1, 2. Anhu akawanda anobvunzisa kutii?

TSUNAMI inotsakatisa thaundi rese. Mwanarume umweni anoridza pfuti mu gereja eciuraya no kukuwadza anhu akawanda. Nhenda ye kanseri inouraya mai we ana, ecisiya nherera shanu.

² Panoitika ngozi kana matambudziko akadai, anhu akawanda anobvunzisa kuti ngei matambudziko akadai eciitika. Anhu akawanda anobvunzisa kuti ngei pa nyika pakadzara no uzondi uye matambudziko. Kodi makambodzibvunzisawo here?

3, 4. (a) Abhakuki akabvunzisei? (b) Djehovha akamudaira kudini?

³ Mu Bhaibheri, tinofunda kuti anhu ainga ano kutenda kakabamba kuna Mwari akaitawo mibvunzo yakadaro. Ngo muezaniso, muphorofiti Abhakuki akabvunzisa Djehovha kuti: “Ngei meciita kuti ndione zvakashata? Ngei mecindosiya udzvinyiriri weciitika? Ngei ndinondogara ndeciona kutsakatiswa ke zviro no ubhinya? Uye ngei pane kureketedzana ne kushuphana kakanyanyisa kudai?”—Abhakuki 1:3.

⁴ Mu bhuku ra Abhakuki 2:2, 3, tinoerenga mhinduro ya Mwari kuna Abhakuki no cigondeso Cake cokugadzirisa cineso ici. Djehovha anoda maningi anhu. Bhaibheri rinoti: “Ayena anomurangarirai.” (1 Pedru 5:7) Zvirokwazvo, Mwari anozonda kuona matambudziko kupinda isusu. (Isaya 55:8, 9) Hino, ngatione kuti ngei pa nyika pakadzara no matambudziko?

5. Afundisi akawanda anofundisei nge zve kushupika ke anhu? Asi Bhaibheri rinotifundisei?

⁵ Atungamiriri ne afundisi e magereja, kajinji anofundisa kuti kushuphika ke anhu kuda ka Mwari. Anhu amweni anoreketa kuti zviro zvese zvinoitika kune munhu, kubatanidza matambudziko e ngozi, zvainga zvakatarhwa kare na Mwari uye kuti atizombozwisisi kuti ngei Mwari anodaro. Amweni anotoreketa kuti anhu, pamwepo no ana adoko anofa kuti aende kuna Mwari kudenga. Asi andizvopi. Djehovha aamboitisi zviro zvakashata. Bhaibheri rinoti: “Mwari we zvirokwazvo aamboiti zvakashata, we Masimba Ese aazomboiti zviro zvisikazi kunaka!”—Djobho 34:10.

6. Ngei anhu akawanda ecipumha Mwari nge ndaa ye matambudziko ese ari mu nyika?

⁶ Anhu akawanda anopumha Mwari nge ndaa ye matambudziko ese ari mu nyika ngokuti anorangarira kuti Mwari ndiye ari kutonga nyika ino. Asi takafunda mu Fundo 3 kuti mutongi we nyika ino kamare ndi Sathani Dhiyabhorosi.

7, 8. Ngei pa nyika pakadzara no matambudziko?

⁷ Bhaibheri rinotibvunza kuti “nyika yese iri mu simba re wakashata.” (1 Juau 5:19) Mutongi we nyika ino, Sathani, ndi munhu wakashata uye ano bvinga. Iyena “ari kucengedza nyika yese inogarhwa.” (Zvakapangidzwa 12:9) Anhu akawanda akaita hingana iyena. Izvi ndizvo zvinoitisazve kuti nyika idzare no anhu anonyepa, anozondana uye ano bvinga.

⁸ Pane cimwenizve cinoita kuti nyika idzare no matambudziko. Adhamu na Evha paakapandukira Mwari, akabararisa citema ku ana awo ese. Uye nge ndaa ye citema, anhu anoitirana zvakashata. Kajinji anhu anoda kudzikudza  kupinda amweni. Anhu anorhwisana, anoenda ku hondo, uye anothyisidzira amweni. (Muparidzi 4:1; 8:9) Pamweni paya anhu anoshuphika ngokuti “anozirhwa ne zviro zvisikakarirhwi pa nguwa isikarangarirhwi.” (Muparidzi 9:11) Anhu paanonga eciita mabasa awo, zviro zvakashata zvisikakarirhwi zvingakwanisa kuaitikira.

