1. Ndiani akatipasa upenyu?

DJEHOVHA “Mwari mupenyu.” (Djeremiya 10:10) Ndiye Musiki wedu, uye ndiye akatipasa upenyu. Bhaibheri rinoti: “Makasika zviro zvese, uye ngokuda kenyu zviripo uye zvakasikwa.” (Zvakapangidzwa 4:11) Zvirokwazvo, Djehovha aida kuti tigare no upenyu. Upenyu cipo cakanakisisa cinobva kuna Mwari.—Erengai Pisarema 36:9.

2. Kuti tigare zvakanaka mu upenyu tinodikana kuitei?

² Djehovha akatipasa zvatinoda kuti tirumbwe tecirarama, zvakadai hingana zvokurhya ne mvura. (Zviito 17:28) Kupinda zvese izvi, anoda kuti tidakadzwe no upenyu. (Zviito 14:15-17) Kuti tigare zvakanaka mu upenyu, tinodikana kutondoedza mitemo ya Mwari.—Isaya 48:17, 18.

3. Djehovha akaitei Kaini paakauraya Abheri?

³ Bhaibheri rinotifundisa kuti upenyu wedu no upenyu wo amweni uno mutengo wakakura kuna Djehovha. Ngo muezeniso, Kaini—mwana wa Adhamu na Evha, paakanyangadzira mudoko wake Abheri, Djehovha akamungwadza kuti aidikana kudzibata. Asi Kaini aazi kupurutana, uye akanyangadzwa maningi zvokuti “akarhwisa mudoko wake Abheri uye akamuuraya.” (Genesi 4:3-8) Djehovha akaphanica Kaini ngo kuti akuuraya Abheri. (Genesi 4:9-11) Ngokudaro shungu no kuzonda anhu zvakashata maningi ngokuti zvingaita kuti tirhwise kana kuitira amweni zvakashata. Munhu wakadaro aazooni upenyu usikaperi.  (Erengai 1 Juau 3:15.) Kuti tipfadze Djehovha, tinodikana kufundira kuda anhu ese.—1 Juau 3:11, 12.

4. Mutemo wakapaswa ana aIsraeri na Mwari unotifundisei nge zve cipo ce upenyu?

⁴ Mumasure me zviuru zvemakore, Djehovha akapangidza kuti anoreremedza upenyu paakapasa Mozesi Mitemo Gumi. Umwe wakhona unoti: “Usauraye.” (Dheuteronomiyo 5:17) Munhu aiuraya umweni ngokuda, aidikana kuurayiwawo.

5. Mwari anoona kudini kubvisa mimba?

⁵ Mwari anoona kudini kubvisa mimba? Kunyazi upenyu we mwana asati abarhwa uno mutengo wakakura kuna Djehovha. Pa Mutemo waakapasa ana aIsraeri, Djehovha akareketa kuti kana munhu akakuwadza mwanakadzi ano mimba, mwanewo ofa, munhuwo aidikana kuurayiwawo. (Erengai Ekisodho 21:22, 23; Pisarema 127:3.) Izvi zvinotifundisa kuti kubvisa mimba zvakashata.—Onai pakazwi Nyasai Kuzwisisa n.º 26.

6, 7. Tinopangidza kudini Djehovha kuti tinoreremedza upenyu?

⁶ Tingapangidzira kudini Djehovha kuti tinoreremedza upenyu wedu no upenyu wo amweni? Ngokutama kuita zviro zvinokanda pa ngozi upenyu wedu no upenyu wo amweni. Ndiyo ndaa atidikani kuseenzesa forhya, mbanje kana mitombo inoraradzisa ngokuti zvinotikuwadza kana zvinokwanisa kutiuraya.

⁷ Upenyu wedu no muiri wedu takazvipaswa na Mwari, ndiyo ndaa tinodikana kuzviseenzesa ngo mushobo waanoda. Ngokudaro tinodikana kucengeta zvakanaka muiri wedu. Kana tikatama kudaro, ticagara anhu asikazi kucena mukuona ka Mwari. (Aroma 6:19; 12:1; 2 Akorinti 7:1) Atingakwanisi kunamata Mwari, uya akatipasa upenyu kana tikatama kureremadza upenyu wakhona. Kunyazi hazvo zvingashupha kusiya maitiro atakarowedza  kuita, Djehovha acatibetsera kana tikaedza kuzvisiya nge ndaa yekuti tinoreremedza upenyu.

