1, 2. Ngadzipi mibvunzo dzatinoita nguwa dzimweni?

ANA adoko anoita mibvunzo dzakawanda. Ngo muezaniso, patinoedza kuafundisa ciro, kajinji tinosoazwa ecibvunzisa: ‘Ngei?’ Uye patinoadaira, pamweni angaphindazve kubvunzisa kuti: ‘Asi ngei?’

² Azvinei kuti tiri madjaha here kana anhu akuru, tese tinoita mibvunzo ngokuti zviripo zvatiri kuda kuzwisisa. Nguwa dzimweni tinoita mibvunzo yakaringana no zviro zve zuwa no zuwa, hingana kuda kuziya nguwa kana kuda kuziya mutengo we zviro. Nguwa dzimwenizve tino mibvunzo inonyanya kudikanwa, yakaringana no upenyu uye ramangwana redu. Asi mibvunzo padzinotisiya tino zvatisikazi kuzwisisa pamweni tinorekera kuita mibvunzo.

3. Anhu amweni anorangarirei ngo pamusoro pe kupsvaka mhinduro dze Bhaibheri?

³ Tingadzigumira kupi mhinduro dze mibvunzo dzinodikanwa dzatinoita? Anhu amweni anorangarira kuti mhinduro pamweni dzirimo mu Bhaibheri, asi kuti Bhaibheri rinoshupha kuzwisisa. Pamweni anorangarira kuti mapadre, mapastori no afundisi e magereja ndiwo basi anokwanisa kudaira mibvunzo idzi. Amweni anopsveruka kubhuya kuti aazii mhinduro dzakhona. Kodi imwimwi, munotiwo kudini?

4, 5. Mibvunzo ipi yamunayo yamunoda maningi kuziya? Ngei musikadikani kuremba kupsvaka mhinduro dze minbvunzo idzona?

⁴ Pamweni makamborangarira pamusoro pe mibvunzo ii: Kodi upenyu unoperera basi pakubarhwa, kukura no kufa here? Kana munhu akafa anorumbwa ecirarama ku mbuto imweni here? Mwari akaita kudini? Zve zvirokwazvo maizoda kuziya mhinduro dze mibvunzo idzi. Djesu, Mufundisi  anozikanwa maningi akati: “Rumbwai mecipsvaka, uye mucagumira.” (Mateu 7:7) Kurumbwa kunoreya kuenderera mberi musikarembi. Hino, musarembe kupsvaka dakara madzigumira mhinduro dze zvirokwazvo.

⁵ Kana ‘mukarumbwa mecipsvaka,’ zve zvirokwazvo mucadzigumira mhinduro. Idzona dzirimo mu Bhaibheri. (Zvierengo 2:1-5) Mhinduro dzakhona adzishuphi kuzwisisa. Idzona dzicamubetserai kuti mupfare zvino uno uye kuti mugare no kariro ye ramangwana rakanakisisa. Zvakadini hino kutanga no mubvunzo unoizwa kajinji no anhu?

6. Ngei anhu amweni anorangarira kuti Mwari aana basa ne kushuphika kuri kuita anhu?

⁶ Anhu ajinji anorangarira kuti Mwari aana basa ne anhu. Ngei anorangarira kudaro? Ngokuti mu nyika makadzara nge hondo, uzondi uye urombo. Anhu anorhwara, anoshuphika uye anofa. Awona anorangarira kuti kudai Mwari ecidadi kamare anhu, nyika yaidapi kugara mushobo yairi nyamasi uno. Hino anobvunzisa kuti: ‘Kudai Mwari ecitirangarira kamare, ngei aapedzi kushuphika kwese?’

7. (a) Kana pakaitika ciro cakashata atungamiriri e magereja kajinji anotii? (b) Ngei izvi zvinoita kuti anhu arangarire kuti Mwari ano mwoyo wakashata? (c) Tinoziya kudini kuti Mwari aana ndaa kana pakaitika ciro cakashata?

