FUNDO 7
Umambo wa Mwari cinyi?
1. Umambo wa Mwari cinyi?
Cinyi cinoita kuti Djesu agare Mambo wakanaka?—MARKO 1:40-42.
Umambo wa Mwari ndi utongi wokumatenga. Umambo uu ucaparadza utongi wese we anhu uye ucaita kuti kuda ka Mwari kuitike ku denga ne pa Nyika. Masoko e Umambo wa Mwari akanaka. Mu nguwa shomanani icateera Umambo uu ucadzadzisa cido ce anhu ce kugara pasi pe utongi wakanaka, uyezve ucaita kuti anhu ese e pa Nyika abatane.—Erengai Dhanyeri 2:44; Mateu 6:9, 10; 24:14.
Umambo wese unodikana kugara na Mambo. Djehovha wakagadza Mwana wake, Djesu kristu kuitira kuti agare Mambo we Umambo wake.—Erengai Zvakapangidzwa 11:15.
2. Ngei Djesu ndi Mambo wakanaka?
Mwana wa Mwari ndi Mambo wakanaka ngekuti une nyasha uye unovhikhira zvakanaka. (Mateu 11:28-30) Kudarika izvi, iyena acatonga Nyika ari ku denga, izvi zvicaita kuti iyena agare no simba rinodikana kuti abatsire anhu. Djesu Paakamutswa wakakhwira ku denga wogara padii ro muoko kwawo wa Djehovha ecietsera. (WaHebheru 10:12, 13) Pakupedzesera, Mwari wakamupasa simba kuti atange kutonga. —Erengai Dhanyeri 7:13, 14.
3. Ndiyani ucatonga na Djesu?
Boka rinodudzwa kuti “acena” ricatonga na Djesu ku denga. (Dhanyeri 7:27) Maphositori a Djesu akatendeka ndiyo akatanga kusanangurwa. Dakara na nyamasi uno Djehovha acirikuenderera mberi ecisanangura anarume ne anakadzi akatendeka kuti agare acena. Kuita hingana Djesu awona anomutswa no muiri wo mweya.—Erengai Juau 14:1-3; 1 WaKorinte 15:42-44.
Kodi anhu angana anoenda ku denga? Djesu wakaadainza kuti “boka doko.” (Ruka 12:32) Pakupedzesera, ese acatonga Nyika pamwepo na Djesu acakwana kuita 144000.—Erengai Zvakapangidzwa 14:1.
4. Cinyi cakaitika Djesu paakatanga kutonga?
Umambo wa Mwari wakatanga kutonga muna 1914. * Ciito cakatanga kuitwa na Djesu sa Mambo ndocokukhandira Sathani no madhimoni ake pa Nyika pano. Sathani wakanyangadzwa nazvo uye wakatanga kubara matambudziko pa Nyika pese. (Zvakapangidzwa 12:7-10, 12) Kubvira ipona nyathwa dze anhu dzakatanga kubambirira ciriporipoco. Nzara, hondo, matenda uye zvigidhigidhi zvinoumba “cioneso” caizopangidza kuti nokukasika Umambo ucawonerera Nyika yese.—Erengai Ruka 21:7, 10, 11, 31.
5. Cinyi cicaizwa no Umambo wa Mwari?
Ecisenzesa basa rokuparidzira mu nyika yese Umambo wa Mwari uri kubhatanidza djikitira re anhu pasi rese. Zviuru zve zviuru zve anhu akapfawa arikutendera kutongwa na Djesu. Umambo wa Mwari ucaadziirira paucaparadza anhu akashata pa Nyika. Zvadaro, ese anoda kubetsereka no Umambo wa Mwari anodikana kufunda kuterera Djesu.—Erengai Zvakapangidzwa 7:9, 14, 16, 17.
Mu nguwa ye ciuru ce makore Umambo ucaita kuti cinangwa cokutanga ca Mwari kune anhu ciitike. Nyika yese icagara paradhiso. Pakupedzesera, Djesu acahwirinza Utongi kuna Baba wake. (1 WaKorinte 15:24-26) Unoziya munhu waunoda kureketa naye nge zve Umambo wa Mwari here?—Erengai Pisarema 37:10, 11, 29.
^ par. 6 Kana ucida masoko akadzara nge zve uphorofita we Bhaibheri unopangidza gore ra 1914, ona mapagina 215-218 ye bhuku rinoti Bhaibheri Rinotidzidzisei?