8. Tingaitei kuti tisakande upenyu wedu no wo amweni pa ngozi?

⁸ Tafunda kuti upenyu cipo cakanakisisa. Djehovha anothemba kuti ticaita zvese zvatinokwanisa kuti tisakande upenyu wedu no wo amaweni pa ngozi. Tinoita izvona ngo mushobo watinotekenya motokari yedu, midhudhudhu, kana zvimweni zvatinoseenzesa pakuhamba. Atizoiti mitambo inokuwadza kana yekurhwisana. (Pisarema 11:5) Tinoitawo zvese zvatinokwanisa kuti pa nyumba pedu pasagare no ciro cingabara ngozi. Djehovha akapa mutemo kuna aIsraeri eciti: ‘Kana ukawaka nyumba, unodikanawo kuwaka cidziiriro cinotenderedza denga yaro, kuti usakande ndaa yekudurura ngazi pa nyumba pako kana munhu akambwera pasi.’— Dheuteronomiyo 22:8.

9. Tinodikana kubata kudini zvinyama?

⁹ Djehovha anoonawo mabatire atinoita zvinyama. Anotendera kuuraya zvinyama kuti tione zvokurhya no zvokupfeka, uyezve anotendera kuuraya cinyama kana cikakanda pa ngozi upenyu wedu. (Genesi 3:21; 9:3; Ekisodho 21:28) Asi atidikani kuitira bvinga zvinyama kana kutamba tecizviuraya.—Zvierengo 12:10.

10. Tinoziya kudini kuti ngazi inoimirira upenyu?

¹⁰ Ngazi ino mutengo wakakura kuna Djehovha ngokuti inoimirira upenyu. Kaini paakauraya Abheri, Djehovha akati kaari: “Ngazi ye mudoko wako iri kudainzira kwandiri kubva pa mataka.” (Genesi 4:10) Ngazi ya Abheri yaiimirira upenyu wake, uye Djehovha akaphanica Kaini ngokuuraya Abheri. Mumasure me Ndambi huru ye mazuwa a Nowa, Djehovha akapangidzazve kuti ngazi inoimirira  upenyu. Djehovha akatendera kuti Nowa no mhuri yake auraye zvinyama kuti aone zvokurhya. Akati: “Mungarhya henyu zvinyama zvese zvinohamba. Ndinokupasai zvese, hinga kukupai kandakaita zvinomera zvakasvipirira.” Asi, pano ciro caakarambidzwa kurhya. Djehovha akati: “Musarhye nyama pamwepo no ngazi ngokuti ndiyo upenyu wayo.”—Genesi 1:29; 9:3, 4.

11. Mwari akapasa aIsraeri mutemo upi uno cokuita no ngazi?

¹¹ Mumasure me makore 800 Djehovha arambidza Nowa kurhya ngazi, Djehovha akabvunzazve anhu ake kuti: ‘Kana mu Israeri kana mutorhwa ari kugara pakati penyu akaenda kovhimisa obata cinyama kana shiri inorhyiwa anodikana kudurura ngazi yaco woifishira no mavhu.’ Akatizve: ‘Musarhye ngazi.’ (Revhitiko 17:13, 14) Djehovha ainga aciri kuda kuti anhu ake aziye kuti ngazi ciro cakacena. Aidikana hawo kurhya nyama, asi ngazi haiwa. Paiuraya cinyama kuti arhye, aidikana kudurura ngazi yayo pasi.

12. Djehovha anoda kuti maKristu aziyei pamusoro pe ngazi?

¹² Mumasure me makore akati kuti Djesu afa, maaphostori ne akuru e ungano ye mu Djerusarema akaungana kuti asanangure kuti pa Mitemo yainga yakapaswa aIsraeri, ngeipi yainga ecidikanwa kuteererhwa no maKristu. (Erengai Zviito 15:28, 29; 21:25.) Djehovha akaabetsera kuzwisisa kuti ngazi yainga icine mutengo wakakura kaari uye kuti ainga ecidikana kuziya kuti ngazi ciro cakacena. MaKristu okutanga ainga asikarhyi ngazi kana kuimwa kana kurhya nyama isikazi kudururhwa zvakanaka ngazi. Kuita kudaro, zvainga zvakaezana no kuita zvitema zvikuru, hingana kunamata mifanikiso kana kuita uhure. Kubvira nguwa iyona, maKristu e zvirokwazvo airamba kurhya kana kumwa ngazi. Zvakadiniwo no mazuwa  ano? Djehovha aciri kundoda kuti tiziye kuti ngazi ciro cakacena.

13. Ngei maKristu anoramba kukandwa ngazi?

¹³ Izvi zvinoda kureya kuti maKristu anodikanawo kuramba kukandwa ngazi here? Honde, ndizvo kamare. Djehovha akatirambidza kurhya kana kumwa ngazi. Kudai marambidzwa no murapi wenyu kumwa nipa, zvaizosiyana here kudai meciita zvekuikanda mu muiri menyu ne njesau? Zviri pamhene kuti haiwa! Ngo mushobo umwewo, mutemo wokutama kurhya kana kumwa ngazi unoreyawo kuti atidikani kukandwa ngazi.—Onai pakazwi Nyasai Kuzwisisa n.º 27.

