1. Tingafunda kupi nge zve ramangwana?

MAKAMBOONA here masoko paterevhizori, pedzepo morangarira kuti ‘Zviro zvicaguma kupi kudai?’ Kuri kuitika tsaona no zviro zvakashata maningi zvokuti anhu amweni anotenda kuti nyika yaakuda kupera. Ndizvodi kamare? Pane mushobo here wokuziya zvicaitika mberiyo? Honde. Kunyazi hazvo anhu aakwanisi kuona zviri mberi, Djehovha Mwari anokwanisa. Ayena anotibvunza mu Bhaibheri nge zve ramangwana redu ne zvicaitika no nyika.—Isaya 46:10; Tiyago 4:14.

2, 3. Afundi a Djesu aida kuziyei uye Djesu akaadaira kudini?

² Patinoerenga mu Bhaibheri nge zve kupera ke nyika, izvi azvidi kureya kupera ke Nyika yatinotsikei, asi kupera ke ushaishi. Djesu akafundisa anhu kuti Umambo wa Mwari ucazotonga nyika. (Ruka 4:43) Afundi ake aida kuziya kuti Umambo wa Mwari waizouya riini uye akabvunzisa Djesu kuti: “Zviro izvi zvicaitika riini, uye ngacipi cioneso cokuti maapo ne cokuti nyika yaakuda kupera?” (Mateu 24:3) Djesu aazi kuabvunza zuwa rakhona, asi akaabvunza zvaizoitika kana nyika yaadhuze kuda kupera. Zvaakabhuya kuti zvaizoitika zviri kuitika nyamasi uno.

³ Mu fundo ino, ticaona zvioneso zvinopangidza kuti zvino tiri kurarama dhuze-dhuze ne kupera ke nyika ino. Asi cekutanga, tinodikana kufunda nge zve hondo imweni yakaitika kudenga kuti tizwisise ngei zviro zvakashata kudai pa nyika pano.

4, 5. (a) Cinyi cakaitika kudenga Djesu paakandogara Mambo? (b) Maererano ne Zvakapangidzwa 12:12, cinyi caizoitika pa nyika mu masure mwekuti Sathani akhandirhwa pasi?

⁴ Mu Fundo 8 takafunda kuti Djesu akagara Mambo kudenga muna 1914. (Dhanyeri 7:13, 14) Bhuku re Zvakapangidzwa rinotibvunza zvakaitika: “Hondo yakatanga kudenga: Migeri [kureya Djesu] ne ngirozi dzake akarhwisa nyoka huru [Sathani], uye nyoka huru ne ngirozi dzayo akarhwisawo.” * Sathani ne madhimoni ake akanyiswa pa hondo iyona uye akakhandirhwa pa nyika. Cimborangarirai kupfara kakaita ngirozi! Asi zvakadiniwo ne anhu ari pa nyika? Bhaibheri rinobhuya kuti pa nyika paizodzara ne matambudziko. Ngei? Ngekuti Dhiyabhorosi akashatirhwa maningi, “eciziya kuti ane nguwa doko.”— Zvakapangidzwa 12:7, 9, 12.

⁵ Sathani Dhiyabhorosi ari kuita zviri zvese kuti pa nyika padzare ne matambudziko. Akanyangadzwa ngokuti ane nguwa doko yasara kuti Mwari amusunge. Ngationei zvakabhuya Djesu kuti zvaizoitika mu mazuwa okupedzesera.—Onai pakazwi Nyasai Kuzwisisa n.º 22.

6, 7. Uri kudzadzika kudini uphorofiti wa Djesu unobhuya nge zve hondo ne nzara?

⁶ Hondo. Djesu akati: “Ngokuti dzinza ricapurumukira dzinza rimweni uye umambo ucapurumukira umambo umweni.” (Mateu 24:7) Anhu akawanda akauraiwa mu hondo dziri kuitika mu mazuwa ano kupinda akauraiwa mu hondo dze kare. Sangano rimweni rinozwi Worldwatch Institute rinoita mabasa e kupsvakisisa nge zvinoitika mu nyika, rakabhuya kuti kubvira muna 1914 hondo  dzakauraya anhu anodarika mamirionji 100. Tikada kuezanisa anhu akauraiwa mu hondo pakati pe makore 1900 dakara 2000 anopeta katatu kese anhu akauraiwa kubvira muna 1900 kwenda sure. Cimborangarirai urombo ne kurhwadziwa kakaita zviuru ne zviuru zve anhu nge ndaa ye hondo!

⁷ Nzara. Djesu akati: “Kucazooneka nzara.” (Mateu 24:7) Kunyazi kecirimwa zvokurhya zvakawanda mazuwa ano kupinda kare, anhu akawanda aana cekurhya cinokwana. Ngei? Ngokuti aana mare inokwana kuti atenge zvokurhya kana munda kuti arime. Anhu anodarika bhirionji rimwe anorarama ne mare isikakwani dhorari rimwe pa zuwa. Sangano Rinoonerera nge zve Uthongo mu Nyika Yese (Organização Mundial de Saúde) rinobhuya kuti zviuru ne zviuru zve ana adoko anofa makore ese, maka-maka ngokutama zvokurhya zvinopasa uthongo.

