1, 2. (a) Kodi mungabhuyadi kamare kuti munonyasa kuziya munhu ngokuti munoziya zina rake basi? Panganidzai. (b) Anhu amweni anobhuyei nge zva Djesu?

MU Nyika mune anhu akawanda ano mbiri. Rangarirai nge zve umwe wawo. Kodi mungabhuyadi kamare kuti munonyasa kuziya munhuwo ngokuti munoziya zina rake basi? Zviri pamhene kuti haiwa. Kuti muzogume pakubhuya kuti munonyasa kuziya umwe munhu, munodikana kuziya magarire ake no zvimweniwo zvakaringana no upenyu wake.

² Djesu Kristu akararama pa nyika makore angakwana 2000 adarika. Pamweni makambozwa kubhuya nge zvake. Asi anhu akawanda ane maonero akasiyana nge zva Djesu. Anhu amweni anobhuya kuti Djesu ainga ari munhu akanaka basi, amweni anobhuya kuti ainga ari muphorofiti uye amweni anorangarira kuti Djesu ndiye Mwari. Pacenyu imwimwi, munoonawo kudini?—Onai pakazwi Nyasai Kuzwisisa n.^o 11.

3. Ngei zvakanaka maningi kamuri kuziya Djehovha na Djesu Kristu?

³ Kuziya zvirokwazvo nge zva Djesu zvakanaka maningi. Ngei? Ngokuti upenyu usikaperi unobva pakuziya kedu Djehovha Mwari na Djesu Kristu. Bhaibheri rinopanganidza: “Kuti aone upenyu usikaperi, anodikana kuziya imwiwi, Mwari umwe basi we zvirokwazvo, no uya wamakatuma Djesu Kristu.” (Juau 17:3) Mu Fundo 1, takafunda zvirokwazvo nge zva Djehovha Mwari. Asi tinodikanawo kufunda ngo pamusoro pa Djesu kuti tione kurarama nokusikaperi  mu paradhizo pa nyika. (Juau 14:6) Kufunda nge zva Djesu kungamubetseraizve ngo mushobo umweni. Iyena ndiye muezaniso wakanaka wokuti tinodikana kurarama kudini uye kuti tinodikana kugarisana zvakadini no anhu. (Juau 13:34, 35) Hino, ngationei zvinofundisa Bhaibheri ngo pamusoro pa Djesu.

4. Masoko okuti “Mesiya” uye “Kristu” ari kuda kureyei?

⁴ Djesu anodainzwa kuti Kristu, kana Mesiya. Masoko okuti “Kristu” uye “Mesiya” ari kuda kureya zviro zvimwezvo. Kristu i soko re ciGedegu uye Mesiya i soko re ciHebheru. Masoko mairi aya anoreya nge zve munhu akadzodzwa, kana kuti, munhu akasanangurhwa na Mwari kuti aite basa rinodikanwa maningi. Djesu akasanangurhwa kuti adzadzise zvipikirhwa zvese zva Mwari. Djesu angatibetserawo nyamasi uno. Bhaibheri rinopangidza kuti Djehovha ainga akagondesa kuti aizotuma Mesiya. Ndiyo ndaa, Djesu asati abarhwa anhu ajinji aidzibvunzisa kuti: ‘Ndiani aizogara Mesiya?’

5. Kodi afundi a Djesu aigonda here kuti ndiye ainga ari Mesiya?

⁵ Afundi a Djesu ainga ane rugondo rekuti ndiye ainga ari Mesiya kana kuti Kristu, uya akapikirhwa. (Juau 1:41) Ngo muezaniso, Simoni Pedru akati kuna Djesu: “Ndimwi Kristu.” (Mateu 16:16) Hino isusuwo, tingagara kudini no rugondo rekuti Djesu ndiye akasanangurhwa na Mwari?

6. Djehovha akabetsera kudini anhu kuti aziye kuti ndiani ainga ari Mesiya?

⁶ Kare-kare Djesu asatoti abarhwa, Mwari akaita kuti aphorofiti atare zviro zvakaringana na Mesiya. Izvona zvaizobetsera anhu kuti aziye kuti ndiani ainga ari Mesiya. Izvi zvaizoitika kudini? Rangarirai kuti muri kuda kwenda ku paraji kotambira munhu wamusikazii. Munoita kudini kuti muziye ndiani munhuwo pakati pe anhu akawanda? Kana  mukabvunzwa magarire e munhuwo no macira aakapfeka, zvicamuitirai nyore kuti mumuziye. Ngo mushobo umwewo, Djehovha akaseenzesa aphorofiti kuti atare zviro zvaizoizwa na Mesiya uye zvaizoitika naye. Anhu ane mwoyo wakanaka aizoezanisa zvakarekethwa no aphorofiti no zvakaitika na Djesu. Ngokudaro, zvaizoita kuziya kuti Djesu ndiye Mesiya.

