1, 2. Ngei teciti munamato cipo cakanaka catakapaswa na Mwari, uye ngei tecidikana kuziya zvinobhuya Bhaibheri nge pamusoro pe munamato?

TIKAEZANISA nyika ne zviro zvakasikwa mudenga, nyika idoko maningi. Djehovha paanoona nyika, anhu ese akaita hingana kadonhwe ke mvura kari kudonha mu hari. (Pisarema 115:15; Isaya 40:15) Kunyazi hazvo takadodoka maningi kana ticizviezanisa ne zviro zvakasikwa mudenga, Pisarema 145:18, 19 inoti: “Djehovha ari dhuze ne anhu ese anomudainza, ese anomudainza ne mwoyo wese. Anoita zvinoda aya anomuthya; anozwa kucema kawo kubetserhwa, uye anoanunura.” Cikomborero cikuro catinaco! Djehovha, Musiki we Masimba Ese, anoda kugara dhuze nesu uye anoda kupurutana minamato yedu. Zvirokwazvo, munamato cipo cakanaka catakapaswa umwe ne umwe wedu na Djehovha.

² Asi Djehovha anozopurutana minamato yedu kana tikanamata basi ngo mushobo waanoda. Tingazviita maitirei? Ngationei kuti Bhaibheri rinobhuyei nge pamusoro pe munamato.

3. Ngei munodikana kunamata kuna Djehovha?

³ Djehovha anoda kuti tiite munamato kana kubhuya naye. Tinoziya kudini izvona? Tapota erengai Afiripi 4:6, 7. Cimborangarirai mukana wamunawo. Mutongi we zviro zvese zvakasikwa anomurangarirai maningi uye anoda  kuti murekete zviri mu mwoyo menyu ne zvese zviri kumunetsai.

4. Kugara mecinamata kuna Djehovha kunobambisa kudini ushamwari wenyu naye?

⁴ Munamato unotibetsera kuti tigare no ushamwari wakanaka na Djehovha. Kana shamwari dzecigara dzecibhuirana zvadzinorangarira, zviro zvinoanetsa ne zviri mu mwoyo mawo, ushamwari wawo unobamba. Ndizvoo zvinoitika patinonamata kuna Djehovha. Mu Bhaibheri Djehovha anomubvunzai zvaanorangarira ne zviri mu mwoyo make, uye anomubvunzai zvaacaita mberiyo. Munokwanisawo kugara mecireketa naye zviri mukati-kati me mwoyo menyu. Ngekuita izvona, ushamwari wenyu na Djehovha ucabambirira kubamba.—Tiyago 4:8.

5. Tinoziya kudini kuti Djehovha aapurutani minamato yese?

⁵ Kodi Djehovha anopurutana minamato yese here? Haiwa, aapurutani yese. Mu nguwa ye muphorofiti Isaya,  Djehovha akati ku aIsraeri: “Kunyazi meciita minamato yakawanda, andiipurutani; nyara dzenyu dzakadzara ne ngazi.” (Isaya 1:15) Izvi zvinopangidza kuti kana tikaita zviro zvinozondwa na Djehovha, iyena aazopurutani minamato yedu.

6. Ngei kutenda kunodikanwa maningi? Munopangidza kudini kuti mune kutenda?

⁶ Kana tecida kuti Djehovha apurutane minamato yedu tinodikana kutenda maari. (Marko 11:24) Muaphostori Pauro akapanganidza kuti: “Pasina kutenda azviiti kupfadza Mwari, ngokuti munhu wese anokhwedera kuna Mwari anodikana kutenda kuti ariyo uye kuti anopasa mubairo anhu ese anomupsvaka ne mwoyo wese.” (Ahebheru 11:6) Asi azvikwani kureketa basi kuti tinotenda. Tinodikana kupangidza pamhene kutenda kedu ngo kuzwira Djehovha mazuwa ese.—Erengai Tiyago 2:26.

7. (a) Ngei tinodikana kudzidodosa ne kupangidza rureremedzo patinoita munamato kuna Djehovha? (b) Tingapangidzira kudini kuti zvatiri kureketa zviri kubva mu mwoyo patinonamata?