8, 9. Zvinyi zvinopangidza kuti uphorofiti wa Djesu unobhuya nge zve zvigidhigidhi ne nhenda uri kudzadzika?

⁸ Zvigidhigidhi. Djesu akaphorofita: “Kunozooneka zvigidhigidhi zvikuru.” (Ruka 21:11) Zvigidhigidhi zvino simba zvinokarirhwa  kuti zvicaitika makore ese. Kubvira muna 1900, anhu anodarika mamirionji mairi akafa nge ndaa ye zvigidhigidhi. Kunyazi hazvo micini dze mazuwa ano dzecibetsera kuona zvigidhigidhi kucine nguwa, anhu aciri kufa basi.

⁹ Nhenda. Djesu akaphorofita kuti kucaoneka “nhenda dzakawanda.” Nhenda dzino ngozi dzaizobararika nokukasika no kuuraya anhu akawanda. (Ruka 21:11) Kunyazi hazvo arapi aakukwanisa kurapa nhenda dzakawanda, asi kucine nhenda dzimweni dzisikarapiki. Zvirokwazvo, masoko amweni akabudiswa anopanganidza kuti makore ese zviuru ne zviuru zve anhu anofa nge ndaa ye nhenda, dzakaita hingana cikotsorhwa, nhenda ye mujararira no korera. Andizvopi basi, arapi akaona nhenda dzimweni dzipsva dzinokwana 30, dzimweni dzakhona dzisikarapiki.

10. Uphorofiti uri pana 2 Timoti 3:1-5 uri kudzadzika kudini mazuwa ano?

¹⁰ Pana 2 Timoti 3:1-5, Bhaibheri rinoti: “Mu mazuwa okupedzesera kucazooneka nguwa  dzinonesa, dzinoshupa kushingirira.” Muphostori Pauro akapanganidza maitiro aizoita anhu akawanda mu mazuwa okupedzesera. Akareketa kuti anhu aizogara

• anodzida

• anodisa mare

• asikazwiri madzibaba awo

• asikathembeki

• asina rudo ne mhuri

• asikadzibati

• anoda zvemadziyo uye anothyisa

• anoda zvinopfadza nyama kupinda kuda Mwari

• anoita hingana anoda Mwari asi asikamuzwiri

11. Maererano no Pisarema 92:7, cinyi cicaitika no anhu akashata?

¹¹ Anhu akawanda kamunogara ano maitiro akadaiwo here? Mu nyika yese, anhu akawanda ndizvo zvaari. Asi mbai-mbai pano Mwari acazvigadzirisa. Ayena anogondesa kuti: “Anhu akashata paanomera hingana shango, uye ashaishi ese paanotumbuka, zvinonga zveciitika kuti atsakatiswe nokusikaperi.”—Pisarema 92:7.

12, 13. Djehovha anosotifundisei mu mazuwa ano okupedzesera?

¹² Bhaibheri rakaphorofita kuti mu mazuwa okupedzesera, nyika yaizodzara ne matambudziko no zviro zvinorhwadza. Asi rakabhuya kuti kaizoitikawo zviro zvakanaka.

¹³ Kuzwisisa Bhaibheri. Muphorofiti Dhanyeri akatara nge zve mazuwa okupedzesera. Iyena akati: “Ruziyo re zvirokwazvo ricawanda.” (Dhanyeri 12:4) Djehovha aizobetsera anhu ake kuzwisisa Bhaibheri ngo mushobo usikazi kumboitikazve. Djehovha akaita izvona maka-maka kubvira muna 1914. Ngo muezaniso, takafunda kukura kakaita zina rake ne zvaanoda ku nyika, zvirokwazvo ngo pamusoro pe rusudzunuro, cinoitika patinofa uye rumuko. Takafunda kuti Umambo wa Mwari ndiwo basi unokwanisa kupedza matambudziko. Uyezve takafunda zvatinodikana kuita kuti tipfare mu upenyu ne zvatingaita kuti tipfadze Mwari. Hino aseenzi a Mwari anoitei ne zvaanofunda? Uphoroti umweni unodaira.—Onai pakazwi Nyasai Kuzwisisa n.º 19 23.

14. Masoko akanaka e Umambo ari kuparidzwa kupi, uye ndiyani ari kuaparidza?

¹⁴ Basa re kuparidza mu nyika yese. Ecibhuya nge zve mazuwa okupedzesera, Djesu akati: “Aya masoko akanaka e Umambo acaparidzwa mu nyika yese inogarhwa.” (Mateu 24:3, 14) Masoko akanaka e Umambo ari kuparidzwa mu nyika dzinodarika 230 uye mu mareketero anodarika 700. Zvirokwazvo, mu nyika yese Apupuri a Djehovha anobva “mu nyika ne madzinza ese” ari kubetsera anhu kuzwisisa cinyi cinozwi Umambo wa Mwari ne zvaucaitira anhu. (Zvakapangidzwa 7:9) Uye awona anoita izvi nyore. Kunyazi ecizondwa ne kushuphwa ne anhu akawanda,  apana cingakwanisa kuimisa basa re kuparidza, hinga zvakarekethwa na Djesu.—Ruka 21:17.