7. Bhuyai nge zve uphorofiti uwiri unopangidza kuti Djesu ndiye Mesiya.

⁷ Onai uphorofiti uwiri wakafemerhwa na Mwari kuti aphorofiti ake atare. Wokutanga, makore 700 okuti Djesu asati abarhwa, Mika akaphorofita kuti Mesiya aizobarirhwa ku guta rimweni ridoko rinozwi Bheterehema. (Mika 5:2) Uye Djesu akabarirhwadi mu guta irona kamare! (Mateu 2:1, 3-9) Wocipiri, Dhanyeri akaphorofita kuti Mesiya aizobudikira mu gore ra 29 K.A. (Dhanyeri 9:25) Uphorofiti uwona wakadzadzikawo. Kune uphorofiti umweni wakawanda unopangidza kuti Djesu ndiye mesiya akapikirhwa.—Onai pakazwi Nyasai Kuzwisisa n.^o 12.

8, 9. Zvinyi zvakaitika pakabhabhatidzwa Djesu zvinopangidza kuti ndiye Mesiya?

⁸ Zviro zvakaitika pakabhabhatidzwa Djesu zvinopangidzazve kuti ndiye Mesiya. Mwari ainga akagondesa kuti Juau Mubhabhatidzi aizoona cioneso caizomubetsera kuziya Mesiya. Zvinyi zvakaitika mu gore ra 29 K.A. Djesu paakaenda ku Murambo we Djorodhani koobhabhatidzwa na Juau? Bhaibheri rinobhuya zvinyi zvakaitika Djesu paakapedza kubhabhatidzwa: “Akaona mwiya wa Mwari wecicitha wakaita hingana njiwa uciuya paari. Uyezve, izwi  rakabvawo ku denga reciti: ‘Uu ndiye Mwana wangu, mudisiswa, wandapfarira.’ (Mateu 3:16, 17) Ici ndico cainga cioneso kuna Juau. Juau akaona njiwa no kuzwa izwi ra Mwari. Ndiyo ndaa iyena akagara no rugondo rokuti Djesu ndiye Mesiya. (Juau 1:32-34) Djesu akagara Mesiya pa nguwa yaakatambira mwiya mucena wa Mwari. Ndiye ainga akasanangurhwa na Mwari kuti agare Mutungamiriri uye Mambo.—Isaya 55:4.

 ⁹ Zviro zvitatu zvinoteera ndizvo zvinopangidza kuti Djesu ndiye Mesiya: (1) Uphorofiti we Bhaibheri, (2) Zvakarekethwa na Djehovha uye (3) Cioneso caakapangidza pa rubhabhatidzo ra Djesu. Asi Djesu akabvepi? Ainga ari munhu akadini? Ngationei kuti Bhaibheri rinotii.

10. Bhaibheri rinobhuyei nge zve upenyu wa Djesu asati auya pa nyika?

¹⁰ Bhaibheri rinoreketa kuti Djesu akararama nguwa yakareba kudenga asati auya pasi pano. Muphorofiti Mika akabhuya kuti Mesiya ainga ari ‘wekare-kare.’ (Mika 5:2) Djesu wene kajinji akareketa kuti akararama ku denga asati abarhwa pasi pano. (Erengai Juau 3:13; 6:38, 62; 17:4, 5.) Paainga asati auya pa nyika, Djesu ainga ano ushamwari wakanakisisa na Djehovha.

11. Ngei Djesu anodiwa maningi na Djehovha?

¹¹ Djesu anodiwa maningi na Djehovha. Ngei? Cekutanga, ngokuti Djesu ndiye “dangwe re zvisikwa zvese.” * Izvi zviri kuda kureyei? Zviri kuda kureya kuti ndiye akatanga kusikwa. Djehovha akasika Djesu painga asati asika zviro zvese zvimweni kana munhu upi hake. (Akorosi 1:15) Cecipiri, Djesu anodiwa maningi na Djehohva ngokuti ndiye “Mwana wake umwe ega.” Izvi zviri kuda kureyei? Zviri kuda kureya kuti ndiye ega akasikwa na Djehovha wene. (Juau 3:16) Cecitatu, Djesu akabetsera Djehovha kusika zviro zvese zvimweni. (Akorosi 1:16) Cecirongomuna, Djehovha akaseenzesa Djesu kuti apase nhungamiriro ne masoko kune ngirozi no anhu. Ndiyo ndaa, Djesu anozwi “Soko.”—Juau 1:14.

