ecipangidza macira akawanda e kunza no macira amweni aakagadzirirhwa na Dhorika paainga aciri mupenyu.
40 Hino Pedru wakabvunza ese kuti abude, uye wakagodama, wonamata. Mumasure mazvo, wakaringira mutumbiwo uye wakati: “Tabhita, muka!” Iyena wakafungura madziso uye paakaona Pedru, wakagara pasi.
41 Ecimubata nyara, Pedru wakamumutsa; hino wakadainza acena no afirhwakadzi uye wakaapangidza ari mupenyu.
42 Anhu ese e mu thaundi re Jope akaziya nge zvazvo, uye akawanda akagara atendi muna Tenzi.
43 Uye iyena wakagara mazuwa akawanda ku Jope no mwanarume umweni waipara matehwe waizwi Simoni.
Masoko ari pasi
^ Cigrego: “kuti asunge no makorenti.”
^ Cigrego: “kuatora akasungwa no makorenti.”
^ Cigrego: “aipinda no kubuda.”
^ Onai Apendi. A5.
^ Zina re Cigrego rekuti Dhorika uye re Ciaramaiko rekuti Tabita rinoreya “dzoma.”
