Kusiyana no munhu hake, Djesu wakararama ku denga se munhu we mweya asati abarwa pa Nyika pano. (Juau 8:23) Iyena ndiye akatanga kusikwa na Mwari uye wakabatsira kusika zviro zvimweni zvese. Djesu ndiye ega basi wakasikwa na Mwari kamare pasina wakamubatsira, ndiyo ndaa zvakasisira kuti adainzwe Mwana wa Mwari “wakabarwa ari ega.” (Juau 1:14) Djesu wakaseenza se mubudisi we masoko a Mwari uye ndiyo ndaa iyena unodainzwazve kuti “isoko.”—Erengai Zvierengo 8:22, 23; WaKorosi 1:15, 16.

Mwari wakatuma Mwana wake pa Nyika pano ngokumucinja upenyu wake ku denga kuti apinde mu ndani me imwe mhandwe ye ciDjuda inozwi Mariya. Nokudaro, Djesu aazi kuwa na baba we pa Nyika. (Ruka 1:30-35) Iyena wakawiya pa Nyika 1) kuti afundise zvirokwazvo zvakaringana na Mwari, 2) kuti atipangidze muezaniso we kuita cido ca Mwari kunyazi tecibatana ne zvinetso, uye 3) kuti ape upenyu wake wakakwana se “rusudzunuro.”—Erengai Mateu 20:28.

Musudzunuro ndi mutengo unoriphwa kuti pasudzunurwe munhu anenge ari pakutyiswa no rufu. (Ekisodho 21:29, 30) Rufu uye kucembera zvainga zvisiripi mucinangwa cokutanga ca Mwari kune anhu. Tinozviziya kudini zvinezvo? Mwari wakabhuya kune mwanarume okutanga, Adhamu, kuti dai iyena akaita ciya cinodanzwa kuti “citema” aizofa.  Kudai Adhamu asikazi kuita citema, cingozvo aizofa. (Genesi 2:16, 17; 5:5) Maererano no Bhaibheri, rufu “rakapinda” mu nyika ngo ndaa ya Adhamu. Zvadaro, Adhamu wakapa citema uye muphanico we rufu, ku ana ake ese. Isusu tinoda kusudzunurwa kuitira kuti titsudzunurwe pa rufu ratakagara nhaka ya Adhamu.—Erengai WaRoma 5:12; 6:23.

Ndiani waidikana kuripa musudzunuro kuti tisudzunurwe pa rufu? Rufu muphanico we zvitema zvedu. Ngo ndaa yokusakwana kwedu atikwanisi kuripa kuti tisudzunure umweni munhu.—Erengai Pisarema 49:7-9.

Kusiyana naisusu, Djesu wainga akakwana. Ndiyo ndaa, iyena wainga asikadikanipi kufira zvitema zvake—ngokuti aana citema. Djesu wakafira zvitema zvedu. Mwari wakapangidza rudo rukuru kune anhu ngo kutuma Mwana wake kuti atifire. Djesu wakapangidzawo rudo kuna isusu ngokuzwira Baba wake uye nokupasa upenyu wake ngo ndaa yo zvitema zvedu.—Erengai Juau 3:16; WaRoma 5:18, 19.

Onai vhidhiyo Ngei Djesu Akafa?

Paainga ari pa Nyika, Djesu wakarapa atenda, wakamutsa akafa uye akarerusa kushuphika kwe anhu. Ngokuita izvi, wakapangidza zvaacazoita pa nguwa ye mberi kune anhu ese anopurutana Mwari. (Mateu 15:30, 31; Juau 5:28) Djesu paakafa, Mwari wakamumutsa se munhu we ku mweya. (1 Pedru 3:18) Zvaa zvadaro Djesu wakaetsera padii re muoko kwawo wa Mwari dakara Djehovha amupase simba rokuti atonge sa Mambo mu Nyika yese. (WaHebheru 10:12, 13) Nyamasi uno, iyena uri kutonga ku denga, uye ateereri ake ari kuziisa “masoko akanaka,” kana kuti masoko anopfadza mu Nyika yese.—Erengai Dhanyeri 7:13, 14; Mateu 24:14.

Nokukasika, Djesu acaseenzesa simba rake sa Mambo kuti apedze kushuphika kwese, ne anhu anobara matambudziko. Ese anotenda muna Djesu ngokumuzwira acadakadzwa no upenyu mu paradhiso pa Nyika.—Erengai Pisarema 37:9-11.