FUNDO 8
Ngei Mwari ecitendera ushaishi no kushuphika?
1. Ushaishi wakatanga kudini?
Mwari ucirikutendera Kuti anhu atonge kwe nguwa yakati rebei kuitira kuti apangidze kuti apana kuedza kutonga pasina iyena kunobatsira anhu.
Ushaishi wakatanga pa Nyika Sathani paakareketa manyepo okutanga. Pakutanga iyena wainga ari ngirozi yakakwana, asi “aazi kurumbwa ari mu cokwadi.” (Juau 8:44) Iyena wakasakurira cido cokunamatwa kunodikanwa kupaswa Mwari basi. Sathani wakanyepera mwanakadzi okutanga, Evha, uye akamucengedzera kuti azwire iyena pane kuzwira Mwari. Adhamu wakabatana na Evha uye akapandukirawo Mwari. Kusanangura kakaita Adhamu kakaunza kushuphika uye rufu.—Erengai Genesi 3:1-6, 19.
Sathani paakacengedzera Evha kuti asazwire Mwari, iyena wainga ecitotanga kupandukira ucangamire wa Mwari, kana kuti,mupando wake se Wekumusoro-soro. Hingana Sathani, anhu akawanda akaramba Mwari se Mutongi. Zvadaro, Sathani wakagara “mutongi we nyika.”—Erengai Juau 14:30; 1 Juau 5:19.
2. Kodi zvisikwa zva Mwari zvainga zvisikazi kukwana here?
Mabasa ese a Mwari akakwana. Anhu ne ngirozi akasikwa na Mwari mushobo wokuti aizokwanisa kuzwira Mwari zvakakwana. (Dheuteronomiyo 32:4, 5) Iyena Mwari wakatisika no rusudzunuko rekusanangura kuita zvakanaka kana zvakashata. Musudzunuko uu unotipasa mukana wokupangidza kuti tinoda Mwari.—Erengai Tiyago 1:13-15; 1 Juau 5:3.
3. Ngei Mwari ucirikutendera kuti anhu ashuphike?
Paane nguwa yakati rebei, Djehovha acirikundotendera kupandukirwa ucangamire wake. Ngei? Kuti apangidze kuti apana kuedza kutonga pasina iyena kunobatsira anhu. (Muparidzi 7:29; 8:9) Padarika makore anokwana kuita 6000 e kurarama ke anhu, izvi zvagara pamhene. Utongi we anhu aizi kukwanisa kupedza hondo, ubhinya, kushuphika kana matenda.—Erengai Djeremiya 10:23; WaRoma 9:17.
Kusiana no utongi we anhu, utongi wa Mwari unobatsira aya anouda. (Isaya 48:17, 18) Nokukasika, Djehovha ucapedza wese utongi we anhu. Anhu aya anosanangura kutongwa na Mwari ndiwo basi acararama pa Nyika.—Isaya 11:9; Erengai Dhanyeri 2:44.
4. Mwoyo murefu wa Mwari unotipasa mukana wokuitei?
Sathani wakareketa kuti apana munhu waizokwanisa kuseenzera Mwari ngo rudo. Iwewe urikuda kupangidza kuti ikona kunyepa kake here? Zvinoita! Mwoyo murefu wa Mwari unotipasa mukana wokupangidza kuti tiri kudii re utongi wa Mwari kana kuti tiri kudii rekutonga ke anhu. Zvatinoita mu upenyu wedu zvinopangidza kuti ndeupi utongi watasanangura.—Erengai Djobo 1:8-12; Zvierengo 27:11.
5. Tingasanangura kudini Mwari se Mutongi wedu?
Zvatinosanangura kuita mu upenyu wedu zvinopangidza pamhene kuti tinoda kutongwa na Mwari kana kuti atidi
Tingasanangura Mwari se Mutongi wedu ngokupsvaka kuziya ndekupi kunamata kwe cokwadi kunopindirana no soko rake, Bhaibheri, uye kurarama maererano naro. (Juau 4:23) Tingaramba Sathani se mutongi wedu ngokusama kupindira mu matongerwe e nyika uye mu hondo, kuita hingana Djesu asikazi kuzvipindira.—Erengai Juau 17:14.
Sathani unoseenzesa simba rake kuti akuse zviito zvisikazi kucena uye zvinokuwadza. Patinoramba zviito izvi, shamwari dzedu dzimweni kana anyaukama pamweni anotiseka kana kutotipingidzira. (1 Pedru 4:3, 4) Ndiyo ndaa tinodikana kuita cisananguro. Ticasanangurei? Ticashamwaridzana ne anhu anoda Mwari here? Ticazwa mitemo yake yo ruziyo uye yo rudo here? Kana tikazviita, ticapangidza kuti Sathani wakanyepa paakareketa kuti apana munhu unoita kuda ka Mwari paanocecerwa.—Erengai 1 WaKorinte 6:9, 10; 15:33.
Rudo ra Mwari nokuda ke anhu igondeso rokuti ushaishi no kushuphika zvicazopera. Anhu anopangidza kuti anotenda izvi acararama nokusikaperi pa Nyika.—Erengai Juau 3:16.
