FUNDO 15
Mushobo Unoda Mwari kuti Timunamate
1. Ndiani angatibvunza mushobo wakanaka wokunamata Mwari?
MAGEREJA akawanda anoreketa kuti anofundisa zvirokwazvo ngo pamusoro pa Mwari. Asi izvi azvingaiti, ngokuti magereja anofundisa zviro zvakasiyana-siyana pamusoro pokuti Mwari ndiani uye kuti tinodikana kumunamata kudini. Tingaziya kudini mushobo wakanaka wokunamata Mwari? Djehovha ndiye basi anokwanisa kutibvunza manamatirhwe aanoda kuizwa.
2. Mungafunda kudini kunamata kunodiwa na Mwari?
2 Djehovha akatipasa Bhaibheri kuti tiziye mushobo waanoda kunamathwa. Ndiyo ndaa fundai Bhaibheri, uye Djehovha acamubetserai kuti muzwisise zvaanofundisa ngokuti anomudai.—Isaya 48:17.
3. Mwari anoda kuti tiitei?
3 Anhu amweni anoreketa kuti Mwari anotendera magereja ese, asi Djesu aazi kutifundisa izvona. Iyena akati: “Amunhupi wese anoti kandiri, Tenzi, Tenzi, acapinda mu Umambo we kudenga, asi uya basi anoita kuda ka Baba angu ari kudenga.” Ngokudaro tinodikana kuziya kuti ndekupi kuda ka Mwari uye tokuita. Zvakanaka maningi kuita izvona ngokuti Djesu akaezanisa anhu asikazwiri Mwari ne mabhinya, “asikateereri mutemo.”—Mateu 7:21-23.
4. Djesu akabhuyei nge zve kuita kuda ka Mwari?
4 Djesu akatingwadza kuti kana tikada kuita kuda ka Mwari ticasongana ne matambudziko. Iyena akati: “Pindai nge pa musuwo wakadodoka, ngokuti musuwo wakakura ne gwanza rakakura, zvinoendesa mukutsakatiswa, uye ajinji ndimo maari kupinda namo; asi musuwo wakadodoka ne gwanza rakatetepa, zvinoendesa ku upenyu, uye anhu padoko ndiwo ari kuriona.” (Mateu 7:13, 14) Gwanza rakatetepa, kana kuti manamatire anoda Mwari, zvinoendesa ku upenyu usikaperi. Gwanza rakakura, kana kuti manamatire asikadi Mwari, zvinoendesa mukuparadzwa. Asi Djehovha aadi kuti munhu upi hake afe. Anopasa munhu wese mukana wo kufunda nge zvake.—2 Pedru 3:9.
MUSHOBO UNODA MWARI KUTI TIMUNAMATE
5. Tingaziya kudini aya anonamata Mwari ngo mushobo waanoda?
5 Djesu akareketa kuti tinokwanisa kuziya anhu anonamata Mwari ngo mushobo waanoda. Tinokwanisa kuita izvona ngokukwarakwatisa zvaanotenda no zvaanoita. Iyena akati: “Mucaaziya ngomicero yaanobara.” Uye akatunhudzira kuti: “Muti wese wakanaka unobara micero yakanaka.” (Mateu 7:16, 17) Azvidi kureya kuti anhu anonamata Mwari aamboshaishi. Asi anamati a Mwari anogara eciedza kuita zvakanaka. Zvinopano ngatione zvinotibetsera kuziya aya anonamata Mwari ngo mushobo waanoda.
6, 7. Ngei kunamata ke zvirokwazvo kunodika kuenderana no zviri mu Bhaibheri? Muezaniso wa Djesu unotifundisei?
6 Anofundisa zviri mu Bhaibheri basi. Bhaibheri rinoti: “Matarhwa ese akafemerhwa na Mwari uye anobetsera pa kufundisa, pa kusumurura, pa kugadzirisa zviro, pakupanga zvakanaka, kuitira kuti munhu wa Mwari akwanise kubata basa, agare ne zvese zvaanoda pakuita mabasa ese akanaka” (2 Timoti 3:16, 17) Mu aphostori Pauro akatarira maKristu kuti: “Pamakatambira soko ra Mwari ramakazwa katiri, amuzi kuritambira hingana soko re anhu, asi hingana zvariri kamare, soko ra Mwari, iro riri kuseenzawo mamuri imwimwi atendi.” (1 Atesaronika 2:13) Kunamata ke zvirokwazvo kunodikana kuenderana no zviri mu Soko ra Mwari, Bhaibheri. Akubvi pamarangariro e anhu, pa tsika kana pa zviro zvimweni.
7 Zvese zvaifundisa Djesu aizvitora mu Soko ra Mwari. (Erengai Juau 17:17.) Kajinji aireketa pazvakatarhwa. (Mateu 4:4, 7, 10) Anamati a Mwari e zvirokwazvo anoteedzera muezaniso wa Djesu uye zvese zvaanofundisa anozvitora mu Bhaibheri.