⁷ Kana pakaitika ciro cakashata, atungamiriri e magereja anoti: Mwari aita kuda kake. Izvi zvinoita kuti anhu arangarire kuti Mwari ano mwoyo wakashata, ngokuti azvizi kusiyana no kureketa kuti zviro izvona zviri kuitika nge ndaa yake. Asi Mwari narini anomboitisa zviro zvakashata. Tinoziya kudini kuti Mwari aana ndaa? Mu tsamba iri kuna Tiyago 1:13 Bhaibheri rinoreketa kuti Mwari aaedzi kutenda ke munhu ngo zviro zvakashata. Tsambeyo inoti: “Munhu paanonga ari pa muedzo, ngaasazobhuye kuti: ‘Ndiri kuedzwa na Mwari.’ Ngokuti apana munhu angaedza Mwari  ngo zviro zvakashata, uye iyena aaedzi munhu.” Zvirokwazvo kuti Mwari ari kuona zviro zvakashata zveciitika. Asi andiepi ari kuitisa kuti zviro izvona zviitike. (Erengai Djobho 34:10-12.) Ngatizwisise izvi ngo mwazvo.

8, 9. Ngano ye mwana anopomoka pa nyumba inotipangidza kudini kuti azvizi kunaka kupumha Mwari nge ndaa ye matambudziko edu?

⁸ Rangarirai nge zve baba anoda maningi Mwana wawo uye akamufundisa kuti asanangure kuita zviro zvakanaka mu upenyu wake. Asi mwanewo akazokura opandukira baba ake. Akapomoka pa nyumba otanga kuita zviro zvakashata opinda mu matambudziko akawanda. Mu maonero enyu, zvakanaka here kupa ndaa babewo ngokuti aazi kurambidza mwana wawo kubuda pa nyumba? Zviri pamhene kuti haiwa! (Ruka 15:11-13) Kuita hingana ngano ii, anhu ndiwo akasanangura kuramba kuzwira Mwari, ndiyo ndaa keciitika matambudziko akawanda. Hino, azvizi kunaka kupumha Mwari. Ngei? Ngokuti Mwari andiepi anoitisa zviro zvakashata.

⁹ Hino, ngei Mwari asikapedzi zviro zvakashata? Ciripo ciro cakanaka cinoita kuti amboimire. Mu Fundo 11 yo bhuku rino, mucafunda zvinorekethwa ngo Bhaibheri ngo pamusoro paco. Asi garai makathemba kuti Mwari anotida, uye narini anoita kuti tishuphike. Kubhuya cokwadi, ndiye basi anokwanisa kupedza matambudziko edu.—Isaya 33:2.

10. Tinoziya kudini kuti Mwari acapedza zviro zvese zviri kuizwa no anhu akashata?

¹⁰ Mwari anokwanisa kupedza zviro zvese zvakashata uye ndizvo zvaacaita. Tinoziya izvona ngokuti Bhaibheri rinobhuya kuti Mwari mucena. (Isaya 6:3) Izvi zviri kuda kureya kuti zvese zvaanoita zvakacenesesa uye zvakanaka. Hino ngatimugondei hedu. Asi anhu kajinji aathembeki. Kajinji anoita zviro zvakashata. Kunyazi mutongi akanyanya kuthembeka mu nyika aatonawo simba rokupedza zvese  zvinoizwa no anhu akashata. Mwari ndiye basi ano simba rokuita izvona. Acapedza ushaishi nokusikaperi.—Erengai Pisarema 37:9-11.

11. Mwari anozwa kudini paanotiona tecishuphika?

¹¹ Mwari aadakadzwi ngo kuona zviri kuitika mu nyika ino uye aadakadzwizve ngo kutiona tecishuphika. Bhaibheri rinobhuya kuti Mwari “anoda unatsi.” (Pisarema 37:28) Izvi zvinopangidza kuti Mwari anodakadzwa no zviro zvakanaka uye kuti aadakadzwi no zviro zvakashata. Bhaibheri rinoreketa kuti kareko Mwari ‘akatsukwara’ paakaona nyika yainga yadzara nge ushaishi. (Genesi 6:5, 6) Uye Mwari aazi kucinja. (Marakiya 3:6) Anozonda kuona anhu ecishuphika. Mwari anomurangarirai kamare.—Erengai 1 Pedru 5:7.

12, 13. (a) Ngei tinotsukwara patinoona anhu ecishuphika? (b) Ngei tecithemba kuti Mwari acapedza kushuphika no udzvinyiriri?

¹² Cinyi cinotibetsera kuona kuti Mwari anorangariradi anhu? Rangarirai basi kutsukwara katinoita kana tikaona anhu ecishuphika. Ngei tinotsukwara kudaro? Ngokuti Mwari akatisika no mugariro wakatodzana no wake. (Genesi 1:26) Hino kutsukwara katinoita patinoona anhu asina ndaa ecishuphika, kunotigondesa kuti Mwari anotsukwarawo maningi kutopinda isusu!

