FUNDO 2
Kodi Bhaibheri i Bhuku ra Mwari Here?
1, 2. Ngei Bhaibheri i cipo cakanakisisa ca Mwari?
CIMBORANGARIRAI kuti shamwari yenyu yauya kamuri yomupasai cipo camainga musikakariri. Munozwa kudini? Zve zvirokwazvo munopfara ngo kurangarirhwa kamaizwa! Imwimwi munotenda shamwari yenyu, uye munogara no cidaka-daka cokuda kufunungura cipoco.
2 Bhaibheri cipo cakanakisisa ca Mwari. Ngei? Ngokuti zvarinobhuya azvitomboonekizve kumweni. Ngo muezaniso, irona rinobhuya kuti Mwari ndiye akasika denga, nyika, uye mwanarume no mwanakadzi okutanga. Bhaibheri rinotibetsera kuti tikwanise kurhwisana no matambudziko atinobatana nawo mu upenyu. Rinotifundisa kuti Mwari anoda kuti nyika igare mbuto yakanaka uye rinopangidza kuti acazviita kudini.
3. Mucazwisisei kana mukarumbwa mecifunda Bhaibheri?
3 Kana mukarumbwa mecifunda Bhaibheri, mucazwisisa kuti Mwari anoda kuti mugare shamwari yake. Pamunorumbwa mecifunda nge zva Mwari, ushamwari wenyu naye ucabambirira kukura.
4. Bhaibheri rinomushamisai pa zvinyi?
4 Bhaibheri rakaturikirhwa mu mareketero anodarika 2800 uye rakadhindwa mabhiriyonji aro. Anhu akawanda ari pa nyika anokwanisa kuerenga Bhaibheri mu mureketero wawo. Uye masumana ese anhu anodarika mirionji anokwanisa kugara no Bhaibheri! Akuna Bhuku rimweni rakaezana no Bhaibheri.
5. Ngei tecibhuya kuti Bhaibheri i bhuku ra Mwari?
5 Bhaibheri ‘rakafemerhwa na Mwari.’ (Erengai 2 Timoti 3:16.) Asi anhu amweni anobvunzisa kuti: ‘Bhaibheri rakatarhwa ne anhu, hino ngei recizwi kuti i bhuku ra Mwari?’ Bhaibheri rinodaira kuti: “Anhu akareketa zvecibva kuna Mwari, ecitungamirirhwa no mwiya mucena.” (2 Pedru 1:21) Zvakatodzana ne mbiya anokumbira muzukuru wawo kuti atare tsamba, awona ecireketa masoko. Tsambeyo njaani? Nja mbiya kana kuti njo muzukuru? Zviri pamhene kuti tsambewo nja mbiya. Ngo mushobo umwewo, Bhaibheri i bhuku ra Mwari haiwa re anhu akaseenzeswa kuti aritare. Anhu akatara basi marangariro a Mwari. Zve zvirokwazvo, Bhaibheri i “soko ra Mwari.”—1 Atesaronika 2:13; onai pakazwi Nyasai Kuzwisisa n.o 2.
Shanduro yeNyika Itsva yeMagwaro Matsvene mu mareketero akasiyana-siyana
BHAIBHERI ARIPESANI
6, 7. Ngei teciti Bhaibheri rese aripesani?
6 Kutara Bhaibheri kakatora makore anodarika 1600. Anhu akaritara akararama mu nguwa dzakasiyana-siyana. Amweni ainga akafunda manigi, amweni ainga asikazi kufunda maningi. Ngo muezaniso, umwe we atari ainga ari murapi. Amweni ainga ari arimi, abati e howe, aushi, aphorofiti, atongi uye madzimambo. Kunyazi zvakadaro, mabhuku ese ari mu Bhaibheri anopindirana. Ngei tecireketa kudaro? Ngokuti kunyazi hazvo rakatarhwa no anhu akasiyana-siyana, irona aribhuyi zviro zvakasiyana. *
7 Bhuku rokutanga re Bhaibheri rinopanganidza kuti matambudziko akatanga kudini pa nyika. Bhuku rekupedzesera rinopanganidza kuti Mwari acagadzirisa kudini matambudziko awona, ngokucinja nyika kuti igare paradhizo. Bhaibheri rinobhuya zvakaitika ku anhu ke zviuru zve makore uye rinopangidza kuti Mwari anoita kuti zvaanoda zviitike.
8. Ndeipi miezaniso inopangidza kuti Bhaibheri aripesani parinoreketa nge zve siensia?
8 Bhaibheri arizi kutarhwa kuti rigare bhuku re siensia kana bhuku re cikora. Asi parinoreketa zviro zvakaringana no siensia, irona aripesani. Ndizvo kamare zvataikarira ku bhuku rinobuda kuna Mwari. Ngo muezaniso, mu bhuku re Revhitiko Mwari akafundisa aIsraeri kuti aidikana kuitei kuti matenda asabararike. Bhukhu iri ro Bhaibheri rakatarhwa kare-kare kusati kaziikanwa kuti matenda anobarhwa ngo ndaa ye zvikonye. Muezaniso umweni unopangidza kuti Bhaibheri aripesani no siensia ndipo parinoreketa nge zve nyika. Irona rinobhuya kuti nyika aizi kutsamira ciro. (Djobho 26:7) Bhaibheri rainga rakatoreketawo kuti nyika yakaita hingana bhora, mu nguwa yokuti anhu ajinji ainga asati atozviziya.—Isaya 40:22.