9. Ngei tecithemba kuti Djehovha ano ndaa yakanaka maningi inoita kuti ambosiye kushuphika kugare kuripo?

⁹ Djehovha aatomboiti kuti anhu ashuphike. Andiepi anoitisa kuti paoneke hondo, ubhinya, uye kuti anhu aitirane zvakashata. Mwari andiepi anoitisa kuti paoneke ngozi dzakaita hingana zvigidhigidhi, madutu ne kudzarisa ke mvura. Asi pamweni mungarangarira kuti, ‘Djehovha ndi Mwari we Masimba Ese, hino ngei asikapedzi zviro zvakashata zvinoitika?’ Tinoziya kuti Djehovha anotida maningi, ngokudaro zvingaita kuti pano ndaa yakanaka maningi inoita kuti ambosiye kushuphika kugare kuripo.—1 Juau 4:8.

10. Sathani akanyepei nge zva Djehovha?

¹⁰ Mu munda we Edheni, Dhiyabhorosi akacengedza Adhamu na Evha. Sathani akapumha Mwari kuti ayena ndi Mutongi wakashata. Akaita kuti Adhamu na Evha arangarire kuti ciripo cakanaka caaifisirhwa na Mwari. Sathani aida kuti awona atende kuti iyena aikwanisa kutonga zvakanaka kupinda Djehovha, uye kuti aikwanisa kurarama asikatongwi na Mwari.—Genesi 3:2-5; onai pakazwi Nyasai Kuzwisisa n.º 25.

11. Mubvunzo upi watinoda kudaira?

¹¹ Adhamu na Evha akatama kuzwira Djehovha uye akamupandukira. Awona akarangarira kuti ainga ano citenderhwa cokudzisanangurira oga zvakanaka no zvakashata. Djehovha aizopangidza kudini kune apanduki kuti ainga akapvseteka uye kuti ndiye anoziya zvakatinakira?

12, 13. (a) Ngei Djehovha aazi kuparadza apanduki ciripori-poco? (b) Ngei Djehovha akasiya kuti Sathani atonge nyika ino uye kuti anhu adzitonge?

 ¹² Djehovha aazi kuparadza Adhamu na Evha ciripori-poco. Pane kudaro, akaasiya kuti abare ana. Hino Djehovha akaita kuti ana a Adhamu na Evha asanangure waanoda kuti agare mutongi wawo. Cido ca Djehovha cainga cekuti nyika idzare no anhu akakwana, uye izvi zvaizoitika pasinei no zvaizoizwa na Sathani.—Genesi 1:28; Isaya 55:10, 11.

¹³ Sathani akapumha Djehovha pamberi pe zviuru ne zviuru zve ngirozi. (Djobho 38:7; Dhanyeri 7:10) Ndiyo ndaa, Djehovha akamupasa nguwa kuti apangidze kuti zvaaimupumha zvainga zve zvirokwazvo here. Akapasawo anhu nguwa kuti agadze utongi yawo ecitungamirirhwa na Sathani kuti zvibude pamhene kuti pasina rubetso ra Mwari apana zvainokwanisa kuita.

14. Nguwa yakabudisa pamhene cokwadi cipi?

¹⁴ Anhu aedza kudzitonga ke zviuru zve makore, asi akakonerhwa. Sathani wabatika kuti anonyepa. Anhu anoda kubetserhwa na Mwari. Muphorofiti Djeremiya wakareketa zvirokwazvo paakati: “Haiwa Djehovha, ndinotozviziya kuti munhu andiepi muna we gwanza rake. Azviripi ku munhu ari kuhamba kuti anatsirise mithanyo yake.”—Djeremiya 10:23.

15, 16. (a) Ngei Djehovha ari kusiya anhu ecishuphika ke nguwa yakareba kudai? (b) Ngei Djehovha aaripi kugadzirisa matambudziko ari kubarhwa na Sathani?