⁷ Tinodikana kudzidodosa ne kupangidza rureremedzo patinoita munamato kuna Djehovha. Ngei? Kana tecida kureketa na mambo kana mutongi we nyika, zvirokwazvo kuti tinozviita ne rureremedzo. Djehovha ndi Mwari we Masimba Ese, hino atidikani here kutomureremedza maningi ne kudzidodosa patinoreketa naye? (Genesi 17:1; Pisarema 138:6) Minamato yedu inodikanawo kugara ye zvirokwazvo uye tecinamata kuna Djehovha zvecibva pa mwoyo, haiwa basi kugara teciphinda-phinda masoko amwewo.—Mateu 6:7, 8.

8. Patinonamata tecida ciro, tinodikana kuiteiwo?

⁸ Cokupedzesera, patinonamata tecida ciro, tinodikana kuita zvese zvatinokwanisa kuti ticiseenzere. Ngo muezaniso, kana takumbira kuti Djehovha atibetsere no zviro zve zuwa ne zuwa, hino atidikani kusenga nyara toimira kuti  Djehovha acatipasa zvese zvatinoda nyanguse tecikwanisa kuzviseenzera. Tinodikana kuseenza ne simba uye kutenda kuita mabasa ese atinokwanisa kuita. (Mateu 6:11; 2 Atesaronika 3:10) Kana takumbira kuti Djehovha atibetsere kusiya kuita zvakashata, hino tinodikana kutambira kure ne zviro zvingatipinza pamiedzo. (Akorosi 3:5) Ngationei zvinopano mibvunzo inoizwa kajinji nge pamusoro pe munamato.

9. Tinodikana kunamata kuna ani? Juau 14:6 inotifundisei nge pamusoro pe munamato?

⁹ Tinodikana kunamata kuna ani? Djesu akafundisa ateereri ake kuti anamate kuna “Baba edu ari kudenga.” (Mateu 6:9) Akatiwo: “Ndiri gwanza ne zvirokwazvo ne upenyu. Apana anouya kuna Baba asikazi kupinda ne pandiri.” (Juau 14:6) Ndiyo ndaa tinodikana kunamata kuna Djehovha basi tecizviita mu zina ra Djesu. Kunamata mu zina ra Djesu zvinoda kureyei? Kuti Djehovha atende minamato yedu, tinodikana kureremedza basa rinodikanwa maningi rakapaswa Djesu na Djehovha. Hinga zvatakafunda, Djesu akauya pa nyika pano kuti atiponese pa citema no rufu. (Juau 3:16; Aroma 5:12) Djehovha akagadzawo Djesu kuita Mudiri Mukuru uye Mutongi.—Juau 5:22; Ahebheru 6:20.

10. Pane mushobo unodikana kugara muiri wedu patinonamata here? Panganidzai.

¹⁰ Pane mushobo unodikana kugara muiri wedu patinonamata here? Haiwa, Djehovha aatikumbiri kuti tiite zvokugodama, kugara kana zvokuimira patinonamata. Bhaibheri rinofundisa kuti cinodikanwa kunamata kuna Djehovha tecipangidza kuti tiri kumureremedza. (1 Makoronika 17:16; Nemiya 8:6; Dhanyeri 6:10; Marko 11:25) Zvinonga  zvakaita muiri wedu andizvopi zvinodikana kuna Djehovha, asi zviri mu mwoyo medu. Tinganamata zvecizika kana cimwoyo-mwoyo pese patinonga tiri, uye pa nguwa yese, masikati kana usiku. Patinonamata kuna Djehovha, ngatigondei hedu kuti anotizwa kunyazi pasina anhu amweni ari kutizwa.—Nemiya 2:1-6.

