1, 2. Djehovha anoda kuti mhuri dzidini?

DJEHOVHA MWARI ndiye akaitisa mucato wokutanga. Bhaibheri rinotibvunza kuti Djehovha akasika mwanakadzi wokutanga uye “Akamuunzisa ku mwanarume.” Adhamu akapfara maningi zvokuti akati: “Uu igodo re makodo angu ne nyama ye nyama yangu.” (Genesi 2:22, 23) Izvi zvinotipangidza kuti Djehovha anoda kuti anhu apfare mu mucato.

² Zvinotsukwarisa kuziya kuti anhu akawanda aasati amboraira kuya kunozwi kupfara mu mhuri dzawo. Asi Bhaibheri rino mazano akawanda anokwanisa kubetsera munhu wese ari mu mhuri kuti aite paanokwanisa kuti mhuri igare yakabatana uye kuti apfare ese.—Ruka 11:28.

3, 4. (a) Mwamuna anodikana kubata kudini mukadzi wake? (b) Ngei zvakanaka kuti mwamuna no mukadzi aziye kurekererana?

³ Bhaibheri rinobhuya kuti mwamuna akanaka anoda uye anoreremedza mukadzi wake. Tapota erengai Aefeso 5:25-29. Mwamuna anodikana kubata zvakanaka mukadzi wake nguwa dzese. Anodikanawo kumudziirira, kumucengeta uye kusamuitira ciro cinomurhwadzisa.

⁴ Asi mwamuna anodikana kuitei kana mukadzi wake akamushaishira? Amuna anobvunzwa kuti: “Rumbwai mecida akadzi enyu uye musaabate ne hasha.” (Akorosi 3:19) Amuna, munodikana kuziya kuti munoshaishawo. Uye kana mecida kuti Mwari amurekererei,  munodikanawo kurekerera mukadzi wenyu. (Mateu 6:12, 14, 15) Kana mwamuna no mukadzi eciziya kurekererana, izvi zvicaita kuti apfare mu mucato wawo.

5. Ngei mwanarume anodikana kureremedza mukadzi wake?

⁵ Djehovha anoda kuti mwamuna areremedze mukadzi wake. Mwamuna anodikana kupsvaka kuziya zvinoda mukadzi wake. Zvakanaka maningi kuita izvona. Ngokuti kana mwamuna akatama kubata zvakanaka mukadzi wake, Djehovha angaramba kupurutana minamato yake. (1 Pedru 3:7) Zvinoita kuti munhu apfarirhwe na Djehovha kumuda kaanomuita. Kaari azvina ndaa kuti mwanarume here kana mwanakadzi.

6. Zvinoreyei kuti mwamuna no mukadzi ‘inyama imwe’?

⁶ Djesu akabhuya kuti mwamuna no mukadzi “asisiripizve airi, asi nyama imwe.” (Mateu 19:6) Izvi zvinoreya kuti anodikana kugondeka kuno umwe ne umwe uye kuti aamboendi kunza. (Zvierengo 5:15-21; Ahebheru 13:4) Mwamuna ne mukadzi anodikana kugara ne cido ce kupfadza umweni panyaya dze bonde. (1 Akorinti 7:3-5) Mwamuna anodikana kuedzurira kuti “apana munhu akambozonda muiri wake, asi anoupasa zvokurhya uye anoucengeta.” Ngokudaro mwamuna anodikana kuda no kucengeta mukadzi wake. Cinonyanya kudiwa no mukadzi ndecekuti mwamuna wake amude uye amubate zvakanaka.—Aefeso 5:29.

7. Ngei mhuri inoda munhu anoitungamirira?

⁷ Mhuri yese inoda munhu anoitungamirira kuti iseenze pamwepo zvakanaka. Pana 1 Akorinti 11:3: Bhaibheri rinoti: “Musoro we mwanarume wese ndi Kristu; uye musoro we mwanakadzi mwanarume; uye musoro wa Kristu ndi Mwari.”

8. Mukadzi angapangidza kudini rureremedzo rikuru ku mwamuna wake?

 ⁸ Mwamuna wese anoshaisha. Asi kana mukadzi ecibetsera zvinonga zvasanangurhwa no mwamuna wake uye eciseenza pamwepo naye, izvi zvicabetsera mhuri yese. (1 Pedru 3:1-6) Bhaibheri rinoti: “Mukadzi anodikanawo kureremedza mwamuna wake zvikuru.” (Aefeso 5:33) Asi kana mwamuna asikatendi zvinotendwa no mukadzi? Kunyazi zvakadaro anodikana kumureremedza basi. Bhaibheri rinoti: ‘Imwi anakadzi dzikandei pasi pe mwamuna wenyu, kuitira kuti kana pane asikatorhwi no soko ra Mwari, agume pakutorhwa pasina soko rarekethwa, nge ndaa yezviito zve mukadzi wake, ngokuti anonga adzionera ega zviro zvakanaka zvamunoita pamwepo no kureremedza kukuru.’ (1 Pedru 3:1, 2) Muezaniso wakanaka wo mukadzi ungakwanisa kuita kuti mwamuna wake amuzwisise uye areremedze zvaanotenda.

9. (a) Mukadzi angaitei kana asikatenderani no zvinonga zvarekethwa no mwamuna wake? (b) Mazano api anopaswa akadzi pana Tito 2:4, 5?