9. Kuthembeka ke atari e Bhaibheri kunopangidzei?
9 Bhaibheri parinoreketa zvakaitika kare, irona rinobhuya zvirokwazvo. Asi mabhuku akawanda e zvakaitika kare, aabhuyi zvakaitikadi kamare ngokuti atari awo ainga asikazi kugondeka. Kajinji aifisa kunyiswa ke nyika dzawo mu hondo. Kusiyana no atari e zvinoitika mu nyika, atari e Bhaibheri ainga akathembeka, awona akatara zvese kunyazi aIsraeri paainyiswa. Awona akatotarawo zvishaishi zvawo kamare. Ngo muezaniso, Mozesi umwe we atari e Bhaibheri, aazi kufisa cishaishi cake cikuru caakaita uye akareketa kuphanicwa kaakaizwa na Mwari. (Numero 20:2-12) Kuthembeka kakaita atari e Bhaibheri kunopangidza kuti Bhaibheri rinobva kuna Mwari, ngokudaro ngatirigondei hedu.
BHUKU RAKADZARA NO MAZANO AKANAKA
10. Ngei mazano e Bhaibheri anotibetsera na nyamasi uno?
10 Bhaibheri rakafemerhwa na Mwari, irona rinobetsera “pakufundisa, pakusumurura, pakunatsirisa zviro.” (2 Timoti 3:16) Na nyamasi uno, mazano e Bhaibheri anokwanisa kutibetsera. Ngei? Ngokuti mazano aro anobuda kuna Djehovha musiki wedu. Anoziya zvatinorangarira no zviri mu mwoyo medu. Djehovha anotiziya kupinda isusu uye anoda kuti tipfare. Anoziya zvakatinakira no zvakatishatira.
11, 12. (a) Ngeapi mazano a Djesu atinogumira mu ndima 5 dakara 7 ye bhuku ra Mateu? (b) Tingafundeizve mu Bhaibheri?
11 Mu ndima 5 dakara 7 ye bhuku ra Mateu, tinogumira mazano a Djesu akanaka anotibetsera kuti tipfare, kugarisana zvakanaka no amweni, maitire atingaita munamato uye maonero atinodikana kuita mare mu upenyu wedu. Zvirokwazvo kuti Djesu akapa mazano aya kaakudarika makore anopinda 2000, asi mazano aya acino simba uye aciri kutibetsera maningi.
12 Mu Bhaibheri, Djehovha anotifundisawo zviro zvinotibetsera kurarama zvakanaka mu mhuri yedu, kugara aseenzi akanaka uye kupindirana no amweni. Zviri mu Bhaibheri zvinotibetsera nguwa dzese, azvinei kuti tiri anhu akadini, tinogarepi kana matambudziko atinawo.—Erengai Isaya 48:17.
THEMBAI UPHOROFITI WE BHAIBHERI
Isaya umwe we atari e Bhaibheri akabhuya kuti Bhabhironi raizotsakatiswa
13. Cinyi caizoitika no Bhabhironi maererano no zvakaphorofithwa na Isaya?
13 Uphorofiti wakawanda we Bhaibheri wakadzadzika. Ngo muezaniso, Isaya akabhuya kuti guta re Bhabhironi raizoparadzwa. (Isaya 13:19) Iyena akapanganidza kuti guta irona raizoparadzwa kudini. Bhabhironi rainga rakadziirirhwa no ukutira ukuru, misuwo mikuru uye murambo. Asi Isaya akaphorofita kuti murambo waizoomeswa uye misuwo yaizogumirhwa yakafununguka. Arhwi e hondo aizopinda mu guta pasikatodikani kurhwa. Isaya akaphorofita zina ro munhu aizonyisa Bhabhironi. Iyena aizodainzwa Siro.—Erengai Isaya 44:27–45:2; onai pakazwi Nyasai Kuzwisisa n.o 3.
14, 15. Uphorofiti wa Isaya wakadzadzika kudini?
14 Masure me makore 200 Isaya apera kutara uphorofiti uu, arhwi e hondo akakhwedera dhuze no Bhabhironi kuti arhwe. Ndiani aiatungamirira? Hinga zvakarekethwa no uphorofiti, ainga ari mambo we Persia, mwanarume waizwi Siro. Zvese zvainga zvapera kugadzirirhwa kuti uphorofiti umweni udzadzikewo.
