FUNDO 3
Ngei Mwari Akasika Nyika no Anhu?
1. Mwari aidei katiri?
MWARI paakasika mwanarume no mwanakadzi okutanga, Adhamu na Evha, aida kuti agare no upenyu wakanakisisa. Djehovha akaapasa munda we maruwa wakarungama kuti agaremo uye aida kuti abare ana no kucengeta zvinyama. Awona aidikana kuita kuti nyika yese igare paradhizo hingana zvainga zvakaita munda we maruwa. Izvi ndizvo zvaida Mwari uye aciri kuzvida katiri.—Genesi 1:28; 2:8, 9, 15, onai pakazwi Nyasai Kuzwisisa n.o 5.
2. (a) Ngei tecithemba kuti anhu acazorarama mu paradhizo? (b) Ndiani acararama mu paradhizo? Uye ke nguwa yakareba kudini?
2 Mu maonero enyu, ricaguma here zuwa rekuti ticazorarama mu paradhizo? Djehovha anogondesa kuti honde. Mwari nguwa dzese anoita zvaanobhuya. (Isaya 46:9-11; 55:11) Zvaida Mwari azvizi kucinja uye zve zvirokwazvo zvicaitika. Djehovha akareketa kuti akasika nyika ngokuti pane zvaaida. Aazi “kuisika kuti igare isina ciro.” (Isaya 45:18) Akaisika kuti anhu ararame imona. Asi Mwari anoda kuti anhu akadini ararame pa nyika pano? Uye ke nguwa yakareba kudini? Bhaibheri rinoti: “Anhu anatsi [kana anhu anozwira] acagara nhaka ye nyika uye acararama imona nokusikaperi.”—Pisarema 37:29; Zvakapangidzwa 21:3, 4.
3. Mubvunzo upi unokwanisa kudairhwa no Bhaibheri basi?
3 Asi nyamasi uno tinorhwara uye tinofa. Mu mbuto dzakawanda anhu anorhwisana uye anourayana. Zviri pamhene kuti andizvopi zvaida Mwari. Hino, ngei zviro azviripi ngo mushobo waida Mwari? Bhaibheri ndiro basi rinokwanisa kudaira mubvunzo uwona.
MUZONDI WA MWARI
4, 5. (a) Mu munda we Edheni, ndiani akareketa na Evha eciseenzesa nyoka? (b) Zvinoitika kudini kuti munhu akathembeka ozogara mbavha?
4 Bhaibheri rinoreketa kuti Mwari ano muzondi unozwi “Dhiyabhorosi uye Sathani.” Muzondi uu akaseenzesa nyoka kuti arekete na Evha mu munda we Edheni. (Zvakapangidzwa 12:9; Genesi 3:1) Sathani akaita kuti Evha arangarire kuti nyoka ndiyona yaireketa.—Onai pakazwi Nyasai Kuzwisisa n.o 6.
5 Asi muzondi uu wakabvepi? Kodi Mwari akasika Sathani, Dhiyabhorosi here? Haiwa! Mwari akasika ngirozi dzakanaka dzairarama ku denga painga asati asika nyika kuti Adhamu na Evha agaremo. (Djobho 38:4, 7) Ngirozi imweni yakanaka yakadzicinja yoga yozogara Dhiyabhorosi. Izvi zvingaitika kudini no ngirozi kamare? Cimborangarirai: Munhu akathembeka anozoguma kudini pakugara mbavha? Apana munhu anobarhwa ari mbavha. Asi kana munhu ecisirira ciro cisiripi cake orumbwa ocicirangarira, kuda kaanociita kunobambirira kukura. Hino, pakazooneka mukana iyena anoba. Izvi ndizvo zvinoitika ku munhu ainga akathembeka ozogara mbavha.—Erengai Tiyago 1:13-15; onai pakazwi Nyasai Kuzwisisa n.o 7.
6. Zvakaitika kudini kuti ngirozi imweni igare muzondi wa Mwari?
6 Izvi ndizvo zvakaitika no ngirozi iya. Djehovha akasika Adhamu na Evha uye akaabvunza kuti abare ana kuti ‘adzadze nyika.’ (Genesi 1:27, 28) Anhu ese aizonamata Mwari. Pamweni ngirozi iyona yakarangarira kuti: ‘Pane kunamata Djehovha, anhu ese aizonamata inini!’ Nzero ii yainga yakashata. Asi ngirozi iyona yakarumbwa yecirangarira nge zvazvo. Yakabambirira ino cidakadaka cokuda kunamathwa kunodikana kuizirhwa Djehovha basi. Ndiyo ndaa, yakazonyepera Evha ikamucengedza. (Erengai Genesi 3:1-5.) Payakaita izvi, yakagara Sathani Dhiyabhorosi, muzondi wa Mwari.
