FUNDO 2
Mwari Ndiani?
1. Ngei tecidikana kunamata Mwari?
Mwari we zvirokwazvo ndiye musiki we zviro zvese. Iyena aana maambo uye aana mugumo. (Pisarema 90:2) Iyena ndiye muridzi we masoko anopfadza ari mu Bhaibheri. (1 Timoti 1:11) Tinodikana kunamata Mwari basi ngokuti ndiye wakatipasa upenyu.—Erengai Zvakapangidzwa 4:11.
2. Mwari munhu we nyama here kana kuti we mweya?
Akuna munhu wakamboona Mwari ngokuti iyena ndi mweya, izvi zvirikuda kubhuya kuti iyena ane upenyu wakakhwirira kupinda zvisikwa zvese zvinorarama pa Nyika. (Juau 1:18; 4:24) Kunyadaro tingaziya unhu wa Mwari ngo kuoona zviro zvaakasika. Ngo muezaniso, kusiyana-siyana kwe micero no maruwa kunopangidza rudo rake no kuziisisa kwake. Kukura kwakaita Denga ne Nyika kunopangidza simba ra Mwari.—Erengai WaRoma 1:20.
Tingafundazve zvakawanda zvakaringana no unhu wa Mwari kana tikaerenga Bhaibheri. Ngo muezaniso, irona rinobhuya zviro zvaanoda ne zviya zvaasikadi. Bhaibheri rinopangidzazve mabatire aanoita anhu ne mushobo waanoita mu mhingampini dzakasiyana-siyana.—Erengai Pisarema 103:7-10.
3. Kodi Mwari uno zina here?
Djesu wakati: “Baba wedu muri ku denga zina renyu ngari ceneswe.” (Mateu 6:9) Kunyazi hazvo Mwari ungadainzwa ngo mushobo wakasiyana-siyana, iyena uno zina rimwe basi. Mu mureketero umwe na umwe zina iri rinodainzwa mushobo wakasiyana-siyana. Mu ciutee zina iri rinodainzwa kuti “Djehovha.”—Erengai Pisarema 83:18.
Zina ra Mwari rakaduswa mu maBhaibheri majinji rikacinjwa ngo rokureremedza rokuti Tenzi uye Mwari. Asi, Bhaibheri perakatarwa, zina iri rainga ririmo zvinodarika 7000! Djesu wakaita kuti zina iri riziikanwe paaifundisa anhu nge zva Mwari.—Erengai Juau 17:26.
4. Kodi Djehovha anotirangarirawo here?
Kuita hingana baba aya ane rudo, Mwari uri kuita zviri zvese kuti atipase ramangwana rakanaka risikazoperi.
Matambudziko atiri kubatana nawo arikuda kupangidza kuti Mwari aatirangariri here? Amweni anoti iyena anotitambudza kuti atiedze, asi izvi andizvopi zvaanoita.—Erengai Tiyago 1:13.
Mwari wakapasa anhu cipo cokusudzunuka pakusanangura kuita zvatinoda. Auzvioni kuti zvakanaka kuti tisudzunuke pakusanangura kuseenzera Mwari here? (Djoshuwa 24:15) Asi anhu akawanda anosanangura kuita zviro zvakashata kune adoni awo ndiyo ndaa kuine matambudziko akawanda. Djehovha anotsukwara paanoona anhu ecidvinyirirwa.—Erengai Genesi 6:5, 6.
Djehovha Mwari anorangarira nge zvedu. Iyena unoda kuti tidakadzwe no upenyu. Nokukasika iyena acapedza kushuphika kwese uye ne anhu anosakisa kushuphika. Zvadaro ciripo cinoitisa kuti Mwari asiye matambudziko aitike ka nguwa kakatemwa. Pa fundo 8 ticafunda nge shwiro yakhona.—Erengai 2 Pedru 2:9; 3:7, 13.
5. Tinodikana kuitei kuti tikwedere kuna Mwari?
Djehovha arikutipika kuti tikwedere kwaari teciseenzesa munamato. Iyena anorangarira nge zve umwe na umwe wedu. (Pisarema 65:2; 145:18) Iyena wakagadzirira kuti atirekerere zvishaishi zvedu uye unoona simba ratinoita kuti timupfadze, kunyazi patinoshaisha. Hino, kunyazi tiri anhu asikazi kukwana, tinokwanisa kushamwaridzana na Mwari.—Erengai Pisarema 103:12-14; Tiyago 4:8.
Ngokuti Djehovha wakatipasa upenyu, tinodikana kumudisisa kudarika munhu upi hake. (Marko 12:30) Paya patinorumbwa tecipangidza rudo redu kuna Mwari, ngo kufunda zvakawanda nge zvake uye kuita zvaanotikumbira, ticabambira kukwedera kwaari.—Erengai 1 Timoti 2:4; 1 Juau 5:3.
