1. Mubvunzo upi unoizwa ne anhu amweni paanopedza kufunda bhuku rino?

MAKAFUNDA zvirokwazvo zvakawanda zve Bhaibheri meciseenzesa bhuku rino, zvakadai hingana cigondeso ca Mwari ce upenyu usikaperi, magarire akaita anhu akafa, uye kariro yekuti akafa acamutswa. (Muparidzi 9:5; Ruka 23:43; Juau 5:28, 29; Zvakapangidzwa 21:3, 4) Zvingadaro kuti makatotanga kupinda misango  ye Apupuri a Djehovha uye kutenda kuti anonamata Mwari ngo mushobo waanoda. (Juau 13:35) Pamweni makatotanga kuita ushamwari na Djehovha uye maakutoda kumuseenzera. Ngokudaro pamweni mungarangarira kuti, ‘Ndingaitei zvinopano kuti ndiseenzere Mwari?’

2. Ngei mwanarume umweni we ku Etiopia aida kubhabhatidzwa?

² Ndizvo zvakabvunzisawo mwanarume umweni we ku Etiopia akararama mu nguwa yekuti Djesu acandobva kumutswa. Mufundi wa Djesu anozwi Firipi akaparidzira mwanarume uu. Firipi akamupanganidzira kuti Djesu ndiye ainga ari Mesiya. Iyena akabayiwa mwoyo ne zvaaifundiswa zvokuti akati: “Onai pano pane mvura! Cinyi cingandipingidza kubhabhatidzwa?”—Zviito 8:26-36.

3. (a) Djesu akatuma ateeri ake kuti aende koitei? (b) Munhu anodikana kubhabhatidzwa kudini?

³ Bhaibheri rinofundisa zvakadjeka kuti kana mecida kuseenzera Djehovha, munodikana kubhabhatidzwa. Djesu akati kuna ateeri ake: “Endai kune anhu e madzinza ese, afundisei kuti agare afundi angu, meciabhabhatidza.” (Mateu 28:19) Djesu wene akapangidza maitirhwe azvo paakabhabhatidzwawo. Akanyikwa muiri wese mu mvura, haiwa basi kumizirhwa zvimvura pa musoro. (Mateu 3:16) Nyamasi uno kana muKristu ecida kubhabhatidzwa, anodikanawo kunyikwa muiri wese mu mvura.

4. Kubhabhatidzwa kenyu kunopangidzei amweni?

⁴ Pamunobhabhatidzwa, munonga mecipangidza amweni kuti munoda kamare kugara shamwari ya Mwari uye kuti munoda kumuseenzera. (Pisarema 40:7, 8) Hino pamweni mungadzibvunzisa, ‘Ndinodikana kuitei kuti ndibhabhatidzwe?’

5. (a) Munodikana kuitei musati mabhabhatidzwa? (b) Ngei zvakanaka maningi kuti mugare mecipinda misangano ye ciKristu?

⁵ Musati mabhabhatidzwa, munodikana kuguma pakuziya Djehovha na Djesu. Makatotanga kuita izvona ngo kufunda kamuri kuita Bhaibheri. (Erengai Juau 17:3.) Asi izvona andizvopi zvega zvinodikanwa. Bhaibheri rinobhuya kuti munodikana kudzadzwa “ne ruziyo re zvirokwazvo” nge zve kuda ka Djehovha. (Akorosi 1:9) Misangano ye Apupuri a Djehovha icamubetserai kuti mubambirire kubambisa ushamwari wenyu na Djehovha. Kuziya izvona kunodikana kuita kuti mugare mecipinda misangano iyona.—Ahebheru 10:24, 25.

6. Musati mabhabhatidzwa, munodikana kuziya zviro zvakawanda kudini nge zve Bhaibheri?

⁶ Zvirokwazvo kuti Djehovha aiimiriri kuti muziye zvese zviri mu Bhaibheri kuti mubhabhatidzwe. Aazi kuimirira kuti mwanarume we ku Etiopia aziye zvese asati abhabhatidzwa. (Zviito 8:30, 31) Kubhuya zvirokwazvo, ticarumbwa tecifunda nge zva Mwari kwenda no kwenda. (Muparidzi 3:11) Asi kuti mubhabhatidzwe, munodikana kutanga kuziya ne kutenda fundo dze pamusoro-soro dze Bhaibheri.—Ahebheru 5:12.