¹⁵ Ngei Djehovha asiya anhu ecishuphika ke nguwa yakareba kudai? Ngei asikapedzi zviro zvakashata zvinoitika? Kutora nguwa yakareba zvabetsera kuonesa kuti Sathani  aakwanisi kutonga. Anhu akaedza mikhaindi yakasiyana-siyana yekutonga, asi apana wakabudirira. Zvirokwazvo kuti anhu ari kubudirira pa zviro zvinocokuita no siensia no zviro zve magetsi zve mazuwa ano, asi udzvinyiriri, urombo, ubhinya ne hondo zviri kutobambirira kupinda kare. Zviri pamhene kuti atikwanisi kubudirira tecidzitonga tega pasina Mwari.

¹⁶ Djehovha aazi kugadzirisa matambudziko ari kubarhwa na Sathani. Kudai ecizviita, zvaida kuita hingana anobetsera utongi wa Sathani, asi Djehovha amboiti izvona. Uyezve, anhu aida kurangarira kuti anokwanisa kudzitonga oga ecibudirira. Asi uku kunyepa, uye Djehovha aatsigiri manyepo akadaro. Ayena aatombonyepi.—Ahebheru 6:18.

17, 18. Djehovha acaitei kuti agadzirise matambudziko ese akabarhwa na Sathani?

¹⁷ Djehovha anokona here kugadzirisa matambudziko ese akabarhwa ngo kupanduka kakaita Sathani ne anhu? Honde. Kuna Mwari apana cisikakwanisiki. Djehovha anoiziya nguwa yazvicanyasa kubudiswa pamhene kuti Sathani anonyepa. Pedzepo anozoita kuti nyika igare paradhizo, hingana zvaaida pakutanga. Ese ari “mu makuwa e anorangarirhwa” acamutswa. (Juau 5:28, 29) Anhu aazomborhwari kana kufa. Djesu acabvisa matambudziko ese akabarhwa ngo kupanduka kakaita Sathani. Djehovha acaseenzesa Djesu “kuti aputse mabasa a Dhiyabhorosi.” (1 Juau 3:8)  Tinotenda maningi Djehovha ngo kutipasa mukana kuti tigume pakumuziya no kusanangura kuti tinoda kuti agare Mutongi wedu. (Erengai 2 Pedru 3:9, 10.) Kunyazi patinoshuphika, anotibetsera kushingirira.—Juau 4:23; erengai 1 Akorinti 10:13.

¹⁸ Djehovha aatibambidziri kumusanangura kuti agare  Mutongi wedu. Akapasa anhu cipo cokukwanisa kudzisanangurira oga zvaanoda kuita. Ngationei kuti tinodikana kuseenzesa kudini cipo icona cakanakisisa.

19. Cipo cipi cakanakisisa catakapuwa na Djehovha? Ngei tinodikana kutenda Mwari ngo cipo icona?

¹⁹ Djehovha akatipasa cipo cakanakisisa cinotisiyanisa maningi no zvinyama. Zvinyama kajinji zvinoita zviro maererano ne masikirhwe azvo, asi isusu tinokwanisa kusanangura mushobo watinoda kurarama no kusanangura kana tiri kuda kunamata Djehovha kana kuti atidi. (Zvierengo 30:24) Uyewo, takasiyana no micini inogara yeciseenza maererano ne zvayakagadzirirhwa basi. Tino rusununguko re kusanangura zvatinoda kugara, atinoda kuti agare shamwari dzedu, uye zvatinoda kuita no upenyu wedu. Djehovha anoda kuti tidakadzwe no upenyu.

20, 21. Ndikupi kusanangura kakanaka kamungaita zvino uno?

²⁰ Djehovha anoda kuti timude. (Mateu 22:37, 38) Djehovha akatodzana ne baba anopfara paanozwa mwana wawo eciti “Ndinomudai maningi” kana asingaiti zvekubambidzirhwa. Akatipasa rusununguko rekusanangura kumuseenzera kana kutama kumuseenzera. Sathani pamwepo na Adhamu na Evha akasanangura kuramba Djehovha. Hino imwimwiwo mucaseenzesa kudini cipo camunaco cokudzisanangurira?

²¹ Senzesai rusununguko renyu ngo kuseenzera Djehovha. Kune zviuru ne zviuru zve anhu akasanangura kupfadza Djehovha uye kuramba Sathani. (Zvierengo 27:11) Hino munodikana kuitei zvino uno kuti mukwanise kurarama mu nyika ipsva ya Mwari paacabvisa matambudziko ese? Fundo inoteera icadaira mubvunzo uwona.