7. (a) Ngei Adhamu na Evha akafa? (b) Ngei isusu tinocembera uye tinofa?
7 Mwari ainga akarambidza Adhamu na Evha kurhya mucero umweni uye akaabvunza kuti kana akaurhya aizofa. Asi awona aazi kuzwira Mwari. (Genesi 2:17; 3:6) Ici ndico citema caakaita. Paakaita citema ici, akagara anhu asikazi kukwana uye nokuhamba ke nguwa akafa hinga zvakabhuiwa na Djehovha kuti zvaizoitika. (Genesi 3:17-19) Ana a Adhamu na Evha akazobarhwa masure mokuita citema. Ndiyo ndaa ainga ari anhu asikazi kukwana uye akazofawo. (Erengai Aroma 5:12.) Kuti tizwisise izvi ngo mwazvo, ngatirangarire nge zve muezaniso umweni. Rangarirai kuti muri kuda kudhinda mabhuroko, asi cidhindo camuri kuda kudhinda naco cakabhenda. Mabhuroko ese anoitirhwa mu cidhindo icona anobudawo “akabhenda.” Ngo mushobo umwewo, Adhamu paakasiya kuzwira Mwari akagara munhu ano citema. Zvaiita hingana akabhenda. Tese takabva kuna Adhamu, ndiyo ndaa tinobarhwa tino citema. Isusu tinocembera no kufa ngokuti tiri anhu asikazi kukwana uye tino citema.—Aroma 3:23; onai pakazwi Nyasai Kuzwisisa n.o 8.
8, 9. (a) Kodi Sathani aidei? (b) Ngei Djehovha aazii kuparadza ciripo-ripoco aya akamupandukira?
8 Sathani aida kuti Adhamu na Evha arangarire kuti Mwari anonyepa. Aidawo kuti arangarire kuti Mwari mutongi akashata asikadi kuti zviro zviahambire zvakanaka. Iyena akabhuya kuti anhu aizobudirira kana akadzitonga oga uye kuti Adhamu na Evha aizokwanisa kudzisanangurira oga zvakanaka no zvakashata. Adhamu na Evha paakatama kuzwira Mwari, akabatana na Sathani pakupandukira Mwari. Hino, Djehovha akaitei? Aikwanisa kuparadza ciripo-ripoco ese akumupandukira. Asi aazi kuzviita. Ngei? Ngokuti zvainga zvisikadi kupangidza kuti Sathani ainyepa.
9 Hino, pane kuparadza ciripo-ripoco anhu akamupandukira, Djehovha akaapasa nguwa kuti apangidze cinyi cinoitika ku anhu anoramba utongi wake. Izvona zvaizopangidza pamhene kuti Sathani anonyepa uye kuti Djehovha ndiye anoziya zvakatinakira. Ticafunda zvakawanda ngo pamusoro pazvo mu Fundo 11. Asi munoonawo kudini zvakaizwa na Adhamu na Evha? Djehovha akapasa Adhamu na Evha zvese zvaaida. Akaapasa upenyu wakakwana, mbuto yakanaka yokugara no basa raiyadakadza. Asi Sathani apana kana ciro cimwe cakanaka cakaaitira. Munoona kuti akaita zvakanaka here ngo kupurutana Sathani pane kuzwira Mwari? Kudai mainga muri imwimwi maida kuitei?
10. Tese tinodikana kusanangurei?
10 Tese dinodikana kusanangura cokuita, hingana Adhamu na Evha. Tinodikana kusanangura kuti ticagara ku dii ra Djehovha here kana ku dii ra Sathani. Ramangwana redu ricabva pakuti tasanangura ani. Kana tikasanangura kuzwira Djehovha tosiya kuti atitonge, ticapangidza kuti Sathani munyepi. (Pisarema 73:28; erengai Zvierengo 27:11.) Anhu akawanda aasananguri kugara ku dii ra Djehovha. Anhu aya anosanangura kutongwa no mutongi we nyika ino. Asi andiepi Mwari ari kutonga nyika ino here? Haiwa.
NDIANI ARI KUTONGA NYIKA INO?
Kudai umambo wese we nyika usiripi wa Sathani, iyena aidadi kamare kuupasa Djesu here?
