Kune anhu akawanda akanaka akabararika mu zvinamato zvese. Kuziya kuti Mwari anoona anhu aya uye anorangarira nge zvawo, zve zvirokwazvo aya ndi majinji akanaka. Asi zvinotsukwarisa kuona kuti zvinamato zvinoseenzeswa mukuita zvakashata. (2 WaKorinte 4:3, 4; 11:13-15) Maererano no majinji anopeperuswa zvinamato zvimweni zviri kutopindirawo pa kuita ugandanga, kuurayiwa kwe anhu, hondo uye kuita zvemaponde no zviana zvidoko. Izvi zvinotsukwarisa maningi anhu anotenda Mwari no mwoyo wese!—Erengai Mateu 24:3-5, 11, 12.

Kunyazi hazvo cinamato ce cokwadi cinokudza Mwari, zvinamato zvekunyepera zvinomunyangadza. Zvinamato izvi zvinofundisa ndangariro dzisiripi mu Bhaibheri, kutobatanidzawo no fundo dze manyepo pamusoro pa Mwari uye pamusoro pe akafa. Asi Djehovha arikuda kuti anhu ese aziye cokwadi nge zvake.—Erengai Ezekieri 18:4; 1 Timoti 2:3-5.

Mwari aacengedzwi nge zvinamato zvinoreketa kuti zvinomuda, asi ngo dii rimweni zvinoda nyika ya Sathani. (Tiyago 4:4) Soko ra Mwari rinodainza zvinamato zvese zvekunyepera kuti “Bhabhironi Guru.” Bhabhironi rainga riri guta re kare-kare imona ndimo makatangira cinamato ce kunyepera, ndambi huru ye nguwa ya Nowa yaa yapera. Nokukasika Mwari acaparadza zvinamato zvese zvirikunyepera no kudvinyirira anhu.—Erengai Zvakapangidzwa 17:1, 2, 5, 16, 17; 18:8.

Kune masoko amweni anopfadza. Djehovha aakanganwi anhu akanaka acakabararika mu zvinamato zve kunyepera zviri mu nyika yese. Djehovha arikufundisa cokwadi anhu  ese aya uye ari kuwabatsira kuti abude mu zvinamato zve kunyepera.—Erengai Mika 4:2, 5.

Djehovha anorangarira nge zve aya anoda kuziya cokwadi cake uye kuita zvakanaka. Iyena anokohomedza anhu aya kuti abude mu zvinamato zvo manyepo. Anhu anoda Mwari akagadzirira kuita cinjo ipi neipi kuitira kuti apfadze Mwari.—Erengai Zvakapangidzwa 18:4.

Mu zana re makore e kutanga, kainga kune anhu akanaka akazwa masoko akanaka ecibuda kuna Mwari, aiparidzirwa no maphositori, uye akaatambira no mupfaro. Djehovha wakaafundisa mararamire mapsva anopfadza, ane donzo uye ane kariro. Awona mufanikidzo wakanaka kuna isusu ngokuti wakatenda soko ra Mwari uye wakakanda Djehovha pa mbuto yokutanga mu upenyu mawo.—Erengai 1 WaTesaronika 1:8, 9; 2:13.

Djehovha anotambira mu mhuri yake ye anamati anhu aya anobuda mu zvinamato zve kunyepera. Kana ukatenda mhiko yakanaka ya Djehova wobuda mu cinamato ce kunyepera, iwewe ucawina ushamwari naye, mhuri ipsva yakadzara no anamati a Djehovha ane rudo uye upenyu usikaperi.—Erengai Marko 10:29, 30; 2 WaKorinte 6:17, 18.

Paacaparadza zvinamato zve kunyepera, Mwari acazorodza anhu anodvinyirirwa mu nyika yese. Zvinamato zve kunyepera izvi azvicazocengedzizve kana kuparadzanisa anhu. Anhu ese acabatana mukunamata Mwari umwe basi we cokwadi.—Erengai Zvakapangidzwa 18:20, 21; 21:3, 4.