Djehovha i zina ra Mwari uye rinoreya kuti “Anoita kuti zviitike.” Djehovha ndiye Mwari we masimba ese, uye musiki we zviro zvese. Iyena ano simba rekuita zviro zvese zvaanonga asanangura kuita.

Mu Cihebheru, zina ra Mwari rinotarhwa no mabhii marongomuna. Mu Ciutee, mabhii akhona anoimirirhwa na YHWH kana kuti JHVH. Mu Bhaibheri, mu dii rakatarhwa ngo Cihebheru zina ra Mwari rinooneka kanokwana kuita 7000. Mu nyika yese anhu anotara zina ra Mwari ngo mushobo wakasiyana-siyana, eciridainza ngo mushobo unonyanya kuziikanwa mu mareketero awo.

▸ Fundo 1, ndima 15

Muridzi we Bhaibheri ndi Mwari, asi akaseenzesa anhu kuti ritarhwe. Zvakatodzana na mbiya anokumbira muzukuru wawo kuti atare tsamba, awona ecireketa masoko. Tsambeyo nja mbiya ngokuti ino masoko awo. Mwari akaseenzesa mwiya mucena wake kuti atungamirire atari e Bhaibheri kuti atare masoko ake. Mwiya wa Mwari wakaatungamirira ngo mishobo yakasiyana-siyana, pamweni paya waiita kuti aone zvioneso kana kurota, pedzepo ozotara zvaainga aoneswa.

▸ Fundo 2, ndima 5

Masoko anobuda kuna Mwari. Ungaseenza kuti upanganidze kuda ka Mwari, kufundisa magarire akanaka, kupa mutemo, kana kutonga. Angagarawo masoko e zviro zvicaitika pa nguwa ye mberi. Mu Bhaibheri mune uphorofiti wakawanda wakatodzadziswa.

Fundo 2, ndima 13

Djesu akadzadzisa uphorofiti wakawanda uri mu Bhaibheri unoreketa nge zva Mesiya. Onai bhokisi rakazwi “ Uphorofiti unoreketa nge zva Mesiya.”

▸ Fundo 2, ndima 17, masoko opasi.

Djehovha akasika nyika kuti igare paradhizo kuitira kuti igarhwe no anhu anomuda. Zvaida Mwari azvizi kucinja. Mbai-mbai pano, Mwari acabvisa ushaishi wese uye acapasa anhu ake upenyu usikaperi.

▸ Fundo 3, ndima 1

Sathani ndiyo ngirozi yakatanga kupandukira Mwari. Soko rekuti Sathani rinoreya “Muphikisi,” ngokuti anorhwa na Djehovha. Anozwiwo Dhiyabhorosi, zvecida kubhuya “mureyi” kana kuti munhu anosvipisa zina ro umweni. Akapaswa zina irona ngokuti anonyepa nge zva Mwari uye anocengedzera anhu.

▸ Fundo 3, ndima 4

Djehovha akasika ngirozi kare-kare asati atosika nyika. Akadzisika kuti dzigare kudenga. Kune mazana e mamirionji e ngirozi. (Dhanyeri 7:10) Dzine mazina no unhu wakasiyana-siyana, uye ngirozi dzakagondeka dzinodzidodosa. Dzinoramba kunamathwa nge anhu. Idzona dzine zvigaro ne mabasa akasiyana-siyana. Mabasa manganani adzinoita anosonganisira kuseenza pamberi pe cigaro ce umambo ca Djehovha, kuziisa masoko ake, kudziirira no kutungamirira anhu ake pa nyika, kuita kuti zvinonga zvatemwa na Djehovha zviitike, uye kubetsera pa basa re kuparidzira. (Pisarema 34:7; Zvakapangidzwa 14:6; 22:8, 9) Mberiyo,  idzona dzinonga dziri pamwepo na Djesu pakurhwa hondo ye Amagedhoni.— Zvakapangidzwa 16:14, 16; 19:14, 15.

▸ Fundo 3, ndima 5; Fundo 10, ndima 1

Ciro cese catinozwa mu mwoyo, catinorangarira kana kuita cisikapindirani ne zvinoda Djehovha, citema. Citema cinoshatisa ushamwari wedu na Djehovha, ndiyo ndaa akatipasa mitemo ne nhungamiriro dzinotibetsera kuti tisaite citema teciziya. Pakutanga, Djehovha akasika zviro zvese zvakakwana, asi Adhamu na Evha paakasanangura kusazwira Djehovha, akaita citema uye akagara anhu asikazi kukwana. Awona akacembera uye akazofa. Ngokuti takabvawo kuna Adhamu, tinocembera uye tinofa.