11. Ndezvipi zviro zvatingareketa nge zvazvo na Djehovha?

¹¹ Tingakumbirei pa munamato? Tinganamata tecikumbira ciro cipi haco cinoenderana ne kuda ka Djehovha. Bhaibheri rinoti: “Kana tikakumbira ciro cipi haco maererano ne kuda kake, iyena anotizwa.” (1 Juau 5:14) Zvingaita here kunamata tecikumbira zvatinodawo? Honde. Kunamata kuna Djehovha kunodikana kuita hingana kucedza ne shamwari tsika-ndi-tsikewo. Tingamubvunza zvese zvatiri kurangarira ne zviri mu mwoyo medu. (Pisarema 62:8) Tinganamata kaari tecikumbira kuti atipase simba ne mwiya mucena wake kuti tiite zvakanaka. (Ruka 11:13) Tingakumbirawo Djehovha uzii kuti tione kusanangura zvakanaka zvokuita uye simba kuti tishingirire pa matambudziko. (Tiyago 1:5) Tinodikana kukumbira kuti Djehovha arekerere zvitema zvedu. (Aefeso 1:3, 7) Tinodikanawo kukumbira kuti Djehovha abetsere amweni, hingana mhuri yedu kana hama ne hanzvadzi dzedu dze mu ungano.—Zviito 12:5; Akorosi 4:12.

12. Cinyi cinodikana kugara cekutanga paminamato yedu?

¹² Cinyi cinodikana kugara cekutanga pa minamato yedu? Djehovha ne kuda kake. Tinodikana kumutenda ne mwoyo wese nge zvese zvaakatiitira. (1 Makoronika 29:10-13) Tinoziya izvona ngokuti Djesu paainga ari pa nyika, akafundisa afundi ake kunamata. (Erengai Mateu 6:9-13.) Akareketa kuti cokutanga aidikana kunamata kuti zina ra Mwari riceneswe, kana kuti, riceneswe pa manyepo ese anobhuyiwa pamusoro paro. Djesu akabhuyawo kuti tinodikana  kunamata kuti Umambo wa Mwari uuye uye kuti kuda ka Mwari kuizwe pa nyika yese. Tapedza kukumbira zviro zvese izvi zvinonyanya kudikanwa, Djesu akazobhuya kuti tinodikana kukumbira zvatinodawo. Patinokanda Djehovha ne kuda kake pakutanga mu minamato yedu, tinonga tecipangidza kuti cinyi catinonyanya kureremedza.

13. Minamato yedu inodikana kureba zvakadini?

¹³ Minamato yedu inodikana kureba zvakadini? Bhaibheri aribhuyi kuti inodikana kureba zvakadini. Minamato  yedu ingadodoka kana kureba zvecitsamira patinonga tiri kana zvatinonga tecida kunamatira. Ngo muezaniso, tingadodokesa minamato yedu patinonga tecida kurhya asi kurebesa patinonga tecitenda Djehovha kana patinonga tecimubvunza zvinotinetsa. (1 Samueri 1:12, 15) Atidikani kuita minamato yakareba maningi kuti tionekwe ne anhu hingana zvaiita anhu amweni mu mazuwa a Djesu. (Ruka 20:46, 47) Djehovha aapfadzwi ne minamato yakadaro. Cikuru kuna Djehovha kunamata zvecibva pa mwoyo.

14. Tinodikana kuita munamato kangana pa zuwa, uye izvona zvinotifundisei nge zva Djehovha?

¹⁴ Tinodikana kuita munamato kangana pa zuwa? Djehovha anoda kuti tigare tecireketa naye. Bhaibheri rinotibvunza kuti tinodikana ‘kurumbwa tecinamata.’ (Mateu 26:41; Aroma 12:12; 1 Atesaronika 5:17) Djehovha akagara  akagadzirira kuti atipurutane. Tingamutenda mazuwa ese nge rudo uye rupo rake. Tingamukumbirawo kuti atitungamirire, atibambise uye atinyaradze. Kana tecireremedza cipo catinaco cokunamata kuna Djehovha, ticaseenzesa mukana wese watinawo kuti tirekete naye.