7. Kufunda kamaita Bhaibheri kamubetserai kudini?

⁷ Bhaibheri rinoti: “Pasina kutenda azviiti kupfadza Mwari.” (Ahebheru 11:6) Ngokudaro munodikana kutenda musati mabhabhatidzwa. Bhaibheri rinotibvunza kuti anhu amweni we ku Korinti akazwa zvaifundiswa no ateeri a Djesu uye “akatanga kutenda, obhabhatidzwa.” (Zviito 18:8) Nge gwanza rimwero, kufunda kamaita Bhaibheri kamubetserai kuti mutende zvinopikirhwa na Mwari uye mu simba re rufu ra Djesu, rokuti  ricatiponesa pa citema ne rufu.—Djoshuwa 23:14; Zviito 4:12; 2 Timoti 3:16, 17.

8. Cinyi cicaita kuti mugare ne cidakadaka cekuda kureketa ne amweni zvamunofunda?

⁸ Pamunobambirira kufunda Bhaibheri, meciona kubetserhwa kamuri kuizwa naro mu upenyu wenyu, kutenda kenyu kucabamba. Izvi zvicaita kuti mugare ne cidakadaka cekuda kureketai ne amweni nge zviya zvamunofunda. (Djeremiya 20:9; 2 Akorinti 4:13) Asi munodikana kureketa nani?

9, 10. (a) Mungatanga kureketa zvamuri kufunda nani? (b) Munodikana kuitei kana mecida kuparidza pamwepo ne ungano?

⁹ Pamweni mungada kutanga kureketa zvamuri kufunda ne mhuri yenyu, shamwari dzenyu, anyacigarisano kana amunoseenza nawo. Izvi zvakanaka, asi musakanganwe kureketa nawo zvakanaka uye ngo mushobo unopangidza rudo. No kuhamba ke nguwa munonga maakukwanisa kuparidza pamwepo ne ungano. Kana mukaona kuti magadzirira kuita izvona, reketai ne Mufundisi wenyu we Bhaibheri kuti munoda kutanga kuparidza pamwepo ne ungano. Kana ari kumufundisai Bhaibheri eciona kuti makagadzirira uye kuti munorarama maererano ne zvamunofunda mu Bhaibheri, mwese muri airi mucagara pasi ne akuru airi e ungano.

¹⁰ Akuru acada kureketei na imwimwi pa musangano uwona? Acareketa na imwimwi kuti aone kana maakuzwisisa uye kuti munotenda zvese zvamunofunda mu Bhaibheri. Acada kuonawo kana muri kurarama maererano ne zvinorekethwa ne Bhaibheri uye kana munoda kamare kugara Mupupuri wa Djehovha. Edzurirai kuti  akuru anorangarira umwe ne umwe ari mu ungano kubatanidzawo imwimwi, ndiyo ndaa amudikani kuthya kureketa nawo. (Zviito 20:28; 1 Pedru 5:2, 3) Kana mapedza kureketa nawo, akuru acamubvunzai kana maakuita kuti mutange kuparidza pamwepo ne ungano.

11. Ngei zvecidikana kuti mugadzirise panodikanika musati matanga kuparidza ne ungano?

¹¹ Pamweni akuru acamubvunzai kuti pane zviro zvamunodikana kugadzirisa musati matanga kuparidza ne ungano. Ngei zvakanaka maningi kuti mugadzirise zviro izvona? Ngokuti patinoparidza, tinonga teciimirira Djehovha, ndiyo ndaa mararamiro edu anodikana kuita kuti akudzwe.—1 Akorinti 6:9, 10; Agaratiya 5:19-21.