▸ Fundo 3, ndima 7; Fundo 5, ndima 3

Ihondo ya Mwari yaacatsakatisa ndiyo nyika ya Sathani no ushaishi wese.

▸ Fundo 3, ndima 13; Fundo 8, ndima 18

Umambo wa Mwari utongi wakagadzwa na Djehovha kudenga. Djesu Kristu ndiye Mambo wakhona. Mu nguwa iri kuuya, Djehovha acauseenzesa kuti abvise ushaishi wese. Umambo wa Mwari ucatonga nyika yese.

▸ Fundo 3, ndima 14

Mwari akasika Djesu asatoti asika zviro zvese. Djehovha akatuma Djesu pa nyika kuti afire anhu ese. Mumasure mekuti Djesu afa, Djehovha akamumutsa. Djesu zvino uno ari kutonga kudenga hinga Mambo we Umambo wa Mwari.

▸ Fundo 4, ndima 2

Bhaibheri rakaphorofita kana kuti rakareketa nguwa yaizooneka Mesiya. Rakareketa kuti aizooneka mu kupera ke nguwa inodainzwa masumana 69, nguwa iyona yakatanga mu gore ra 455 K.A.A. uye yakapera mu gore ra 29 K.A.

Tinoziya kudini kuti nguwa iyona yakaperera mu 29 K.A.? Masumana 69 akatanga mu gore ra 455 K.A.A. Nemiya paakaguma mu guta re Djerusarema kuti ariwakezve. (Dhanyeri 9:25; Nemiya 2:1, 5-8) Patinozwa soko rekuti “sumana” tinorangarira mazuwa 7. Masumana wo uphorofiti uu amasumanapi e mazuwa, asi masumana e makore. Mu uphorofiti “zuwa rimwe rinoimirira gore”. (Numero 14:34; Ezekiyeri 4:6) Izvi zvinoreya kuti sumana imwe na imwe ndi makore manomwe, hino masumana 69 ndi makore 483 (69 x 7). Kana tikaerenga makore 483 tecibva pa gore ra 455 K.A.A. zvinotigumisa pa gore ra 29 K.A. Iri ndiro kamare gore rakabhabhatidzwa Djesu ogara Mesiya!—Ruka 3:1, 2, 21, 22.

Uphorofiti umwewo wakareketazve nge zve sumana imweni yekutunhudzira, iyona inoimirira makore amweni manomwe. Mu makore awona, mu gore ra 33 K.A., Mesiya wakauraiwa, uye kutanga mu gore ra 36 K.A., masoko akanaka e Umambo wa Mwari aizoparidzirhwawo kune anhu ainga asiripi aDjudha.—Dhanyeri 9:24-27.

▸ Fundo 4, ndima 7

Bhaibheri rinofundisa kuti Djehovha Mwari ndiye Musiki uye kuti akatanga kusika Djesu asati asika zviro zvese. (Akorosi 1:15, 16) Djesu andiyepi Mwari we Masimba Ese. Apana paakamboreketa kuti akaezana na Mwari. Akatobhuya kuti: “Baba akuru kupinda inini.” (Juau 14:28; 1 Akorinti 15:28) Asi magereja akawanda anofundisa Utatu kana kuti Mwari mubatanidzwa we anhu atatu: Baba, Mwana,  uye mwiya mucena. Soko rekuti “Utatu” aritombooneki mu Bhaibheri. Aya mafundisiro e manyepo.

Mwiya mucena i simba ra Mwari risikaoneki raanoseenzesa pakuita kuda kake. Amunhupi. Ngo muezaniso, maKristu okutanga “akadzadzwa no mwiya mucena,” uye Djehovha akati: “Ndicadurura mwiya wangu pa anhu e madzinza ese.”—Zviito 2:1-4, 17.

▸ Fundo 4, ndima 12; Fundo 15, ndima 17

Ngei maKristu e zvirokwazvo paanonamata aaseenzesi mucinjikwa?

