1, 2. Ndi ani nani akagara shamwari dza Djehovha?

NDIANI wamaida kuti agare shamwari yenyu? Zve zvirokwazvo munhu wamunoda, wamunopindirana naye ne ano unhu wakanaka wamunopfarira.

² Djehovha Mwari akasanangura anhu amweni kuti agare shamwari dzake. Ngo muezaniso, Abrahamu ainga ari shamwari ya Djehovha. (Isaya 41:8; Tiyago 2:23) Djehovha aidawo maningi Dhavhidhi. Akareketa kuti Dhavhidhi ainga ari ‘munhu anodiwa no mwoyo wake.’ (Zviito 13:22) Uye muphorofiti Dhanyeri ainga ari munhu “anodikanwa maningi” na Djehovha.—Dhanyeri 9:23.

3. Ngei Abrahamu, Dhavhidhi na Dhanyeri akagara shamwari dza Djehovha?

³ Abrahamu, Dhavhidhi na Dhanyeri akaguma kudini pakugara shamwari dza Djehovha? Djehovha akati kuna Abrahamu: “Wapurutana izwi rangu.” (Genesi 22:18) Djehovha anogara shamwari dze aya anomuzwira ecidzidodosa. Kunyazi madzinza ese e anhu angakwanisa kugarawo shamwari dzake. Djehovha akareketa kuna dzinza ra Israeri: “Tondoedzai izwi rangu, uye ndicagara Mwari wenyu, imwimwi mucagara anhu angu.” (Djeremiya 7:23) Hino, munodikanawo kuzwira Djehovha kana mecida kamare kugara shamwari yake.

4, 5. Djehovha anodziirira kudini shamwari dzake?

⁴ Bhaibheri rinoreketa kuti Djehovha anopsvaka mikana “kuti apangidze simba rake ku aya ano mwoyo wakaperera  kaari.” (2 Makoronika 16:9) Pana Pisarema 32:8, Djehovha anogondesa shamwari dzake kuti: “Ndicakupasa nzero uye ndicakupangidza gwanza raunodikana kuhamba naro. Ndicakupasa zano dziso rangu rakakuringira.”

⁵ Pane muzondi ano simba anoda kutipingidzira kugara shamwari dza Djehovha. Asi Djehovha anoda kutidziirira. (Erengai Pisarema 55:22.) Ngokuti tiri shamwari dza Djehovha, tinomunamata no mwoyo wese. Tinogara takagondeka kaari kunyazi patinoshuphika. Uye tinothembawo hinga zvaiita mutari umweni we mapisarema. Iyena akatara nge zva Djehovha kuti: “Narini andizombozungunuswi, ngokuti ayena ari kudii rangu re muoko kwawo.” (Pisarema 16:8; 63:8) Sathani anoedza kudini kutipingidzira kuti tisagare shamwari dza Djehovha?

6. Sathani akatii nge zve anhu?

⁶ Mu Fundo 11 takafunda kuti Sathani akapikisa Djehovha uye akamupumha kuti anonyepa. Sathani akabhuyazve kuti Djehovha aidzvinyirira Adhamu na Evha ngokutama kusiya kuti adzisanangurire oga zvakanaka no zvakashata. Bhuku ra Djobo rinotifundisa kuti Sathani anoshora anhu anoda kugara shamwari dza Mwari. Sathani akareketa kuti anhu anoseenzera Mwari ngokuti anoda kukomborerhwa basi, haiwa ngokuti anomuda. Sathani akatoreketa kuti aikwanisa kuita kuti munhu upi hake apandukire Mwari. Ngationei kuti tinokwanisa kufundei nge zva Djobo uye kuti Djehovha akamudziirira kudini.

7, 8. (a) Djehovha aiona kudini Djobo? (b) Sathani akatii nge ndaa ya Djobo?

⁷ Djobo ainga ari ani? Ainga ari mwanarume akanaka akararama makore 3600 akapinda. Djehovha akareketa kuti mu nguwa yake painga pasina mwanarume akaezana  naye pa nyika. Djobo aireremedza maningi Djehovha, uye aizonda zvakashata. (Djobho 1:8) Zvirokwazvo, Djobo ainga ari shamwari ya Djehovha kamare.

⁸ Sathani akareketa kuti Djobo ainamata Djehovha ngokuti pane zvaiida. Sathani akati kuna Djehovha: “Amuzi kumutenderedza no cidziiriro, pamwepo no nyumba yake no zvese zvaanazvo? Makakomborera basa re nyara dzake, uye zvipfuyo zvake zvakaita zvekubararika pa nyika. Asi zvino, tambaradzai nyara yenyu mugwede zvese zvaanazvo, mucaona kuti acamutukai pamberi penyu kamare.”—Djobho 1:10, 11.

9. Djehovha akasiya Sathani kuti aitei?

⁹ Sathani akareketa kuti Djobo ainamata Djehovha nge ndaa ye makomborero aaipaswa. Sathani akareketawo kuti aikwanisa kuita kuti Djobo asiye kunamata Djehovha. Djehovha aazi kutendera zvairekethwa na Sathani, ndiyo ndaa akamusiya kuti amuedze kuti adzionere ega kuti Djobo ainga akashamwaridzana Naye ngokuti aimuda zve zvirokwazvo.