15. Ngei tinodikana kuti “ameni” patinopedza kunamata?

¹⁵ Ngei tinodikana kuti “ameni” patinopedza kunamata? Soko rokuti “ameni” rinoreya “ndizvo kamare” kana kuti “ngazviitike.” Mushobo okupangidza kuti taida kamare kubhuya zvatabva kubhuya, kana kuti, tinotenderana nazvo. (Pisarema 41:13) Bhaibheri rinotifundisa kuti zvakanakawo kuti “ameni,” cimwoyo-mwoyo kana zvecizika panopera munamato unoizwa pakawandiwa kuitira kupangidza kuti tinotenderana ne zvarekethwa.—1 Makoronika 16:36; 1 Akorinti 14:16.

16. Kodi Djehovha anodaira kamare minamato yedu? Panganidzai.

¹⁶ Kodi Djehovha anodaira kamare minamato yedu? Honde, anodaira. Bhaibheri rinomudainza kuti “Mupurutani we munamato.” (Pisarema 65:2) Djehovha anopurutana uye anodaira minamato inobva pa mwoyo ye zviuru ne zviuru zve anhu, uye anozviita nge mishobo yakasiyana-siyana.

17. Djehovha anoseenzesa kudini ngirozi ne anhu ake pa nyika kuti adaire minamato yedu?

¹⁷ Djehovha anoseenzesa ngirozi ne anhu ake pa nyika kuti adaire minamato yedu. (Ahebheru 1:13, 14) Kune miezaniso yakawanda ye anhu akanamata ecida kubetserhwa kuzwisisa Bhaibheri, uye pa nguwa imwewo potoguma Apupuri a Djehovha. Bhaibheri rinopangidza kuti ngirozi dziri kubetserawo pa basa re kuparidza “masoko akanaka” mu nyika yese. (Erengai Zvakapangidzwa 14:6.) Uyewo akawanda edu takambonamata kuna Djehovha  tecikumbira kubetserhwa pamatambudziko edu kana paciro cataida, pedzepo takazobetserhwa ne hama kana hanzvadzi ye ciKristu.—Zvierengo 12:25; Tiyago 2:16.

18. Djehovha anoseenzesa kudini mwiya mucena wake ne Bhaibheri kuti adaire minamato yedu?

¹⁸ Djehovha anoseenzesa mwiya mucena wake kuti adaire minamato yedu. Patinonamata tecikumbira kuti Djehovha atibetsere kushingirira matambudziko edu, Djehovha angaseenzesa mwiya mucena wake kutitungamirira uye kutibambisa. (2 Akorinti 4:7) Djehovha anoseenzesawo Bhaibheri kuti adaire minamato yedu uye anotibetsera kusanangura zvakanaka. Patinoerenga Bhaibheri, tinokwanisa kuona tsamba dzicatibetsera. Djehovha anokwanisawo kuita kuti munhu umweni pa misangano apase mhinduro inotibetsera kana kuita kuti mukuru we ungano atibetsere ne tsamba ye Bhaibheri.—Agaratiya 6:1.

19. Ngei pamweni paya zveciita hingana Djehovha aripi kudaira minamato yedu?

¹⁹ Nguwa dzimweni tingarangarira kuti, ‘Ngei Djehovha asati adaira munamato yangu?’ Edzurirai kuti Djehovha anoziya nguwa yakasisira ne mushobo wokudaira minamato yedu. iyena anoziya zvatinoda. Tinodikana kurumbwa tecinamata kuti tipangidze kuti zvatiri kukumbira ndizvo zvatinoda kamare uye tipangidze kuti tinotenda maari. (Ruka 11:5-10) Nguwa dzimweni Djehovha anodaira minamato yedu nge mishobo yatainga tisikakariri. Ngo muezaniso, tingakumbira kuti Djehovha atibetsere pa matambudziko edu, asi pane kuabvisa, Djehovha angatipasa simba kuti tiashingirire.—Erengai Afiripi 4:13.

20. Ngei tinodikana kugara tecinamata kuna Djehovha?

²⁰ Cikomborero cikuro catinaco kunamata kuna Djehovha! Ngatigondei hedu kuti acatipurutana. (Pisarema 145:18) Uye kugara tecinamata kuna Djehovha zvecibva pa mwoyo kucaita kuti ushamwari wedu naye ubambe.