(1) Mucinjikwa waane makore akawanda weciseenzeswa ne maKristu e manyepo. Kareko waiseenzeswa pakunamata ke cihedheni, kaisonganisira kuita zvemaponde ne kunamata zviro zvakasikwa. Mukati me makore 300 e kutanga Djesu afa, maKristu ainga asikaseenzesi mucinjikwa pakunamata. Nokuhamba ke nguwa, Mutongi we Roma aizwi Constantino akaita kuti mucinjikwa ugare ciro cinopangidzira maKristu. Cipangidzo ici cakaseenzeswa pakuedza kutendeusa anhu akawanda ku ciKristu. Asi mucinjikwa wainga usina cokuita no zva Djesu Kristu. Bhuku rinozwi New Catholic Encyclopedia, mucingezi rinoti: “Mucinjikwa waiseenzeswa no anhu airarama mu nguwa yekuti Kristu asati auya ne anhu ainga asiripi maKristu.”

(2) Djesu aazi kufira pa mucinjikwa. MaBhaibheri amweni anoseenzesa soko rekuti “mucinjikwa”, asi masoko akaseenzeswa muciGedego ecida kubhuya pakafira Djesu anoreya mutanda wakaita hingana phoo, thimba kana muti. Bhuku rinozwi The Companion Bible, mucingezi rinoti: “MuciGedego [Novo Testamento] amuna soko rinotopangidza haro kuti ainga ari madimbu mairi e mutanda.” Djesu akafira pa mutanda wakaita hingana phoo.

(3) Djehovha aadi kuti tiseenzese mifanikiso kana zvipangidzo pa kumunamata.—Ekisodho 20:4, 5; 1 Akorinti 10:14.

▸ Fundo 5, ndima 12

Djesu akabvunza afundi ake kuti aEdzurire rufu rake. Anoita izvona makore ese mu tsiku ya 14 ya mwedzi wa Nisani, mu tsiku imweyo yaiita aIsraeri mutambo we Phasika. Pau ne vhinyu, zvinoiimirira muiri ne ngazi ya Djesu. Izvona  zvinopinda munyara dze anhu ese anonga aripo. Aya acatonga na Djesu Kristu ndiwo basi anorhya pau ne kumwa vhinyu. Asi aya ano kariro yo kuzorarama pasi pano nokusikaperi anonga aripo kuitira kupangidza kuti anoreremedza zvaakaitirhwa na Djesu, asi aarhyi pau ne kumwa vhinyu.

▸ Fundo 5, ndima 21

Mu Bhaibheri reciShona re Shanduro yenyika Itsva, soko rekuti “mwiya” rakaseenzeswa pakuda kureketa (1) munhu, (2) cinyama, uye (3) upenyu we munhu kana we cinyama. Onai miezaniso minganani:

• Munhu. “Mu nguwa ya Nowa . . . anhu padoko basi, tecireya mwiya misere, yakapona mu mvura. “ (1 Pedru 3:20) Apa soko rekuti “mwiya” riri kuda kureya anhu—Nowa no mukadzi wake, ana ake atatu, no akadzi awo..

• Cinyama. “Mwari akazoti: ‘Mvura ngaidzare no zvisikwa zvinorarama [“mwiya inorarama”, masoko opasi], ne zvisikwa zvinomburuka ngazvimburuke pamusoro pe nyika mu mbuto huru yo kudenga’ Mwari akazoti: ‘Nyika ngaibudise zvisikwa zvinorarama [“mwiya” inorarama, masoko opasi-CA] maererano no mishobo yazvo, zvipfuyo ne zvinyama zvinopsveremenda ne zvinyama zvomushango maererano no mishobo yazvo.’ Zvakaitika kudaro.’—Genesi 1:20, 24.

• Upenyu we munhu kana we cinyama. Djehovha akabvunza Mozesi eciti: “Anhu ese ainga ecipsvaka kukuuraya [“kupsvaka kuuraya mwiya wako,” masoko opasi] apera kufa.” (Ekisodho 4:19) Djesu paainga aciri pa nyika, akati: “Ndini muushi wakanaka; muushi wakanaka anopasa upenyu wake [“mwiya wake,” masoko opasi-CA] nge ndaa ye mabira.”—Juau 10:11.