10. Sathani akaedza kudini Djobo, asi Djobo akaitei?

¹⁰ Pa muedzo wokutanga, Sathani akauraya zvipfuyo zvese zva Djobo. Sathani akaurayawo aseenzi akawanda a Djobo. Djobo akaruza zvese zvainga anazvo. Pakupedzesera, Sathani akauraya ana a Djobo no dutu. Kunyazi hazvo, Djobo akarumbwa akagondeka kuna Djehovha. “Pa zvese izvi, Djobo aazi kushaisha kana kupumha Mwari.”—Djobho 1:12-19, 22.

11. (a) Sathani akaiteizve kuna Djobo? (b) Asi Djobo akaitei?

¹¹ Sathani aazi kuima ndipona. Akareketazve kuna Djehovha eciti: “Tambaradzai nyara yenyu mugwede makodo ake ne nyama yake, uye mucaona kuti acamutukai pamberi  penyu kamare.” Hino Sathani akakuwadza Djobo ne nhenda inorhwadza maningi. (Djobho 2:5, 7) Asi Djobo akandogara akagondeka kuna Djehovha. Iyena akati: “Dakara ndafa, andizosii kugondeka kangu kuna Mwari!”—Djobho 27:5.

12. Djobo akapangidza kudini kuti Sathani ainyepa?

¹² Djobo ainga asikazvizii zvaainyeperhwa na Sathani kana ngei aishuphika kudaro. Airangarira kuti Djehovha ndiye aimushupha. (Djobho 6:4; 16:11-14) Kunyazi hazvo, Djobo akarumbwa akagondeka kuna Djehovha. Zvese zvakabuda pamhene kuti Djobo ainga asikanamati Djehovha nge ndaa ye makomborero aaipaswa. Asi kuti ainga ari shamwari ya Mwari ngokuti aimuda. Zvese zvakareketa Sathani kainga kunyepa!

13. Kugondeka kakaita Djobo kakapangidzei?

¹³ Kunyazi ainga asikazvizii zvaiitika kudenga, akarumbwa akagondeka kuna Mwari uye akapangidza kuti Sathani ndi munhu wakashata. Djehovha akakomborera Djobo ngokuti ainga ari shamwari yake yakagondeka.—Djobho 42:12-17.

14, 15. Sathani akapumha anhu ese kutii?

¹⁴ Zvakaitika kuna Djobo zvinotifundisa zviro zvakawanda. Nyamasi uno, Sathani anotipumha kuti tinonamata Djehovha ngokuti pane zviro zvatinoda kaari. Pana Djobho 2:4, Sathani akati: “Munhu acapa zvese zvaanazvo kuti adziponese.” Ne masoko aya Sathani anopumha anhu ese, anarume no anakadzi haiwa basi Djobo, kuti tiri kunamata Mwari ngokuti pane zvatinoda. Mazana e makore mu masure mekuti Djobo afa, Sathani ainga ecindoshora basi Djehovha ne anhu ake. Ngo muezaniso, pana Zvierengo 27:11, Djehovha anoti: “Mwana wangu, gara munhu akangwara upfadze mwoyo wangu, kuti ndikwanise kupindura uwo anondishora.”

 ¹⁵ Kana mukasanangura kuzwira Djehovha ne kugara shamwari yake yakagondeka, mucapangidza kuti Sathani anonyepa. Kunyazi mune zvakawanda zvamucada kucinja mu upenyu wenyu kuti mugare shamwari ya Djehovha, mucaita zvakanaka maningi! Kusanangura kuita izvi kunodikanwa maningi. Sathani anoti imwimwi mucasiya Mwari kana mukasongana no zvineso. Anoedza kuticengedzera kuti tisagare takagondeka kuna Mwari. Anozvita maitirei?

16. (a) Sathani anoseenzesa miedzo ipi kuti apingidzire anhu kunamata Djehovha? (b) Dhiyabhorosi angamuedzai kudini kuti amupingidzirei kunamata Djehovha?

¹⁶ Sathani anoseenzesa mishobo yakasiya-siyana kuti atipingidzire kugara shamwari dza Djehovha. Iyena anovhima “hinga mhondoro inorira, icipsvaka wekurhya.” (1 Pedru 5:8) Hino musashamiswe ngokuona shamwari dzenyu, anyaukama enyu kana anhu amweni eciedza kumupingidzirai kufunda Bhaibheri no kuseenzesa zvamunofunda. Kana zvikaitika mungazwa hinga muri kurhwiswa. * (Juau 15:19, 20) Sathani anodziitisawo hinga “ngirozi ye ruvheneko.” Ngokudaro, anokwanisa kuedza kuticengedzera kuti tisazwire Djehovha. (2 Akorinti 11:14) Mushobo umweni waanoseenzesazve kuti atipingidzire kunamata Djehovha nge we kuita kuti tidzishore tecirangarira kuti atizi kusisira kunamata Djehovha.—Zvierengo 24:10.