⁹ Mukadzi angaitei kana asikatenderani no zvinonga  zvarekethwa no mwamuna wake? Angapasa hake maonero ake, asi anodikana kuzviita no rureremedzo. Ngo muezaniso, Sara akambopasawo maonero ake kuna Abrahamu. Kunyazi zvisikazi kudakadza Abrahamu, Djehovha akati kaari: “Izwa zvaari kureketa.” (Genesi 21:9-12) Akajinjipi mwamuna weciKristu kusanangura zvinopesana no zvinorekethwa no Bhaibheri, ndiyo ndaa mukadzi anodikana kumubetsera. (Zviito 5:29; Aefeso 5:24) Mukadzi akanaka anocengeta mhuri yake. (Erengai Tito 2:4, 5.) Mwamuna ne ana paanoona kuseenza kaanoita no simba, acabambirira kumuda no kumureremedza.—Zvierengo 31:10, 28.

10. Bhaibheri rinotii nge ndaa ye kumbosiyana no kurambana?

¹⁰ Nguwa dzimweni mwamuna no mukadzi anogogomera kumbosiyana kana kurambana. Asi Bhaibheri rinoti “Mukadzi aadikani kusiyana ne mwamuna wake” uye kuti “mwamuna aadikani kusiya mukadzi wake.” (1 Akorinti 7:10, 11) Pane zvingakwanisa hazvo kuita kuti mwamuna no mukadzi ade kumbosiyana, asi zvinoda kunyasa kurangarirhwa. Zvakadiniwo no kurambana? Bhaibheri rinopangidza kuti ndaa imwe basi inotendera kuti mwamuna no mukadzi arambane ndeyekuti kana umwe wawo aita upombwe.—Mateu 19:9.

11. Ana anodei maka-maka kupinda zvese zvamungaapasa?

¹¹ Madzibaba, torai nguwa yakawanda ne ana anyu. Ana enyu anoda kugara nemwi, uye kupinda zvese ana enyu anoda kufundiswa nge zva Djehovha.—Dheuteronomiyo 6:4-9.

12. Madzibaba anodikana kuitei kuti adziirire ana awo?

¹² Nyika ya Sathani iri kubambirira kushata, uye pane anhu amweni angada kukuwadza ana edu, kana kutoda  kuwadzipa. Madzibaba amweni anopsveruka kureketa ne ana awo nge ndaa yazvo. Asi madzibaba anodikana kungwadza ana awo uye kuafundisa zvaangaita kuti asacengedzwe ne anhu akadaro. Madzibaba, munodikana kudziirira ana enyu. *—1 Pedru 5:8.

13. Madzibaba anodikana kufundisa kudini ana awo?

¹³ Madzibaba ano mutoro wo kufundisa ana awo kuti agare ana akapangwa. Mungazviita maitirei? Ana enyu anoda kupangwa, asi kana meciapangira amudikani  kuita zve bvinga kana zve hasha. (Djeremiya 30:11) Ngokudaro musazopangire ana enyu pamunenge muno shungu. Masoko enyu aadikani kugara ‘anobaya hingana banga’ mowarhwadzisa. (Zvierengo 12:18) Fundisai ana enyu kuti azwisise kuti ngei ecidikana kutondoedza.—Aefeso 6:4; Ahebheru 12:9-11; onai pakazwi Nyasai Kuzwisisa n.º 28.

14, 15. Ngei ana anodikana kuzwira madzibaba awo?

¹⁴ Djesu aigara ecizwira Baba ake nguwa dzese, kunyazi pazvainga zvisiripi nyore. (Ruka 22:42; Juau 8:28, 29) Djehovha anodawo kuti ana azwire madzibaba awo.—Aefeso 6:1-3.

¹⁵ Ana, kunyazi kana meciona hingana zvinoshupha kuzwira madzibaba enyu, edzurirai kuti kana mukaazwira, Djehovha ne madzibaba enyu acamupfarirai. *—Zvierengo 1:8; 6:20; 23:22-25.

16. (a) Sathani anoedza kudini madjaha kuti aite zvakashata? (b) Ngei zvakanaka maningi kusanangura shamwari dzinoda Djehovha?

¹⁶ Dhiyabhorosi angakwanisa kuseenzesa shamwari dzenyu kana madjaha amweni kuti amuedzei kuti muite zvakashata. Anoziya kuti miyedzo yakadaro inoshupha kuti muirambe. Ngo muezaniso, mwana wa Djakobo, Dhina, ainga ane shamwari dzisikadi Djehovha. Izvi zvakabara matambudziko akakura kaari no mhuri yake. (Genesi 34:1, 2) Kana ukatamba ne anhu asikadi Djehovha, angakwanisa kukuedza kuti uite zvinozondwa naye, zvakadaro zvozobara matambudziko kauri ne mhuri yako  uye worwadzisa Mwari. (Zvierengo 17:21, 25) Ndiyo ndaa zvakanaka maningi kuti utambe ne shamwari dzinoda Djehovha.—1 Akorinti 15:33.

17. Munhu wese ari mu mhuri anodikana kuitei?

¹⁷ Kana anhu ari mu mhuri akatondoedza mazano a Mwari, anonzvega matambudziko akawanda. Hino kana muri mwamuna idai mukadzi wenyu uye mubatei zvakanaka. Kana muri mukadzi, reremedzai uye dzikandei pasi pe mwamuna wenyu meciteedzera mukadzi akanaka anorekethwa pana Zvierengo 31:10-31. Kana muri madzibaba, fundisai ana enyu kuda Mwari. (Zvierengo 22:6) Kana muri baba, tungamirirai mhuri enyu “zvakanaka.” (1 Timoti 3:4, 5; 5:8) Uye ana, izwirai madzibaba enyu. (Akorosi 3:20) Edzurirai kuti munhu wese ari mu mhuri anoshaisha, zvakadaro dzidodokesei uye kumbiranai rurekerero. Zvirokwazvo, Bhaibheri rino mazano anobetsera munhu wese ari mu mhuri.