Djehovha, Mwari we masoko akanaka, ndi Mwari anopfara uye anoda kuti mhuri dzipfare. (1 Timoti 1:11) Mucato wakatagwa naye. Mucato uri pamutemo unobatsira kuti mhuri ipfare ngekuti unobatsira kuti arorani ne ana awo agare akacengeteka. Makristu anodikana kureremedza mitemo ye nyika yaanorarama yakaringana no micato dziri pamutemo.—Erengai Ruka 2:1, 4, 5.

Mwari anoona kudini mucato? Iyena anoda kuti ugare mubatanidzwa wo kwenda no kwenda ku mwanarume umwe ne mwanakadzi umwe. Djehovha anoda kuti mwamuna no mukadzi agondane umwe na umwe. (WaHebheru 13:4) Iyena anozonda kurambana. (Marakiya 2:16) Asi anotendera kuti makristu arambane uye acatezve kana mudoni waakacata naye akaita zvepabonde kunza.—Erengai Mateu 19:3-6, 9.

Djehovha wakasika mwanarume no mwanakadzi kuti abatsirane mu mucato. (Genesi 2:18) Se musoro we mhuri, mwamuna ndiye unodikana kuriritira mhuri yake uye kuifundisa nge zva Mwari. Iyena unodikana kugara ne rudo rokuita zvirizvese kumukadzi wake. Mwamuna no mukadzi anodikana kudanana uye kureremedzana umwe na umwe. Ngokuti mwamuna no mukadzi ari anhu asina kukwana, kufunda kurekererana kunobatsira kuti mucato upfare.—Erengai WaEfeso 4:31, 32; 5:22-25, 33; 1 Pedru 3:7.

Kana imwimwi murikubatana no zvitsinzwa mu mucato menyu, muri airi munodikana kuita zviri zvese kuitira kuti mugarisane mu rudo. (1 WaKorinte 13:4, 5) Soko ra Mwari ari bvunzi anhu kuti asiayne se gwanza rokugadzirisa zvitsinzwa zvirikuitikawo mu micato dzakawanda.—Erengai 1 WaKorinte 7:10-13.

Ana, Djehovha anoda kuti mupfare. Iyena anomupasai mipango dzakanaka kuti mudakadzwe no udjaha wenyu. Djehovha anoda kuti mubatsirwe no kuziya ko apsvari enyu uye no zvaakabatananazvo mu upenyu. (WaKorosi 3:20) Musiki wedu, Djehovha anodazve kuti mudakadzwe no kuita cido cake uye co Mwana wake.—Erengai Muparidzi 11:9–12:1; Mateu 19:13-15; 21:15, 16.

Apsvari, imwimwi munodikana kuseenza no simba kuti mupase ana enyu cokurya, pokugara uye macira ekupfeka (1 Timoti 5:8) Asi, kuti ana enyu apfare, munodikanawo kuwafundisa kuti ade Mwari uye afunde nge zvake. (WaEfeso 6:4) Muezaniso wenyu wokupangidzira rudo kuna Mwari ungabaya mwoyo ye ana enyu. Pamunenge mucipasa ana enyu mipango dzinopindirana no soko ra Mwari, izvi zvicaita kuti marangariro awo agare akanaka.—Erengai Dheuteronomiyo 6:4-7; Zvierengo 22:6.

Ana enyu acabetsereka kana mukaakohomedzesa no kuantenda. Awonawo anodikana kugadziriswa uye kupangirwa. Izvi zvicaadziwirira pa maitiro aizokangaidza mupfaro wawo. (Zvierengo 22:15) Asi kupangira akudikani kuoma kana kuita bvinga.—Erengai WaKorosi 3:21.

Wapupuri wa Djehovha anotara no kubudisa mabhuku akasiyana-siyana ano donzo rokubatsira maka-maka apsvari uye ana. Mabhuku aya anoreketa nge zve Bhaibheri.—Erengai Pisarema 19:7, 11.