12. Tinoziya kudini kuti Djesu na Mwari anhu airi akasiyana?

¹² Anhu amweni anorangarira kuti Djesu na Djehovha  munhu umwe basi, asi andizvopi zvinofundiswa ne Bhaibheri. Bhaibheri rinoreketa kuti Djesu akasikwa, kana kuti, ane paakatangira. Asi Djehovha, Uya akasika zviro zvese aana paakatangira. (Pisarema 90:2) Djesu aazi kumborangarira na kamwe kuezana na Mwari ngokuti iyena ndi Mwana wa Mwari. (Erengai Juau 14:28; 1 Akorinti 11:3.) Djehovha basi ndiye “Mwari we Masimba Ese.” (Genesi 17:1) Djehovha mukuru maningi uye munhu ano simba maningi kupinda zvese zvakasikwa.—Onai pakazwi Nyasai Kuzwisisa n.^o 13.

13. Ngei Bhaibheri reciti kuti Djesu “mufanikiso wa Mwari asikaoneki”?

¹³ Djehovha na Mwana wake Djesu, akaseenza ese ke mabhirionji e makore, ecisika ngirozi, nyeredzi, zuwa no zviro zvimweni. Rangarirai basi kubambiswa kakaita rudo rawo ngokugara nguwa yakareba maningi ari ese! (Juau 3:35; 14:31) Djesu akanyasa kuteedzera zvaiizwa na Baba ake. Ndiyo ndaa, Bhaibheri rinoti nge zva Djesu: “Ndiye mufanikiso wa Mwari asikaoneki.”—Akorosi 1:15.

14. Zvakaitika kudini kuti Mwana mudisiswa wa Mwari abarhwe hinga munhu?

¹⁴ Mwana mudisiswa wa Djehovha akatenda kuuya pa nyika. Kuti izvi zviitike aidikana kubarhwa hinga munhu. Izvi zvakaitika kudini? Djehovha akaita cishamiso. Akakanda upenyu wa Mwana wake mu ndani me musikana umweni anozwi Mariya. Ngokudaro, Mariya akabata pa muiri kunyazi ainga aciri mhandwe. Ngokuti mwanewo aazi kugara no baba we nyama, ndiyo ndaa iyena ainga ari munhu akakwana. Mariya akapasa mwana wake zina rekuti Djesu.—Ruka 1:30-35.

15. Tingaziya kudini zvakawanda nge zva Djehovha?

¹⁵ Mungakwanisa kufunda zvakawanda zvakaringana no zvakaizwa na Djesu ne zvekuti ainga ari munhu akadini  kana mukaerenga Bhaibheri mu bhuku ra Mateu, Marko, Ruka no ra Juau. Mabhuku aya e Bhaibheri anozwi mavhangeri. Djesu akaezana maningi na Baba ake, hino zvamucaerenga nge zva Djesu, zvicamubetserai kuziya Djehovha. Ndiyo ndaa Djesu akati: “Uya anondiona aonawo Baba.—Juau 14:9.

16. Ngacipi ciro cakanaka maningi cainyanya kurekethwa na Djesu? Ndiani akafundisa Djesu nge zve Umambo wa Mwari?

¹⁶ Anhu akawanda aidainza Djesu “Mufundisi” ngokuti aifundisa anhu. (Juau 1:38; 13:13) Cimwe ce zviro zvakanaka zvaainyanya kufundisa ainga ari “masoko akanaka e Umambo.” Umambo uwona cinyi? Ndi utongi wa Mwari ucazotonga nyika yese uri kudenga. Umambo wa Mwari ucakomborera anhu anozwira Mwari. (Mateu 4:23) Ndiani akafundisa Djesu nge zve Umambo wa Mwari? Ndi Mwari. Djesu akati: “Zvandinofundisa azvangupi, asi nge zva uya akandituma.” (Juau 7:16) Djesu akafundisa nge zve Umambo ngokuti aiziya kuti Djehovha anoda kuti anhu aziye nge zve masoko akanaka e Umambo kana kuti, masoko anopfadza ekuti Umambo wa Mwari ucatonga nyika yese.

17. Djesu aifundisirepi? Ngei Djesu aipeta masimba kuti afundise anhu?

¹⁷ Djesu aifundisirepi? Aifundisa kwese kaaiona anhu. Aifundisa mu mitanha, mu maguta, mu mabazari, mu mbuto dzokunamatira, ne mu mamizi me anhu. Djesu aiimirapi kuti anhu auuye kaari. Kajinji iyena wene aitopsvaka anhu. (Marko 6:56; Ruka 19:5, 6) Djesu aipeta masimba kuti afundise anhu. Ngei? Ngokuti aiziya kuti ndizvo zvaidiwa na Mwari kuti aite. Iyena aizwira Baba ake nguwa dzese (Juau 8:28, 29) Djesu aiparidzawo ngokuti aizwira usisi anhu. (Erengai Mateu 9:35, 36.) Aiona kuti atungamiriri e magereja aifundisapi zvirokwazvo ngo pamusoro pa Mwari uye Umambo. Ndiyo ndaa, aida kureketa nge zve masoko anopfadza e Umambo ku anhu ese.