12. Ngei tese tinodikana kucinyuka?

¹² Pane zvimwenizve zvamunodikana kuita musati mabhabhatidzwa. Muphostori Pedru akati: “Cinyukai pa zvitema zvenyu, mutendeuke kuti zvitema zvenyu zvipfudzwe.” (Zviito 3:19) Kucinyuka kunoreyei? Kunoreya kuzwa kurhwadziwa mu mwoyo nge zvakashata zvataiita kare. Ngo muezaniso, kana munhu ainga ane tsika yekuita useki, hino anodikana kucinyuka. Asi kana mu upenyu wenyu wese maiedza kuita zvakanaka? Kunyazi zvakadaro, munodikanawo kucinyuka, ngokuti tese tinoshaisha uye tinodikana kugara tecikumbira kurekererhwa na Mwari.—Aroma 3:23; 5:12.

13. Zvinoda kureyei “kutendeuka”?

¹³ Asi kucinyuka basi zvinokwana here? Haiwa. Pedru akareketa kuti tinodikana “kutendeuka.” Izvi zvinoreya kuti munodikana kusiya zvakashata zvese zvamaiita kare motanga kuita zvakanaka. Kuti tizwisise ngo mwazvo, ngatiti murikwenda ku mbuto yamusati makamboenda. Mati hambei padoko, moona kuti mapsveteka.  Munoitei? Zve zvirokwazvo kuti monoimira, motendeuka, pedzepo motora gwanza rakanaka. Zvakatodzanawo ne kufunda kamuri kuita Bhaibheri, ngokuti munokwanisawo kuona kuti pane zviro zvamaiita kare zvamunodikana kusiya. Garai ne cido ce “kutendeuka”—kana kuti, kugadzirisa panodikanika kuti muite zvakanaka.

14. Munodzipira kudini kuna Mwari?

¹⁴ Ciro cimweni cinodikanwa maningi kuti muite musati mabhabhatidzwa ndecekudzipira kuna Djehovha. Munodzipira kuna Djehovha ngokuita munamato kaari mecigondesa kuti mucanamata iyena basi uye kuti kuita kuda kake kucagara ciro cokutanga mu upenyu wenyu kupinda zvese.—Dheuteronomiyo 6:15.

15, 16. Cinyi cicaita kuti mude kupa upenyu wenyu kuna Mwari?

¹⁵ Kupika kuseenzera Djehovha basi kakaezana ne kugondesa munhu wamunoda kuti mucagara naye upenyu wenyu wese. Ngatiti murumbwana umweni ne musikana umweni ari kudanana. Murumbwana paanoziya zvakawanda nge zve musikana wake, anobambirira kumuda zvokuti anonga wotoda kumuwaka. Kunyazi hazvo eciziya kuti kuwaka kunounza basa, iyena anosanangura kuwakana naye ngokuti anomuda.

¹⁶ Pamunofunda zvakawanda nge zva Djehovha, munotanga kumuda zvokuti mucada kuita zvamunokwanisa kuti mumuseenzere. Izvona zvicaita kuti muite munamato wo kugondesa kuti munoda kumuseenzera. Bhaibheri rinobhuya kuti munhu wese anoda kuteera Djesu anodikana “kudziramba.” (Marko 8:34) Zvinoda kureyei kudziramba? Zvinoreya kuti kuita zvinoda Djehovha ndizvo zvamunokanda pakutanga mu upenyu wenyu kupinda zvamunoda.—Erengai 1 Pedru 4:2.

17. Ngei anhu amweni aadzipiri kuna Djehovha?

¹⁷ Anhu amweni aadzipiri kuna Djehovha ngokuti anothya kuti aazokwanisi kuita zvaakagondesa kaari. Anothya kumutsukwarisa kana kuti anorangarira kuti ngo kutama kudzipira kuna Djehovha, iyena aazoatongi ngo zvanoiita.

18. Cinyi cicamubetserai kuti musathye kudzipira kuna Djehovha?

¹⁸ Kuda kamunoita Djehovha kucamubetserai kuti musathye kuti amuzokwanisi kumuseenzera momutsukwarisa. Ngokuti munoda Djehovha, mucaita zvamunokwanisa kuti muite zvamakamupikira. (Muparidzi 5:4; Akorosi 1:10) Amuzorangariri kuti kuita kuda ka Djehovha basa maningi. Muphostori Juau akatara kuti: “Kuda Mwari kunoreya kucengeta mitemo yake; uye mitemo yake airemi.”—1 Juau 5:3.