   Uyezve, patinoti munhu aita ciro ne “mwiya wese,” zvinoreya kuti unonga aciita no cido ne kuita zvese zvaanokwanisa. (Mateu 22:37; Dheuteronomiyo 6:5) Soko rekuti “mwiya” ringaseenzeswawo pakureketa cido kana cidaka-daka ciri muzvisikwa. Munhu akafa kana kuti mutumbi unozwiwo mwiya wakafa.—Numero 6:6; Zvierengo 23:2; Isaya 56:11; Ajeu 2:13.

  Soko rekuti mwiya rinoseenzeswawo pakuda kureya zviro zvatisikakwanisi kuona zvakadai hingana mhepo kana simba rinoraramisa anhu ne zvinyama. Soko iri ringaseenzeswawo kureya zviro zvisina muiri we nyama zvakadai hingana ngirozi uye simba ra Mwari rinozwi mwiya mucena. Bhaibheri arifundisi kuti anhu ane ciro cinorumbwa cecirarama munhu paanofa.—Ekisodho 35:21; Pisarema 104:29; Mateu 12:43; Ruka 11:13.

▸ Fundo 6, ndima 5; Fundo 15, ndima 17

Gehena izina re rindi rainga riri padhuze ne Djerusarema kaipsveterhwa marara ne kaaipisirhwa. Apana cinopangidza kuti mu nguwa ya Djesu anhu kana zvinyama aishuphwa kana kupiswa mu rindi irona ari apenyu. Ngokudaro Gehena ariimiriri mbuto isikaoneki inoshuphirhwa kana kupisirhwa anhu nokusikaperi. Djesu paakabhuya nge zve kukhandirhwa mu Gehena, ainga ecida kubhuya nge zve kutsakatiswa zvacose.—Mateu 5:22; 10:28.

▸ Fundo 7, ndima 20

Uu munamato wakaizwa na Djesu paaifundisa afundi ake kunamata. Unozwiwo munamato wa Baba Edu kana kuti wekuezanisira. Ngo muezaniso, Djesu akatifundisa kunamata kudai:

•  “Zina renyu ngariceneswe”

  Tinonamata kuna Djehovha kuti acenese zina rake pa manyepo ese anorekethwa ngo pamusoro paro. Izvi pazvicaitika anhu ese kudenga ne pa nyika acakudza ne kureremedza zina ra Mwari.

• “Umambo wenyu ngauuye”

  Tinonamata kuti Umambo wa Mwari utsakatise nyika ya Sathani, kuti utonge pa nyika ne kuita kuti nyika yese igare paradhizo.

• “Kuda kenyu ngakuizwe . . . pa nyika”

  Tinonamata kuti cido ca Mwari caakasikira nyika cidzadzike. Djehovha anoda kuti anhu anomuzwira agare anhu akakwana uye kuti ararame nokusikaperi mu Paradhizo.

▸ Fundo 8, ndima 2

Djehovha akapa rusudzunuro kuti aponese anhu pa citema no rufu. Rusudzunuro ndiwo mutengo waidikanwa kuti tipetudzirhwe upenyu wakakwana wakaruzwa no mwanarume okutanga, Adhamu, uye kuti ugadzirise ushamwari wedu na Djehovha. Mwari akatuma Djesu pa nyika kuti afire zvitema zvedu. Rufu ra Djesu rakaita kuti anhu ese aone mukana wokurarama nokusikaperi ane upenyu wakakwana.

▸ Fundo 8, ndima 21; Fundo 9, ndima 13

Uphorofiti uri pana Dhanyeri ndima 4 unotifundisa kuti Mwari aizogadza Umambo wake muna 1914.

Uphorofiti wakhona: Djehovha akaita kuti Mambo Nabhukodhonozori arote hope dzaipangidza dzukumuti rakareba recigurwa. Mu hope idzona, tsiki ro mutiwo rakasungwa no bhande re simbi no re kobri dakara “nguwa  nomwe” kuti usakure. Panozopera nguwa iyona, mutiwo waizokurazve.—Dhanyeri 4:1, 10-16.