15 Pa usiku wakarhwiswa guta re Bhabhironi, agari aro ainga eciita mabiko. Aizwa akacengeteka nge ndaa ye ukutira ukuru no murambo. Ngo kunza ke guta, Siro no anyahondo ake aipausa mvura yo murambo. Mvura payakazophwa, anyahondo akakwanisa kudarika murambowo. Hino, anyahondo a Siro aizokwanisa kupinda kudini mu guta re Bhabhironi? Hinga zvakarekethwa no uphorofiti, misuwo ye guta yainga yakafununguka. Ndiyo ndaa, anyahondo akapinda mugutemo asikatozi kurhwa.
16. (a) Isaya akaphorofitei nge pamusoro pe zvaizoitika ku Bhabhironi? (b) Cinyi cinopangidza kuti uphorofiti wa Isaya wakadzadzika?
16 Isaya akaphorofita kuti apana munhu aizogarazve mu Bhabhironi. Iyena akatara: “Amucagarhwizve narini, uyewo arizogari mbuto yekugara ku mubarirhwana no mubarirhwana.” (Isaya 13:20) Kodi uphorofiti uu wakadzadzikadi here? Honde. Na nyamasi uno akucagari anhu ku mbuto yainga iri Bhabhironi kareko. Mbuto ii inotora mukuwo unokwana makirometro 80 ku maodzanyemba ke Bhagidhadhe, Iraki, kuno mathuku basi. Zve zvirokwazvo Djehovha akapsvaira Bhabhironi “no mupsvairo wokutsakatisa.”—Isaya 14:22, 23. *
Mathuku e Bhabhironi
17. Ngei tingathemba mu zvipikirhwa zvese zva Mwari?
17 Tinothemba zvinobhuya Bhaiberi nge zve ramangwana redu ngokuti uphorofiti ujinji we Bhaibheri wakadzadzika. Izvi zvinotipasa rugondo rekuti Djehovha acadzadzisa cipikirhwa cake co kucinja nyika kuti igare paradhizo. (Erengai Numero 23:19.) Tino kariro yo upenyu usikaperi “yakagondeswa kare-kare na Mwari,” uye iyena “aanyepi.”—Tito 1:2. *
BHAIBHERI RINOKWANISA KUCINJA UPENYU WENYU
18. Muphostori Pauro akatii nge zve “soko ra Mwari”?
18 Tafunda kuti akuna bhuku rimweni rakaezana no Bhaibheri. Irona rino masoko anopindirana, uye ariposhi parinobhuya nge zve siensia kana zviro zvakaitika kare. Kupinda izvi, irona rinopasa mazano akanaka uye rino uphorofiti wakawanda wakatodzadzika. Asi Bhaibheri rinokwanisa kuita zviro kupinda izvi. Muphostori Pauro akatara kuti: “Soko ra Mwari ripenyu uye rino simba.” Izvi zviri kuda kureyei?—Erengai Ahebheru 4:12.
19, 20. (a) Bhaibheri rinomubetserai kudini kuti muziye zvamuri kamare? (b) Mungapangidza kudini kuti munoreremedza Bhaibheri?
19 Izvi zviri kuda kureya kuti Bhaibheri rinokwanisa kucinja upenyu wenyu uye kumubetserai kuti muziye zvamuri kamare. Rinozviita kudini? Irona rinokwanisa kumubetserai kuti muzwisise nzero dzenyu no zviri mu mwoyo menyu. Ngo muezaniso, pamweni tinorangarira kuti tinoda Mwari. Asi, patinoerenga Bhaibheri tozwisisa zvaanoda katiri, tinozviita here? Kana tikazviita ticapangidza kuti tinoda Mwari zve zvirokwazvo.
20 Zve zvirokwazvo, Bhaibheri i bhuku rinobuda kuna Mwari. Iyena anoda kuti murierenge, murifunde uye muride. Pangidzai kuti munoreremedza cipo ici ca Mwari. Mungapangidza kudini? Ngo kurumbwa mecifunda Bhaibheri. Kana mukadaro, mucazwisisa kuti ngei Mwari akasika nyika no anhu. Mu fundo inoteera ticafunda zvakawanda nge zvazvo.
^ par. 6 Anhu amweni anobhuya kuti masoko ari mu Bhaibheri anopesana, asi andizvopi. Onai fundo 7 yo Bhuku rinozwi Bhaibheri–iShoko raMwari Here Kana Kuti Romunhu? rakabudiswa no Apupuri a Djehovha.
^ par. 16 Kana mecida kufunda zvakawanda nge zve uphorofiti we Bhaibheri, erengai mapajina 27 dakara 29 o bhurushura Um livro para todas as pessoas, rakabudiswa no Apupuri a Djehovha.
^ par. 17 Kutsakatiswa ke Bhabhironi andiwopi wega uphorofiti we Bhaibheri wakadzadzika. Erengai nge zve uphorofiti unobhuya zvakaringana na Djesu pa mbuto yakazwi Nyasai Kuzwisisa n.o 4.