19. Ngei musikadikani kuthya kudzipira kuna Djehovha?

¹⁹ Azvireyi kuti munodikana kugara munhu asikamboshaishi kuti mudzipire kuna Djehovha. Iyena aatibvunzi kuti tiite zvatisikakwanisi kuita. (Pisarema 103:14) Acamubetserai kuti mukwanise kuita zvakanaka. (Isaya 41:10) Gondai Djehovha ne mwoyo wenyu wese, uye “iyena acanatsirisa makwanza enyu.”— Zvierengo 3:5, 6.

20. Kana mapedza kudzipira kuna Djehovha, cinyi cinodikanwazve?

²⁰ Munoona kuti magadzirira kuti mudzipire kuna Djehovha? Kana mapedza kudzipira kuna Djehovha, munodikana kuita ciro cimweni. Munodikana kubhabhatidzwa.

21, 22. Mungaziisa kudini pamhene kutenda kenyu?

²¹ Ziisai murongi we dare re akuru we mu ungano yenyu kuti madzipira kuna Djehovha uye kuti muri kuda  kubhabhatidzwa. Awona acakumbira Akuru anganani kuti aone na imwimwi fundo dze pamusoro-soro dze Bhaibheri. Kana akaona kuti munoita kubhabhatidzwa, acamubvunzai kuti munozobhabhatidzwa pa gungano rinoteera re Apupuri a Djehovha. Pa gungano rakhona, pacaizwa mharidzo inopanganidza kuti rubhabhatidzo rinoreyei. Hama inonga yeciita mharidzo icakumbira kuti ese anonga akagadzirira kubhabhatidzwa  adaire mibvunzo miiri isikashuphi. Pamunodaira mibvunzo iyona, munonga ‘meciziisa pamhene’ kutenda kenyu.—Aroma 10:10.

²² Pedzepo mucabhabhatidzwa. Mucanyikwa muiri wese mu mvura. Kubhabhatidzwa kwenyu kucapangidza anhu ese kuti makadzipira kuna Djehovha uye kuti kubvira apona Maamupupuri wa Djehovha.

23. Zvinoreyei kubhabhatidzwa “mu zina ra Baba ne re Mwana ne re mwiya mucena”?

²³ Djesu akareketa kuti afundi ake aizobhabhatidzwa “mu zina ra Baba ne re Mwana ne re mwiya mucena.” (Erengai Mateu 28:19.) Zvinoreyei izvona? Mu zina ra Baba zvinoreya kutenda kuti Djehovha ndi Mwari we Masimba Ese. Mu zina re Mwana zvinoreya kureremedza basa rina Djesu mu cido ca Mwari. Uye kubhabhatidzwa mu zina re mwiya mucena zvinoreya kutenda kuti Mwari anoseenzesa mwiya mucena wake kuti aite kuda kake.—Pisarema 83:18; Mateu 28:18; Agaratiya 5:22, 23; 2 Pedru 1:21.

24, 25. (a) Kubhabhatidzwa kunoimirirei? (b) Ticaonei mu fundo inoteera?

²⁴ Kubhabhatidzwa kunoimirira ciro cakakura maningi. Pamunonyikwa mu mvura, zvinoita hingana muri kusiya upenyu wenyu okare. Pamunobuda mu mvura, zvinoreya kuti maakuda kutanga upenyu umweni meciita kuda ka Mwari. Munonga mecipangidza kuti kubvira apona kwenda mberi mucaseenzera Djehovha. Edzurirai kuti amuzi kudzipira kune munhu, sangano, kana basa. Asi kuti madzipira kuna Djehovha.

²⁵ Kudzipira ne kubhabhatidzwa kucamubetserai kuti mubambise ushamwari wenyu na Djehovha. (Pisarema 25:14) Izvi azvidi kureya kuti munhu anonga abhabhatidzwa atopona. Muphostori Pauro akatara kuti: “Rumbwai meciseenzera kuponeswa kenyu ne kuthya ne kutetemera.” (Afiripi 2:12) Kubhabhatidzwa kunonga kuri kutanga. Asi mungaitei kuti murumbwe muri dhuze na Djehovha? Fundo ye kupedzesera ye bhuku rino icadaira mubvunzo uwona.