FUNDO 6
Ikariro ipi iripo nokuda ke anhu akafa?
1. Ndiapi masoko akanaka aripo nokuda ke anhu akafa?
Djesu paakaguma ku Bhetania duze no Djerusarema, shamwari yake Razaro yainga yafa kwe mazuwa 4. Djesu wakaenda pa guwa rake na Marita uye Mariya, madziyaya a Razaro. Pa nguwa dodori basi pakaungana djikitira re anhu ipona. Unokwanisa kurangaridza kupfara kwakaita Marita na Mariya paakaona Djesu ecimutsa Razaro here?—Erengai Juau 11:21-24, 38-44.
Marita wainga waakuaziya masoko akanaka nokuda ke anhu akafa. Iyena waiziya kuti Djehovha aizomutsa akafa kuti araramezve pa Nyika pano.—Erengai Djobo 14:14, 15.
2. Kodi ndiapi magarire e zviro e anhu akafa?
Mwari wakati kuna Adhamu: “iwewe uri bukuta uye ku bukuta ucahwirirazve.”—GENESI 3:19.
Anhu akaumbwa ne bukuta re mavhu. (Genesi 2:7; 3:19) Isusu atiripi mweya inogara mukati mo muiri we nyama. Tiri zvisikwa zve nyama ndiyo ndaa apana ciro cirimukati medu cinobuda patinofa. Patinofa urozvi wedu unofawo uye ndangariro dzedu no mazwire edu anotsakatikawo. Ndiyo ndaa Razaro paakamutswa aazi kureketa cinyi caiitika naye paainga akafa ngokuti anhu akafa apana caanoziya.—Erengai Pisarema 106:4; Muparidzi 9:5, 6, 10.
Kodi ndizvodi kamare kuti Mwari unocinyusa anhu no muriro paanonga afa? Sezvo Bhaibheri rinoti anhu akafa apana caanoziya, hino zviri pamhene kuti fundo yokuti anhu acapiswa no muriro ndee manyepo uye inosvipisa Mwari. Marangariro aya okuti Mwari unocinyusa anhu no muriro anomunyangadza.—Erengai Djeremiya 7:31.
3. Kodi anhu akafa anokwanisa kureketa naisusu here?
Anhu akafa aareketi kana kuzwa. (Pisarema 115:17) Asi dzimweni ngirozi dzakashata pamweni dzinoreketa no anhu, dzecinyepedzera kuita hingana anhu akafa. (2 Pedru 2:4) Djehovha anorambidza kuedza kureketa no anhu akafa.—Erengai Dheuteronomiyo 18:10, 11.
4. Ndiyani acaramazve?
Zviuru zve zviuru zve anhu akafa acararamazve pa Nyika. Kutobatanidzawo aya asikazi kuziya Mwari uye akaita zviro zvakashata acamutswawo.—Erengai Ruka 23:43; Zviito 24:15.
Aya acamutswa acafunda cokwadi ca Mwari uye otenda muna Djesu ngo kumuzwira. (Zvakapangidzwa 20:11-13) Aya acararamazve uye woita zvakanaka acadakadzwa no upenyu usikaperi pa Nyika.—Erengai Juau 5:28, 29.
5. Kodi kumutswa ke anhu kunotifundisei nge zva Djehovha?
Mwari wakaita kuti kariro nokuda ke akafa ioneke paakatuma Mwana wake kuti atifire. Nokudaro kumutswa ke anhu kunotifundisa nge zve rudo uye nyasha isikazi kusisira ya Djehovha. Anhu paacazomutswa, ndiyani maka-maka waunoda kuzoona?—Erengai Juau 3:16; WaRoma 6:23.