11, 12. (a) Kuedza kakaita Sathani kupasa Djesu umambo wese we nyika kunotifundisei? (b) Bhaibheri rinopangidza kudini kuti Sathani ndiye ari kutonga nyika ino?
11 Djesu aimuziya munhu ari kutonga nyika ino. Zuwa rimweni Sathani akamupangidza “umambo wese we nyika ne mbiri yawo.” Hino, Sathani akagondesa Djesu kuti: “Ndicakupasa zvese izvi kana ukagodama wondinamata kamwe basi.” (Mateu 4:8, 9; Ruka 4:5, 6) Kudai umambo wese wainga usiripi wa Sathani, iyena aidadi kuupasa Djesu here? Haiwa. Sathani aida kupasa Djesu utongi wese ngokuti nge wake.
12 Pamweni mungarangarira kuti: ‘Zvakaitika kudini kuti Sathani agare mutongi we nyika ino? Andiyepi Djehovha we Masimba Ese, uya akasika zviro zvese?’ (Zvakapangidzwa 4:11) Honde, ndiyena. Asi, Bhaibheri rinopangidza kuti Sathani ndiye ari kutonga nyika ino. Ngo muezaniso, Djesu akabhuya kuti Sathani ndiye “mutongi we nyika.” (Juau 12:31; 14:30; 16:11) Muphostori Pauro akadainza Sathani, Dhiyabhorosi kuti “mwari we nyika ino.” (2 Akorinti 4:3, 4) Uye muphostori Juau akareketa kuti “nyika yese iri mu simba re wakashata” wakashata wakhona ndi Dhiyabhorosi.—1 Juau 5:19.
NYIKA YA SATHANI ICAPARADZWA KUDINI?
13. Ngei tecida nyika yakanaka?
13 Tiri kurarama mu nyika iri kubambirira kushata. Tiri kuona hondo dzeciitika uye ubhinya mu mbuto dzese. Anhu akawanda aathembeki uye amweni matsotsi. Kunyazi hazvo anhu amweni ecimboedza kuda kupedza matambudziko aya, asi apana munhu anokwanisa kuzviita. Asi mbai-mbai pano, Mwari acapedza ushaishi wese mu hondo inozwi Amagedhoni. Photopo, nyika icagara mbuto yakanaka.—Zvakapangidzwa 16:14-16; onai pakazwi Nyasai Kuzwisisa n.º 9.
14. Djehovha akasanangura ani kuti agare Mambo we Umambo wake? Bhaibheri rakabhuyei nge zva Djesu?
14 Izvi zvicacinjwa kudini? Peciseenzeswa Umambo wa Mwari. Umambo wa Mwari utongi uri kudenga. Djehovha akasanangura Djesu Kristu kuti agare Mambo we Umambo Wake. Kubvira no kare-kareko Bhaibheri rainga rakatoreketa kuti Djesu aizotonga hinga “Mutongi we Runyararo” uye kuti Umambo wake waizogara nokusikaperi. (Isaya 9:6, 7) Djesu akafundisa ateereri ake kuti akumbire utongi uwona paakati: “Umambo wenyu ngauuye. Kuda kenyu ngakuizwe pa nyika hingana zvakunoizwa kudenga.” (Mateu 6:10) Mu fundo 8, ticafunda zvinyi zvicaita Umambo wa Mwari kuti ugare wega basi wecitonga nyika yese. (Erengai Dhanyeri 2:44.) Umambo wa Mwari ucaita kuti nyika yese igare paradhizo.—Onai pakazwi Nyasai Kuzwisa n.o 10.
NYIKA IPSVA YAA PADHUZE!
15. Cinyi cinozwi “nyika ipsva”?
15 Bhaibheri rinogondesa kuti mberiyo kucagara no “matenga mapsva no nyika ipsva” uye “imona mucagara mune unatsi.” (2 Pedru 3:13; Isaya 65:17) Nguwa dzimweni, Bhaibheri rinoseenzesa soko rokuti “nyika” kana recida kureketa nge zve anhu anogara pa nyika. (Genesi 11:1) Bhaibheri parinoreketa nge zve “nyika ipsva” rinonga risikareketi nge zve mbuto imweni ipsva. Hino, cinyi cinozwi nyika ipsva? Ndi anhu anozwira Mwari uye akakomborerhwa naye okuti acararama mu paradhizo.