¹³ Zvese zvinoizwa na Mwari zvinotungamirirwa no rudo. Bhaibheri rinoreketa kuti “Mwari rudo.” (1 Juau 4:8) Isusu tinaroo rudo. Kudai tainga tino simba rekupedza matambudziko ese, taida kuzviita, andizvopi? Hino ngatithembe hedu kuti Mwari acapedza kushuphika kwese no udzvinyiriri ngokuti anoda anhu. Iyena anaro simba rokuita izvona. Zvipikirhwa zva Mwari zvamaona pa mapajina okutanga e bhuku rino zvicaitika. Asi kuti muthembe mu zvipikirhwa izvona, pane zvamunodikana kuziya nge zva Mwari.

14. Zina ra Mwari ndiani? Tinozviziya kudini kuti tinodikana kuseenzesa zina irona?

¹⁴ Kana mecida kushamwaridzana no munhu, ngacipi ciro cokutanga camunomubvunza? Zina renyu. Kodi Mwari ano zina here? Magereja akawanda anofundisa kuti zina rake ndi Mwari kana Tenzi. Asi, masoko aya amazinapi. Ndi madainzire okureremedza, hingana “mambo” uye “mutungamiriri.” Madainzire okureremedza aya, anopangidza basi zvaari munhu kana kuti basa raanoita. Mwari anoda kuti mumuziye uye kuti museenzese zina rake. Tinozviziya kudini izvona? Mu Bhaibheri, Mwari anobhuya kuti zina rake ndi Djehovha. Pisarema 83:18 inoti: “Kuti anhu aziye kuti imwimwi, muno zina rokuti Djehovha, imwimwi basi ndimwi we Kumusoro-soro kumusoro ke nyika yese.” Atari e Bhaibheri akaseenzesa zina ra Mwari zvinodarika 7000. Mwari akabhuya zina rake. Akaita izvi ngokuti anoda kuti mugare shamwari yake.

15. Zina rokuti Djehovha rinoreyei?

¹⁵ Zina ra Mwari, Djehovha, rinoreya zviro zvikuru maningi. Zina rokuti Djehovha rinoreya kuti Mwari anokwanisa kudzadzisa zvese zvaakagondesa uye anokwanisa kuitisa zvese zvaanoda. Apana cinokwanisa  kumupingidzira. Ndiye basi akasisira kuseenzesa zina rokuti Djehovha. * Ngei?

16, 17. Bhaibheri rinonga riri kuda kubhuyei parinodainza Mwari kuti: (a) “we Masimba ese?” (b) “Mambo asina mugumo”? (c) “Musiki”?

¹⁶ Maererano no zvataerenga, Pisarema 83:18 inobhuya kuti Djehovha ‘ndiye basi we Kumusoro-soro kumusoro ke nyika yese.’ Uye pa Zvakapangidzwa 15:3, Bhaibheri  rinodainza Djehovha kuti we Masimba ese uye Mambo asina mugumo. Tsambeyo inoti: “Djehovha Mwari we Masimba ese, mabasa enyu makuru uye anoshamisa. Makwanza enyu nge e unatsi uye e zvirokwazvo, Mambo asina mugumo.” Soko rokuti “we Masimba ese” riri kuda kubhuyei? Soko iri riri kuda kubhuya kuti Djehovha ndiye ano simba rakakura kupinda munhu upi hake kudenga kana pa nyika. Uyezve soko rokuti “Mambo asina mugumo” riri kuda kubhuya kuti kubvira no kare-kareko Djehovha andoriyo. Pisarema 90:2 inopangidza kuti iyena ndi Mwari kubvira nariini dakara nariini. Izvi zvinoshamisa!

¹⁷ Kupinda izvi, Djehovha basi ndiye Musiki. Zvakapangidzwa 4:11 inoti: “Djehovha, Mwari wedu, makasisira kuti mutambire kukudzwa, no kureremedzwa no simba, ngokuti makasika zviro zvese, uye ngokuda kenyu zviripo uye zvakasikwa.” Cimborangarirai basi: Ngirozi no nyeredzi dze kudenga,  micero iri mu miti no howe dziri mu mvura, zvese zvamunokwanisa kurangarira zvakasikwa na Djehovha!