Zvaunoreya katiri: Muti uwona unoimirira Umambo wa Mwari. Ke makore akawanda, Djehovha aiseenzesa Madzimambo ainga ari mu Djerusarema kuti atonge dzinza re aIsraeri. (1 Makoronika 29:23) Asi madzimambo akhona aazi kurumbwa ecizwira Mwari, ndiyo ndaa utongi wawo wakaimiswa. Djerusarema rakaparadzwa mu gore ra 607 K.A.A. ndiponawo pakatangira “nguwa nomwe.” (2 Madzimambo 25:1, 8-10; Ezekiyeri 21:25-27) Djesu paakareketa kuti,“Djerusarema rinozotsikwa-tsikwa ne madzinza amweni dakara nguwa yakatemerhwa madzinza amweni yapera” aireketa nge zve “nguwa nomwe.” (Ruka 21:24) Ngokudaro “nguwa nomwe” adzizi kupera Djesu painga aciri pa nyika pano. Djehovha akagondesa kuti aizogadza Mambo pakupera ke “nguwa nomwe.” Kutonga ka Djesu, Mambo mupsva, kaizounzisa makomborero akawanda ku anhu a Mwari pasi pese, nokusikaperi.—Ruka 1:30-33.

Marebere akaita “nguwa nomwe”: “Nguwa nomwe” dzainga dzakareba makore 2520. Tikada kuerenga 2520 tecibva mu gore ra 607 K.A.A., tinoguma pa gore ra 1914. Mu gore irona Djehovha akagadza Djesu, kana kuti Mesiya, kuti agare Mambo we Umambo wa Mwari kudenga.

Tinoguma kudini pa numero 2520? Bhaibheri rinoreketa kuti nguwa nhatu ne hafu ndi mazuwa 1260. (Zvakapagidzwa 12:6, 14) Ngokudaro “nguwa nomwe” dzinopeta kairi kese numero yabva kubhuiwa, kana kuti ndi mazuwa 2520. Hino mazuwa 2520 ndi makore 2520 ngokuti pa uphorofiti “zuwa rimwe rinoimirira gore rimwe”—Numero 14:34; Ezekiyeri 4:6.

▸ Fundo 8, ndima 23

Soko rekuti “arkanjo” rinoda kureya kuti “mukuru we ngirozi.” Bhaibheri rinoreketa nge zve arkanjo umwe basi, anodainzwa kuti Migeri.—Danyeri 12:1; Djudha 9.

Migeri ndiye Mutungamiriri we anyahondo a Mwari, kureya ngirozi dzakagondeka. Zvakapangidzwa 12:7 inoti: “Migeri ne ngirozi dzake akarhwisa nyoka huru . . . ne ngirozi dzayo.” Bhuku ra Zvakapangidzwa rinoreketa kuti Mutungamiriri we anyahondo a Mwari ndi Djesu, hino Migeri i zina rimweni ra Djesu.—Zvakapangidzwa 19:14-16.

▸ Fundo. 9, ndima. 4

Masoko aya anoda kureketa nge zve nguwa yakarekethwa kuti yaizoitika zviitiko zvikuru Umambo wa Mwari usati waparadza nyika ya Sathani. Masoko amweni akatodzana no aya, ekuti “kupera ke nyika” no ekuti “kuuya ke Mwana we munhu” akaseenzeswawo mu uphorofiti we Bhaibheri pakuda kureya nge zve mazuwa okupedzesera. (Mateu 24:3, 27, 37) “Mazuwa okupedzesera” akatanga Umambo wa Mwari pawakatanga kutonga kudenga mu gore ra 1914 uye acapera kana nyika ya Sathani ikaparadzwa pa Amagedhoni.—2 Timoti 3:1; 2 Pedru 3:3.

▸ Fundo 9, ndima 5

Kuita kuti munhu wainga akafa ahwirirezve ku upenyu. Rumuko rinoitika no simba ra Mwari. Eriya, Erisha, Djesu, Pedru, uye Pauro, akamutsa anhu nge ndaa ye simba irona. Bhaibheri rinoreketa nge zve kumutswa ke anhu apfembamwe. Djehovha Mwari anogondesa kumutsa “anatsi no ashaishi” kuti azoraramezve pa nyika. (Zviito 24:15) Asi Bhaibheri rinoreketawo nge zve kumutswa ko mushobo  umweni. Uku kumutswa ke anhu akasanangurhwa na Mwari kuti ararame ne kutonga na Djesu kudenga.—Juau 5:28, 29; 11:25; Afiripi 3:11; Zvakapangidzwa 20:5, 6.