17. Ngei tecizwira Djehovha?

¹⁷ Patinozwira Djehovha, tinopangidza kuti Sathani anonyepa. Cinyi cicatibetsera kuzwira Djehovha?  Bhaibheri rinoti: “Ida Djehovha Mwari wako no mwoyo wako wese no mwiya wako wese no simba rako rese.” (Dheuteronomiyo 6:5) Tinozwira Djehovha ngokuti tinomuda. Kana rudo redu kuna Djehovha rikabambirira kukura, ticaita zvese zvaanotikumbira kuti tiite. Muphostori Juau akatara kuti: “Ngokuti kuda Mwari kunoreya kucengeta mitemo yake; uye mitemo yake airemi.”—1 Juau 5:3.

18, 19. (a) Ngazvipi zviro zvinozwi na Djehovha kuti zvakashata? (b) Tinoziya kudini kuti Djehovha aatikumbiri zvatisikakwanisi kuita?

¹⁸ Asi ngazvipi zviro zvinozwi na Djehovha kuti zvakashata? Zvimweni zvakhona zviri mu bokisi rakazwi “ Zondai Zvinozondwa na Djehovha.” Pakutanga mungaona zvimweni zvakhona hingana zvisikazi kushata maningi. Asi pamucaerenga tsamba dze Bhaibheri dzinooneka mu bhokisimo uye mecinyasa kurangarisisa nge zvadzo, mucazwisisa pazvakanakira kutondoedza mitemo ya Djehovha.  Pamweni mucaona kuti pane pamunodikana kugadzirisa mu upenyu wenyu. Kunyazi hazvo zvingashupha kugadzirisa, kana makazviita mucagara ne rugariko uye mucapfara ngokugara shamwari yakagondeka ya Mwari. (Isaya 48:17, 18) Tinoziya kudini kuti munhu anokwanisa kucinja panodikanika?

¹⁹ Djehovha aambotikumbiri zvatisikakwanisi kuita. (Dheuteronomiyo 30:11-14) Ngokuti ayena i Shamwari yedu ye zvirokwazvo, anotiziya kupinda zvatinodziita. Anoziya patakabamba no patakarembera. (Pisarema 103:14) Muphostori Pauro anotibambisa kuti: “Mwari akagondeka, uye aangamusii meciedzwa kupinda zvamunokwanisa kushingirira, asi pakuedzwa, Mwari acamupsvakirai gwanza re kubuda naro kuti mukwanise kushingirira.” (1 Akorinti 10:13) Ngatithembei hedu kuti Djehovha nguwa dzese acatipasa simba ratinoda kuti tiite zvakanaka. Acatipasa “simba rinopindiridza ratinaro” kuti ritibetsere kushingirira  mu nguwa dze matambudziko. (2 Akorinti 4:7) Pauro akaona kubetserhwa kaiitwa na Djehovha, ndiyo ndaa akati: “Ndino simba re kuita zviro zvese ngokuti pane anondipasa simba.”—Afiripi 4:13.

20. Tingateedzera kudini Mwari, uye ngei?

²⁰ Kana tecida kugara shamwari dza Djehovha, tinodikana kusiya kuita zvaanoti zvakashata. Asi pane zvimweni zvatinodikanazve kuita. (Aroma 12:9) Shamwari dza Mwari dzinoda zvaanoda. Izvona zvakatarhwa pana Pisarema 15:1-5. (Erengai.) Shamwari dza Djehovha dzinoteedzera unhu wake uye dzinopangidza “rudo, mupfaro, rugariko, kunonoka kunyangadzwa, unaki, kugara munhu akanaka, kutenda, upfawi, kudzibata.”—Agaratiya 5:22, 23.

21. Mungafundira kudini kupangidza unhu unodiwa na Mwari?

²¹ Mungafundira kudini kupangidza unhu uwona? Munodikana kufunda zvinodiwa na Djehovha ngo kuerenga uye kufunda Bhaibheri mazuwa ese. (Isaya 30:20, 21) Pamunoita izvi, rudo renyu kuna Djehovha ricakura, uye mucada kumuzwira.

22. Cinyi cicaitika kana mukazwira Djehovha?

²² Zvamunodikana kucinja mu upenyu wenyu zvingaezaniswa no kukhumura macira okare mopfeka macira mapsva. Bhaibheri rinoreketa kuti tinodikana “kukhumura unhu we kare” topfeka “unhu upsva.” (Akorosi 3:9, 10) Kunyazi hazvo zvisiripi nyore, kana tikaita cinjo idzona tozwira Djehovha, ayena anotigondesa kutipasa “mubairo wakakura.” (Pisarema 19:11) Hino, sanangurai kuzwira Djehovha kuti mupangidze kuti Sathani anonyepa. Namatai Djehovha ngokuti munomuda haiwa ngokuti mune zvamunoda kaari. Kana mukadaro mucagara shamwari ye zvirokwazvo ya Mwari!