18. Ngei anhu amweni anorangarira kuti atizogumi pakugara shamwari ya Mwari? Asi Bhaibheri rinobhuyei?

¹⁸ Anhu amweni anothya paanoerenga zvinobhuya Bhaibheri nge zve ukuru wa Mwari unoshamisa. Anorangarira kuti atizogumi pakugara shamwari ya Mwari. Awona anorangarira kuti: ‘Mwari ano simba uye mukuru maningi! Uye ari kure na isusu! Ngei aizondirangarirawo kamare?’ Mwari aadi kuti tirangarire kudaro. Djehovha anoda kugara shamwari yedu. Bhaibheri rinobhuya kuti Mwari aaripi “kure na umwe na umwe wedu.” (Zviito 17:27) Mwari anoda kuti mukhwedere dhuze naye uye anogondesa kuti ‘acakhwederawo dhuze na imwimwi.’—Tiyago 4:8.

19. (a) Cinyi camunodikana kuita kuti mugare shamwari ya Mwari? (b) Ndiapi mawara a Djehovha amunonyanya kuda?

¹⁹ Cinyi camunodikana kuita kuti mugare shamwari ya Mwari? Kuti mugare shamwari ya Mwari uye kuti muone upenyu usikaperi, munodikana kuziya Djehovha na Mwana wake, Djesu. Djesu akati: “Kuti aone upenyu usikaperi anodikana kuguma pakumuziyai, imwimwi Mwari umwe basi we zvirokwazvo, na uya wamakatuma, Djesu Kristu.” (Juau 17:3) Hino, rumbwai mecifunda nge zva Mwari. Ngo muezaniso, taona kuti “Mwari rudo.” (1 Juau 4:16) Asi ayena ano mawara amweni akawanda. Bhaibheri rinobhuya kuti Djehovha ano “usisi ne nyasha, anonoka kutsamwa uye akadzara no rudo risikacinji, no cokwadi.” (Ekisodho 34:6) Djehovha akanaka uye ‘akagadzirira kutirekerera.’ (Pisarema 86:5) Uyezve Mwari akathembeka. (2 Pedru 3:9; Zvakapangidzwa 15:4) Mucafunda zvakawanda nge zve mawara ake akarungama kana mukarumbwa mecierenga Bhaibheri.

20-22. (a) Mungakhwedera kudini dhuze na Mwari zvamusikamuoni? (b) Cinyi camusikadikani kusiya kuti ciitike?

 ²⁰ Mungakhwedera kudini dhuze na Mwari zvamusikamuoni? (Juau 1:18; 4:24; 1 Timoti 1:17) Pamunoerenga nge zva Djehovha mu Bhaibheri, munoguma pakumuziya hinga Munhu kamare. (Pisarema 27:4; Aroma 1:20) Kana mukarumbwa mecifunda nge zva Djehovha, mucabambirira kumuda uye mucabambirira kukhwedera dhuze naye.

²¹ Mucazwisisa kuti Djehovha ndi Baba edu. (Mateu 6:9) Pane kutipasa upenyu basi, anodawo kuti tigare no upenyu wakanakisisa. Izvi ndizvo kamare zvinodiwa na baba ane rudo ne ana ake! (Pisarema 36:9) Bhaibheri rinobhuya kuti zvinoita kugara shamwari ya Djehovha. (Tiyago 2:23) Cimborangarirai basi! Djehovha Musiki we zviro zvese, anoda kuti mugare shamwari yake.

²² Pamweni anhu amweni angada kuti musiye kufunda Bhaibheri. Pamweni anonga ecithyira kuti mucacinja gereja. Asi musasiye kuti munhu upi hake amupingidzei kugara shamwari ya Djehovha. Apana ushamwari umweni unopinda ushamwari wenyu na Mwari.

23, 24. (a) Ngei munodikana kurumbwa meciita mibvunzo? (b) Mu fundo inoteera ticafundei?

²³ Pamunonga mecifunda Bhaibheri, pamweni amuzozwisisi zvese pokutanga. Musapsveruke kukumbira kubetserhwa. Djesu akareketa kuti tinodikana kudzidodosa hinga ana adoko. (Mateu 18:2-4) Ana adoko anoita mibvunzo yakawanda. Hino rumbwai meciita mibvunzo kuitira kuti muzwisise zvamuri kufunda. Mwari anoda kuti muone mhinduro. Ndiyo ndaa, fundai Bhaibheri makateya nzee kuti mugare no rugondo rekuti zvamuri kufunda i zvirokwazvo.—Erengai Zviito 17:11.

²⁴ Kufunda Bhaibheri ndiro gwanza rakanakisisa kuti tiziye Djehovha. Mu fundo inoteera, ticafunda kuti, ngei Bhaibheri rakasiyana no mabhuku ese amweni.