8. Djesu akatifundisei nge zve kunamata Djehovha?
8 Anonamata Djehovha basi. Pisarema 83:18 inoti: “Imwimwi, muno zina rokuti Djehovha ndimwi mwega we Kumusoro-soro, kumusoro ke nyika yese.” Djesu aida kuti anhu anyase kuziya kuti Mwari we zvirokwazvo ndiani, uye akafundisa anhu zina ra Mwari. (Erengai Juau 17:6.) Djesu akati: “Djehovha Mwari wako ndiye waunodikana kunamata, uye ndiye ega waunodikana kuitira basa rakacena.” (Mateu 4:10) Ngokudaro, anamati e zvirokwazvo anoteedzera muezaniso wa Djesu. Anonamata Djehovha basi, anoseenzesa zina rake uye anofundisa amweni nge zve zina ra Mwari no zvaacatiitira.
9, 10. Tinopangidza kudini kuti tinodanana?
9 Anopangidza rudo re zvirokwazvo. Djesu akafundisa afundi ake kudanana. (Erengai Juau 13:35.) Azvinei ne kwatinobva, tsika dzedu, kana kuti tiri arombo kana apfumi. Rudo redu rinodikana kutibatanidza kutiita madzikoma no madziyaya. (Akorosi 3:14) Ndiyo ndaa atiendi ku hondo kana kuuraya anhu. Bhaibheri rinoti: “Ana a Mwari ne ana a Dhiyabhorosi anoonekwa ngeizvi: Munhu wese asikaiti zve unatsi aabvi kuna Mwari, uye ndizvo ndizvoo ne munhu asikadi hama yake.” Rinotiwo: “Tinodikana kudanana; atidikani kuita hingana Kaini uyo akabva kuno akashata, akauraya munukuna wake.”—1 Juau 3:10-12; 4:20, 21.
10 Tinoseenzesa nguwa yedu, simba redu, uye zviro zvatinazvo kuti tibetsere no kubambisa amweni. (Ahebheru 10:24, 25) Tinoitira anhu ‘ese zvakanaka.’—Agaratiya 6:10.
11. Ngei tinotenda kuti Djesu igwanza rinoendesa kuna Mwari?
11 Anozwira Djesu ngokuti ndiye gwanza rinoendesa kuna Mwari. Bhaibheri rinoti: “Apana umweni angaponesa anhu, ngokuti apana zina rimweni pasi pe denga rakapaswa anhu ringakwanisa kutiponesa.” (Zviito 4:12) Mufundo 5 ye bhuku rino, takafunda kuti Djehovha akatuma Djesu kuti ape upenyu wake kuti asudzunure anhu anozwira. (Mateu 20:28) Djehovha akasanangura Djesu kuti atonge hinga Mambo pa nyika. Ndiyo ndaa, Bhaibheri rinoreketa kuti tinodikana kuzwira Djesu kana tecida kurarama nokusikaperi.—Erengai Juau 3:36.
12. Ngei tisikapindiri mune zvematongerhwe e nyika?
12 Aapindiri mune zvematongerhwe e nyika. Djesu aazi kupindira mune zvematongerhwe e nyika. Paaitongwa, akati kune mutongi we Roma, Piratu: ‘Umambo wangu angowe pasi panopi.’ (Erengai Juau 18:36.) Hingana Djesu, tinogara takagondeka ku Umambo wa Mwari wo kudenga, ndiyo ndaa, azvinei nekatinogara atipindiri mune zvematongerhwe e nyika. Asi Bhaibheri rinotibvunza kuti tizwire “anhu ane simba,” kana kuti, atongi. (Aroma 13:1) Tinotondoedza mitemo ye mu nyika matinogara. Asi kana pano mutemo unopesana ne mitemo ya Mwari, tinoteedzera maphostori, awona akati: ‘Pakutanga tinodikana kuzwira Mwari hinga mutongi, pane kuzwira anhu.’—Zviito 5:29; Marko 12:17.
13. Anamati e zvirokwazvo anoparidzei ngezve Umambo wa Mwari?
13 Anoparidza kuti Umambo wa Mwari ndiwo basi ucagadzirisa matambudziko ari pa nyika. Djesu akareketa kuti “masoko akanaka e Umambo” aizoparidzwa mu nyika yese. (Erengai Mateu 24:14.) Apana utongi we anhu unokwanisa kuita zvaticaizirhwa no Umambo wa Mwari. (Pisarema 146:3) Djesu akatifundisa kukumbira Umambo wa Mwari paakati: “Umambo wenyu ngauuye. Kuda kenyu ngakuizwe pa nyika hingana zvakunoizwa kudenga.” (Mateu 6:10) Bhaibheri rinotibvunza kuti Umambo wa Mwari ucatsakatisa utongi wese we anhu uye kuti “ndiwo woga ucagara uripo nokusikaperi.”—Dhanyeri 2:44.
