FUNDO 5
Ndecipi cinangwa ca Mwari ne Nyika ino?
1. Ngei Mwari wakasika Nyika ino?
Djehovha wakapa Nyika ku anhu. Nyika ndiyo muzi wedu. Ngokudaro, arorani okutanga, Adhamu na Evha, aazi kusikwa kuti ararame ku denga, ngokuti Mwari wainga atosika ngirozi kuti dzirarame ku denga. (Djobo 38:4, 7) Mwari wakakanda mwanarume wokutanga mu paradhiso yakarungama inozwi munda we Edheni. (Genesi 2:15-17) Djehovha wakapa iyena ne ana ake aizobarwa kariro ye kurarama nokisikaperi pa Nyika.—Erengai Pisarema 37:29; 115:16.
Pakutanga munda we Edheni basi ndiwo wainga uri paradhiso. Arorani okutanga aizodikana kudzadza Nyika ne ana awo. Nokuhamba ke nguwa, aizocengeta Nyika yese, ociicinja kuti igare paradhiso. (Genesi 1:28) Nyika Narini aizomboparadzwi. Iyona icagara muzi we anhu kwenda no kwenda.—Erengai Pisarema 104:5.
2. Ngei nyamasi uno Nyika aisiripi paradhiso?
Adhamu na Evha aazi kuzwira Mwari, ndiyo ndaa Djehovha akaadzingira mu munda we Edheni. Nokudaro paradhiso yakaruzika uye apana munhu akakwanisa kuigadzirisa. Kubudira ipona, Nyika iri mu nyara dze anhu akashata.—Djobo 9:24.—Erengai Genesi 3:23, 24.
Kodi Djehovha akakonerwa kamare kuita maererano no cinangwa cake cekutanga ku anhu here? Haiwa! Djehovha ndi Mwari we masimba ese; apana caanokonerwa. (Isaya 45:18) Mwari acaita kuti anhu pa nyika ahwirirezve kuti agare mushobo waiida kareko.—Erengai Pisarema 37:11, 34.
3. Kodi Paradhiso icagadziriswa kudini?
Paradhiso icagadziriswa pano pa Nyika mu nguwa yoku-kutonga ka Djesu sa Mambo wakasanangurwa na Mwari. Mu hondo inodudzwa kuti Amagedhoni, Djesu acatungamirira ngirozi uye acaparadza ese aya asiripi kudii ra Mwari. Zvadaro, Djesu acasunga Sathani mu makore anokwana 1000. Aya anenge ari kudii re anhu a Mwari acapukunyuka pakuparadzwa ngokuti Djesu acaasesedza no kuwadziirira. Awona acadakadzwa no upenyu usikaperi mu Paradhiso pa Nyika.—Erengai Zvakapangidzwa 20:1-3; 21:3, 4.
4. Kushuphika kucapera rini?
Mwari acapedza rini ushaishi pa nyika? Djesu wakapa “cioneso” caizopangidzira kuti mugumo wainga waapaduze. Mugarire we nyika ye mazuwa ano uri kushusha upenyu we anhu pa nyika pano uye uri kupangidza kuti taakurarama mu nguwa ye “mugumo we mugarire we zviro.”—Erengai Mateu 24:3, 7-14, 21, 22.
Paanenge ecitonga Nyika ari pa Umambo wake wokumatenga kwe makore anokwana 1000 Djesu acapedza kushuphika kwese. (Isaya 9:6, 7; 11:9) Kudarika kuseenza sa Mambo basi, Djesu acaseenza se mudiri mukuru uye acadzima zvitema zve aya ano rudo na Mwari. Zvaa zvadaro, eciseenzesa Djesu, Mwari acapedza matenda, kucembera uye rufu.—Erengai Isaya 25:8; 33:24.
5. Ndiyani ucararama mu paradhiso ya mangwana?
Mu Nyumba yo Umambo iwewe ucaziya anhu anoda Mwari uye anoda kufunda kumupfadza.
Aya anozwira Mwari acararama mu paradhiso. (1 Juau 2:17) Djesu wakatuma afundi ake kuti apsvange anhu akapfawa kuitira kuti aafundise kuita kuda ka Mwari. Nyamasi uno, Djehovha ari kugadzirira zviuru zve zviuru zve anhu kuti ararame mu paradhiso ya mangwana pa Nyika. (Zefania 2:3) Mu Nyumba dze Umambo dze Wapupuri wa Djehovha, anhu anofundiswa kuti aite anarume uye madzibaba akanaka, anakadzi uye madzimai Akanaka. Ana anonamata Mwari pamwepo ne madzibaba awo, uye anofunda kurarama zvakanaka ngo ndaa ye zvaanofundiswa na Mwari.—Erengai Mika 4:1-4.