15. (a) Munotenda here kuti tiri kurarama mu mazuwa okupedzesera, uye ngei mecidaro? (b) Cinyi cicaitika kune aya anozwira Mwari ne kune aya asikamuzwiri?

¹⁵ Munotenda here kuti tiri kurarama mu mazuwa okupedzesera? Uphorofiti wakawanda we Bhaibheri unoreketa nge zve mazuwa okupedzesera uri kudzadzika. Mbai-mbai pano, Djehovha acada kuimisa basa re kuparidza masoko akanaka, zvadaro ‘kupera ke nyika’ kucaguma. (Mateu 24:14) Kupera ke nyika cinyi? Ndi hondo ye Amagedhoni, Mwari paacapedza ushaishi wese. Djehovha acaseenzesa Djesu ne ngirozi dzake dzino simba kuti aparadze ese anoramba kupurutana Iyena ne Mwana wake. (2 Atesaronika 1:6-9) Mu masure mwazvo, Sathani no madhimoni ake aazocengedzerizve anhu. Uye ese aya anoda kuzwira Mwari ne kutenda kutongwa no Umambo wake acaona zvipikirhwa zvese zva Mwari zvecidzadzika.—Zvakapangidzwa 20:1-3; 21:3-5.

16. Zvecioneka kuti nyika yaadhuze kuda kupera, munodikana kuitei?

¹⁶ Nyika ino inotongwa na Sathani mbai-mbai pano icapera. Hino, zvakanaka maningi kudzibvunzisa kuti, ‘Ndinodikana kuitei?’ Djehovha anoda kuti muite zvese zvamunokwanisa kuti mufunde zvakawanda mu Bhaibheri. Munodikana kubatisisa no nyara mbiri fundo yenyu ye Bhaibheri. (Juau 17:3) Apupuri a Djehovha ano misangano masumana ese kuti abetsere anhu kuzwisisa Bhaibheri. Edzai kupinda misangano iyona nguwa dzese. (Erengai Ahebheru 10:24, 25.) Kana mukaona kuti pane pamunodikana kucinja, musanonoke kuzviita. Pamucaita  izvi ushamwari wenyu na Djehovha ucabambirira kukura.—Tiyago 4:8.

17. Ngei kupera ke nyika kucaita zvecibvumbu kune anhu akawanda?

¹⁷ Muphostori Pauro akapanganidza kuti kuparadzwa ke anhu akashata kaizouya pa nguwa isikakarirhwi ne anhu akawanda, “hingana magumire anoita mbavha usiku.” (1 Atesaronika 5:2) Djesu akaphorofita kuti anhu akawanda aizoramba zvioneso zvekuti tiri kurarama mu mazuwa okupedzesera. Iyena akati: “Ngokuti hinga zvainga zvakaita mazuwa a Nowa, ndizvo zvicaitikawo pa kuuya ke Mwana we munhu. [kana mazuwa okupedzesera]. Ngokuti hinga zvaiita mu mazuwa awona Ndambi huru isati yauya, airhya no kumwa, anarume eciwaka uye anakadzi eciwakwa, dakara zuwa rakapinda Nowa mu ngarawa, uye awona aatozi kuzvirangarira dakara Ndambi huru yauya ikaaeredza ese, ndizvo zvicaitikawo pa kuuya ke Mwana we munhu.”—Mateu 24:37-39.

18. Ngwadzo ipi yatakapaswa na Djesu?

¹⁸ Djesu akatingwadza kuti tisagare takakanganwa nge ndaa ye “kurhyisa, kumwisa ne kudzirhya mwoyo nge ndaa ye zvineso zve upenyu.” Iyena akareketa kuti kupera ke nyika kucauya zvecibvumbu, “hingana murau.” Akareketazve kuti kucazira “anhu ese anogara pa nyika.” Hino akatunhudzira kuti: “Rumbwai makamuka, uye rumbwai meciita minamato yo kudeketera kuti mukwanise kupukunyuka pa zvese izvi zvinodikana kuitika uye mukwanise kuimira pamberi pe Mwana we munhu.” (Ruka 21:34-36) Ngei zvakanaka maningi kuzwa ngwadzo ya Djesu? Ngokuti mbai-mbai pano nyika yakashata ya Sathani icatsakatiswa. Aya basi anotenderhwa na Djehovha na Djesu acapona pa mugumo uye acararama nokusikaperi mu nyika ipsva.—Juau 3:16; 2 Pedru 3:13.