18. Munonyanya kuda cinyi pa mabatire aiita Djesu anhu?

 ¹⁸ Djesu aida anhu uye aiarangarira. Ainga akanaka uye anhu aizwa akasudzunuka kucedza naye. Kunyazi ana adoko aidakadzwawo kugara naye. (Marko 10:13-16) Djesu aibata anhu ese ngo mushobo umwewo. Djesu aizonda ushaishi waiizwa no anhu ne kusagondeka kawo. (Mateu 21:12, 13) Mu nguwa yake anakadzi ainga asina zvitenderhwa zvakawanda uye ainga asikareremedzwi. Asi nguwa dzese Djesu aireremedza anakadzi. (Juau 4:9, 27) Uyezve Djesu aidzidodosa zve zvirokwazvo. Ngo muezaniso, zuwa rimweni akaita basa rinoizwa kajinji no mureki. Iyena akasuka murenje dze afundi ake.—Juau 13:2-5, 12-17.

19. Ndeupi muezaniso unopangidza kuti Djesu aizia zvaidiwa no anhu uye aida kuabetsera?

¹⁹ Djesu aizia zvaidiwa no anhu uye aida kuabetsera. Izvi zvakabuda pamhene paakaseenzesa simba ra Mwari kuti aite zvishamiso zvokurapa atenda. (Mateu 14:14) Ngo muezaniso, mwanarume umweni ainga ano nhenda ye mapere akakumbira kuraphwa na Djesu. Iyena akati: “Kana mecida henyu, mungandicenesa.” Apana aigara dhuze no munhu ano mapere ngokuti nhenda iyona inonyanyasa uye inopaswana. Asi Djesu akazwa kurhwadziya ngokuona kurhwadziwa no kushuphika ke mwanarume uya. Iyena akazwa usisi uye akada kumubetsera. Hino Djesu akamubata uye akati: “Inini ndinoda! Ceneswa.” Mwanarumewo akaporeswa! (Marko 1:40-42) Zve zvirokwazvo mwanarume uya akapfara maningi!

20, 21. Ngei Djesu muezaniso wakanaka wo kuzwira Mwari?

²⁰ Djesu muezaniso wakanaka wo munhu akazwira Mwari. Azvinei ne zvaiitika kaari kana kuti zvaiizwa no azondi ake, akarumbwa akagondeka kuna Baba ake. Ngo  muezaniso, Djesu aazi kushaisha paakaedzwa na Sathani. (Mateu 4:1-11) Nguwa imweni anyaukama ake aitendapi kuti ainga ari Mesiya uye akabhuya kuti ainga “aakuhunguruka.” Kunyazi zvakadaro, Djesu akaenderera mberi no basa ra Mwari. (Marko 3:21) Kupinda izvi, azondi a Djesu akamuitira mwoyo mushukutu. Asi Djesu akarumbwa akagondeka kuna Mwari uye aambozi kuaitira ciro cakashata.—1 Pedru 2:21-23.

²¹ Djesu akarumbwa akagondeka kuna Djehohva kunyazi paakauraiya zve tsumbi uye zvinorhwadza. (Erengai Afiripi 2:8.) Cimborangarirai zvaakabatana nazvo pa zuwa raakafa. Djesu akasungwa. Paaitongwa, adairiri anonyepa akareketa kuti iyena ainga asikareremedzi Mwari. Akatongwa no atongi akashata. Anhu akamuseka. Djesu akapondwa no masurudado uye akakhomerhwa pa mutanda.  Asati afa, Djesu akati: “Zvaitika!” (Juau 19:30) Izvi zviri kuda kureyei? Zviri kuda kureya kuti Djesu ainga aita zvese zvaidiwa na Mwari kuti aite. Mazuwa matatu masure me kufa ka Djesu, Djehovha akamumutsa no muiri we mwiya. (1 Pedru 3:18) Masure me masumana manganani, Djesu akahwirira kudenga. Iyena “akagara ku dii re muoko kwawo wa Mwari” uye akaetsera nguwa kwayo kuti azogare Mambo.—Ahebheru 10:12, 13.

22. Mukana upi watinawo nyamasi uno nge ndaa ye kugondeka kakaita Djesu kuna Baba ake?

²² Nge ndaa ye kugondeka kakaita Djesu kuna Baba ake, taano mukana wo kurarama nokusikaperi mu paradhizo pa nyika pano, maererano no zvaida Mwari pokutanga. Mu fundo inoteera ticafunda kuti rufu ra Djesu rinotibetsera kudini kuti tirarame nokusikaperi.