14, 15. Ngei muKristu anodikana kureremedza upenyu uye kuzwira Djehovha?

¹⁴ Hino, kana murapi akati ticafa kana tikatama kukandwa ngazi? Umwe na umwe anodikana kusanangura kuti acada kuzwira mutemo wa Mwari here kana kuti haiwa. MaKristu anoreremedza maningi cipo ca Mwari ce upenyu, ndiyo ndaa ticapsvaka mishobo imweni ye kuraphwa kuti tirumbwe tecirarama; asi atizotendi kukandwa ngazi.

¹⁵ Tinoita zvese kuti tirumbwe tino uthongo wakanaka, asi nge ndaa yekuti upenyu uno mutengo wakakura kuna Djehovha, atizotendi kukandwa ngazi. Zvakanaka maningi kuzwira Djehovha pane kuedza kurebesa upenyu wedu teciputsa mitemo yake. Djesu akati: “Munhu wese anoda kuponesa upenyu wake acauruza, asi munhu wese anoruza upenyu wake ngo pamusana pangu acauona.” (Mateu 16:25) Tinoda kuzwira Djehovha ngokuti tinomuda. Anoziya zvakatinakira, uye tinoona upenyu kuti ciro cine mutengo wakakura uye cakacena hingana maonero anoita Djehovha.—Ahebheru 11:6.

16. Ngei anhu a Mwari ecimuzwira?

¹⁶ Anhu a Mwari akatendeka akatsunga kutondoedza  mutemo wake uno cokuita no ngazi. Aarhyi kana kumwa ngazi, uye aatenderi ngazi pakuraphwa. * Asi anotenda kuraphwa ngo mishobo imweni kuti acengetedze upenyu. Anoziya kuti Musiki we upenyu ne we ngazi anoziya zvakaanakira. Munotenda here kuti Djehovha anoziya zvakamunakirai?

17. Mu Israeri, ngeupi mushobo umwe basi wokuseenzesa ngazi waitenderhwa na Djehovha?

¹⁷ Pa Mutemo wakapaswa Mozesi na Mwari, Djehovha akati kuna aIsraeri: ‘Upenyu we cinyama uri mu ngazi, uye inini ndakaikanda pa artari kuti mukwanise kurekererhwa zvitema zvenyu, ngokuti ngazi ndiyo inoita kuti paoneke rurekerero peciseenzeswa upenyu uri mairi.’ (Revhitiko 17:11) Aisraeri paaita citema, aidikana kukumbira kurekererhwa na Djehovha ngokupisira cinyama uye kukumbira mudiri kuti adurure ngazi padoko pa artari. Uu ndiwo oga mushobo wokuseenzesa ngazi waitenderhwa na Djehovha kuna aIsraeri.

18. Rufu ra Djesu rakaita kuti tigare no mukana wei?

¹⁸ Djesu paakauya pa nyika pano, akagumisa mutemo wokupisira zvinyama ngokupa upenyu wake, kana kuti ngazi, kuti tirekererhwe pa zvitema zvedu. (Mateu 20:28; Ahebheru 10:1) Upenyu wa Djesu wainga uno mutengo wakakura maningi zvokuti paakamutswa na Djehovha kuti aende kudenga, Djehovha aikwanisa kupasa anhu ese mukana wokurarama nokusikaperi.—Juau 3:16; Ahebheru 9:11, 12; 1 Pedru 1:18, 19.

19. Tinodikana kuitei kuti tigare ‘takacena pa ngazi ye anhu ese’?

 ¹⁹ Tinotenda maningi Djehovha ngo cipo cakanakisisa ce upenyu! Uye tinoda kubvunza amweni kuti kana akatenda Djesu, anokwanisa kurarama nokusikaperi. Tinoda anhu, ndiyo ndaa ticaita zvese zvatinokwanisa kuti tiafundise zvaangaita kuti aone upenyu usikaperi. (Ezekiyeri 3:17-21) Kana tikadaro, ticakwanisawo kureketa hingana mu aphostori Pauro paakati: “Ndakacena pa ngazi ye anhu ese, ngokuti andizi kumborekera kumubvunzai zviro zvese zvino cokuita no cido ca Mwari.” (Zviito 20:26, 27) Zvirokwazvo, tinokwanisa kupangidza kuti tinoreremedza maningi upenyu no ngazi ngokureketa nge zva Djehovha uye maonera aanoita upenyu.