▸ Fundo 9, ndima 13

Zvecidhimoni kana kuti zvemudzimu maitiro akashata e kuedza kureketa no madhimoni. Munhu anokwanisa kuzviita pacake kana kuseenzesa munhu umweni akadai hingana n’nga, muroi kana muphorofiti. Anhu anoita zvecidhimoni anozviita ngekuti anotenda mafundisire e manyepo ekuti mwiya wo munhu aufi uye kuti unozogara mudzimu. Madhimoni anoedzawo kucengedza anhu kuti asapurutane Mwari. Kuedza kuziya ramangwana ngo kuringisa nyeredzi, kufembera, kuita zvemasarapita, kuroya, kutenda maninji, uye kuedza kududzira hope, zvese izvi nde zvecidhimoni. Mabhuku akawanda, marevhista, mafirme, maphepha anonamirhwa pa madziro, kunyazi ngoma, zvinopangidza zvecidhimoni hingana zvisikakuwadzi uye zvinodakadza. Zviro zvakawanda zvinoizwa pa mariro, zvakaita hingana kudira adzimu, ciyaruso, tsika dzinotererhwa ne mwanakadzi anonga afirhwa ne mwamuna, uye kukweya muceka zvakabatanawo no zvecidhimoni. Kajinji anhu anoseenzesa mitombo kuti aone simba remadhimoni.—Agaratiya 5:20; Zvakapangidzwa 21:8.

▸ Fundo 10, ndima 10; Fundo 16, ndima 4

Djehovha ndiye Mwari We Masimba Ese, uye akasika zviro zvese. (Zvakapangidzwa 15:3) Ndiyo ndaa ari Muridzi we zviro zvese uye Cangamire, kana kuti akasisira kutonga zviro zvaakasika. (Pisarema 24:1; Isaya 40:21-23; Zvakapangidzwa 4:11) Djehovha akakanda mutemo pa zviro zvese zvaakasika. Akasisira kugadza anhu aanoda kuti agare atongi. Tinobetsera ucangamire wa Mwari  patinopangidza kuti tinomuda uye patinomupurutana.—1 Makoronika 29:11.

▸ Fundo 11, ndima 10

Kubvisa mimba kunoizwa nge munhu ecida kuuraya mwana anonga asati abarhwa. Kakasiyana ne mimba inobuda yega kana nge ndaa ye tsawana. Kubvira panobathwa mimba, mwana anonga andoripi basi nhengo ye muiri wa mai. Anonga atori munhuwo.

▸ Fundo 13, ndima 5

Uku kuraphwa kunoizwa munhu ecikandwa ngazi mu muiri. Ingaita ngazi yake kamare inonga yakacengethwa kana ngazi ye munhu umweni. Kukandwa ngazi kunosonganisirawo kukandwa matii marongomuna anoumba ngazi anozwi maserura e kupsvuka, maserura e kucena, prasma, uye mapraketa.

▸ Fundo 13, ndima 13

Mu Bhaibheri, soko rekuti “mupango” aridi kureya basi kuphanica. Patinopangwa tinonga tecifundiswa, tecipangirhwa, ne kunatsiriswa. Djehovha aapindiridzi medida kana kuitira bvinga anhu aanonga ecipangira. (Zvierengo 4:1, 2) Djehovha anopasa muezaniso wakanaka ku madzibaba. Kupanga kaanoita kunobetsera maningi zvokuti munhu anoguma pakupfarira mupango. (Zvierengo 12:1) Djehovha anoda anhu ake, uye anoafundisa. Anoafundisa kunatsirisa nzero dzakashata uye anoafundisa kurangarira ne kuita zviro ngo mushobo unomupfadza. Kune madzibaba mupango unosonganisira kubetsera ana awo kuzwisisa kuti ngei anodikana kuazwira. Zvinosonganisirawo  kuafundisa kuti ade Djehovha, Soko rake Bhaibheri uye kuzwisisa mitemo yake.

▸ Fundo 14, ndima 13

Izvi zvisikwa zve mwiya zvakashata zvatisikakwanisi kuona zvine simba rakakura kupinda anhu. Madhimoni i ngirozi dzakashata. Akagara ngirozi dzakashata paakada oga kuzviita anyamarhwa a Mwari ngo kutama kumuzwira. (Genesis 6:2; Jude 6) Aona akabatana na Sathani pakupandukira Djehovha.— Dheuteronomiyo 32:17; Ruka 8:30; Zviito 16:16; Tiyago 2:19.

▸ Fundo 16, ndima 4