PAMUNOERENGA jornari, pamunoona terevhizori, pamunopurutana radhiyo, munoona kana kuzwa zvakaringana ne ubhinya, hondo uye ugandanga. Pamweni imwimwi pacenyu mune nhenda iri kumushuphai kana makafirhwa nge munhu wamaida.

Dzibvunzisei kuti:

• Izvi ndizvo zvaida Mwari kuti zviitike kandiri ne ku mhuri yangu here?

• Cinyi cingandibetsera kushingirira matambudziko angu?

• Kucazooneka runyararo re zvirokwazvo here?

Bhaibheri rinodaira mibvunzo ii.

• Anhu anonga asikacarhwadziwi, kucembera, kana kufa.—Zvakapangidzwa 21:4

• “Munhu akaremara acamhuka hingana dzoma.”—Isaya 35:6

• “Madziso e mapofu acafunguka.”—Isaya 35:5

•  Akafa acazoraramazve.—Juau 5:28, 29

• Apana acazorhwara.—Isaya 33:24

• Anhu ese pa nyika acagara ane zvekurhya zvakawanda.—Pisarema 72:16

Zviri nyore kurangarira kuti zvamapedza kuerenga azvizomboitiki. Asi Mwari waapadhuze kuti adzadzise zvaakapikira kuita pa nyika, uye Bhaibheri rinopanganidza kuti acazviita kudini.

Bhaibheri arindoreketi izvona basi. Rinotibvunza zvatinodikana kuziya kuti tinyase kupfara mu upenyu uye kuti tidakadzwe no upenyu pari zvino. Cimborangarirai zviro zviri kumunesai. Izvi zvingabatanidza kutama mare, zvineso mu mhuri, kurhwara kana kufirhwa no munhu wamunoda. Bhaibheri rinokwanisa kumubetserai kushingirira zvineso izvi, uye rinokwanisa kumunyaradzai nge kudaira mibvunzo yakaita hingana ii:

• Ngei tecishuphika?

• Tingashingirira kudini matambudziko edu?

• Mhuri yedu ingakwanisa kupfara here?

• Kuriyo katinoenda here kana tafa?

• Ticazomboonazve here anhu atinoda akafa?

• Ngei tecigonda kuti Mwari acaita zvese zvaakapikira?

 Kuerenga kenyu bhuku rino, kunopangidza kuti munoda kuziya zvinofundiswa no Bhaibheri. Bhuku rino ricamubetserai. Rino ndima dzino mibvunzo dzicamubetserai kuzwisisa zvakanaka Bhaibheri. Anhu akawanda ari kupfara ngo kubetserhwa kaarikuizwa no Apupuri a Djehovha kuti azwisise Bhaibheri. Tino rugondo rekuti mucabetserhwawo. Mwari ngaamukomborerei pamunonga mecifunda Bhaibheri meciona zvarinofundisa!