14. Munoona kuti ndiani anonamata Mwari ngo mushobo waanoda?
14 Mumasure mekufunda zviro zvinoizwa ne anamati e zvirokwazvo, dzibvunzisei: ‘Ndiani anofundisa zviri mu Bhaibheri basi? Ndiani anofundisa amweni ngezve zina ra Mwari? Ndiani anopangidza rudo re zvirokwazvo uye anotenda kuti Mwari akatuma Djesu kuti tiponeswe? Ndiani asikapindiri mune zvematongerhwe e nyika? Ndiani anoparidza kuti Umambo wa Mwari ndiwo basi ucapedza matambudziko ari pa nyika?’ Apupuri a Djehovha ndiwo basi anoita izvona.—Isaya 43:10-12.
MUCAITEI?
15. Tinodikana kuitei kana tecida kuti Mwari atende kunamata kedu?
15 Azvikwani kutenda basi kuti Mwari ariyo. Ne madhimoni anototendawo kuti Mwari ariyo, asi aamuzwiri. (Tiyago 2:19) Kana tecida kuti Mwari atende kunamata kedu, atidikani basi kutenda kuti Mwari ariyo asi tinodikanawo kuita zvaanotibvunza kuti tiite.
16. Ngei tinodikana kusiyana ne magereja ekunyepa?
16 Kuti Mwari atende kunamata kedu, tinodikana kusiyana ne magereja ekunyepa. Muphorofiti Isaya akatara kuti: ‘Budai mariri, rumbwai makacena.’ (Isaya 52:11; 2 Akorinti 6:17) Ndiyo ndaa tinodikana kusiyana ne zvese zvino cokuita ne kunamata kokunyepa.
17, 18. “Bhabhironi Guru” cinyi, uye ngei munodikana kubuda mariri nokukasika?
17 Kunamata kokunyepa cinyi? Kunamata kwese kunofundisa kunamata Mwari ngo mushobo unopesana ne Soko ra Mwari. Bhaibheri rinodainza magereja ese ekunyepa kuti “Bhabhironi Guru.” (Zvakapangidzwa 17:5) Ngei ecidainzwa kudaro? Mumasure me Ndambi huru ye mazuwa a Nowa, mafundisire ekunyepa akawanda akatangira mu thaundi re Bhabhironi. Mafundisire aona akazobararika mu nyika yese. Ngo muezaniso, anhu aigara mu Bhabhironi ainamata madzimwari atatu akabatana. Nyamasiwo, magereja akawanda anofundisa kuti Mwari mubatanidzwa we anhu Atatu, asi Bhaibheri rinobudisa pamhene kuti kuno Mwari umwe basi we zvirokwazvo, Djehovha, uye kuti Djesu Mwana wake. (Juau 17:3) Anhu aigara mu Bhabhironi aitendawo kuti kana munhu akafa ciripo caibuda corumbwa cecirarama uye kuti ciroco cingatotambudzika mu gehena. Asi uku kunyepa.—Onai pakazwi Nyasai Kuzwisisa n.º 13, uye 16.
18 Mwari akareketa kuti magereja ekunyepa acaparadzwa mbai-mbai pano. (Zvakapangidzwa 18:8) Muri kuona here kuti ngei kusiyana ne magereja ekunyepa zvinodikana kuithwa nokukasika? Djehovha Mwari anoda kuti muzviite pacine nguwa.—Zvakapangidzwa 18:4.
Kana mukanamata Djehovha makabatana ne anhu ake mucagara mu mhuri inooneka pasi pese
19. Kana mukasanangura kuseenzera Djehovha, acamubetserai kudini?
19 Kana mukasanangura kusiya magereja ekunyepa kuti museenzere Djehovha, anyaukama enyu kana shamwari dzenyu dzingatama kuzwisisa kuti ngei muri kudaro kana kutomutambudzai. Asi Djehovha aazomusiyi. Mucagara mu mhuri inooneka pasi pese ye mamirionji e anhu anodanana zve zvirokwazvo, uye mucagara ne kariro yokurarama nokusikaperi mu nyika ipsva ya Mwari. (Marko 10:28-30) Anhu ari kumuphikisai zvino uno kuti musaseenzere Djehovha nokuhamba ke nguwa kana kuzodawo kufunda Bhaibheri.
20. Ngei zvakanaka maningi kunamata Mwari ngo mushobo waanoda?
20 Mbai-mbai pano, Mwari acapedza ushaishi wese uye Umambo wake ucatonga pa nyika pano. (2 Pedru 3:9, 13) Iyona icagara nguwa inopfadza maningi! Anhu ese acanamata Djehovha ngo mushobo waanoda kuti timunamate. Ndiyo ndaa zvakanaka maningi kuti muite masimba ari ese kuti munamate Mwari ngo mushobo waanoda.