16. Mwari acapasa cipo cipi ku aya anonga ari mu nyika ipsva? Cinyi catinodikana kuita kuti titambire cipo icona?
16 Djesu akagondesa kuti Mwari acapasa “upenyu usikaperi” kune aya anonga ari mu nyika ipsva, kana kuti, mu paradhizo. (Marko 10:30) Hino tinodikana kuitei kuti titambire cipo ici cakanakisisa? Erengai bhuku ra Juau 3:16 uye 17:3 kuti mugumire mhinduro yakhona. Asi upenyu ucagara wakadini mu Paradhizo? Ngationei zvinobhuiwa no Bhaibheri.
17, 18. Bhaibheri rinobhuyei nge zve runyararo no rucengeteko mu paradhizo?
17 Ushaishi, hondo, ubhinya no anhu anoputsa mutemo zvicapera. Bhaibheri rinoti: “Anhu anoita zvakashata aacazoonekizve.” (Pisarema 37:10, 11) Mwari acapedza “hondo mu nyika yese” (Pisarema 46:9; Isaya 2:4) Mu paradhizo anhu ese acada Mwari uye acamuzwira. Ticagara mu runyararo nokusikaperi.—Pisarema 72:7.
18 Anhu a Djehovha acagara asina cokuthya. Mu nguwa yekare, aIsraeri aidziirirhwa paaizwira Mwari. Ainga asikadikani kuthya ciro cipi haco. (Revhitiko 25:18, 19) Mu Paradhizo apana caticathya. Nguwa dzese tinonga takacengeteka.—Erengai Isaya 32:18; Mika 4:4.
19. Tinoziya kudini kuti anhu ese acagara no zvokurhya zvakawanda mu paradhizo?
19 Anhu ese acagara no zvokurhya. Bhaibheri rinogondesa kuti nyika icamera ‘zvokurhya zvakawandisisa.’ (Pisarema 72:16) Djehovha “Mwari wedu acatikomborera.”—Pisarema 67:6.
20. Zvipikirhwa zvipi zve Bhaibheri zvinopangidza kuti nyika yese icagara paradhizo?
20 Nyika yese icagara paradhizo. Anhu ese acagara no nyumba dzakarungama. Kwese kwaticaringira ticaona basi minda ye maruwa yakarungama. Anhu anotsakatisa nyika, kana kuti, anoikuwadza aacazoonekizve. (Erengai Isaya 65:21-24; Zvakapangidzwa 11:18.) Nyika yese icarungama hingana munda we maruwa we Edheni. Djehovha acarumbwa ecitipasa zvese zvatinoda. Bhaibheri rinoti nge zva Djehovha: “Munofungura nyara yenyu mogutisa zvido zve zviro zvese zvinorarama.”—Pisarema 145:16.
21. Tinoziya kudini kuti anhu no zvinyama acagarisana zvakanaka?
21 Anhu acagarisana zvakanaka no zvinyama. Zvinyama azvicarumizve anhu. Ana adoko aazothyizve zvinyama, kunyazi zvinyama zvinothyisa nyamasi uno.—Erengai Isaya 11:6-9; 65:25.
22. Djesu acaitirei aya anorhwara?
22 Matenda acapera. Djesu paainga ari pasi pano, akarapa anhu akawanda. (Mateu 9:35; Marko 1:40-42; Juau 5:5-9) Hinga Mambo we Umambo wa Mwari Djesu acarapa munhu wese. Apana munhu unozoti: “Ndiri kurhwara.”—Isaya 33:24; 35:5, 6.
23. Mwari acaitirei aya akafa?
23 Akafa acazoraramazve. Mwari anogondesa kumutsa anhu ajinji akafa. Izvi zviri kuda kureya kuti awona acararamazve. Bhaibheri rinoti: “Kucaoneka kumuka ke anhu anatsi no ashaishi.”—Erengai Juau 5:28, 29; Zviito 24:15.
24. Munozwa kudini nge zve kurarama mu Paradhizo?
24 Tese tinodikana kusanangura. Djehovha acapasa ramangwana rakanakisisa ku aya anosanangura kumuseenzera. Djesu aiziya nge zve ramangwana irona. Mwanarume umweni paainga ari dhuze kuda kufa, akakumbira Djesu kuti asazomukanganwewo, Djesu akamugondesa kuti: “Unozonga une inini mu Paradhizo.” (Ruka 23:43) Djesu Kristu acaita kuti zvipikirhwa zvakanakisisa zva Mwari zviitike. Hino zvakadini kumbofunda zvakawanda nge zva Djesu?
