Djehovha anoda kuti tigare anhu “akagondeka.” (Mika 6:8) Kugondeka i wara rinodikanwa maningi mu mucato ngekuti pasina kugondeka, akuna kuthembana. Uye kuthembana kunodikanwa maningi kuitira kuti rudo pakati pe mwamuna no mukadzi rirumbwe recikura.

Nyamasi uno, kugondeka mu mucato kuri kushushwa. Kuti mudziirire mucato wenyu, imwimwi munodikana kugara makashinga kuita zviro zviiri.

ZVINOREKETHWA NGE BHAIBHERI: “Garai no cokwadi cekuti ngazvipi zvinodikanwa maningi kudarika zvimweni.” (Afiripi 1:10) Mucato wenyu ndi cimwe ce zviro zvinodikanwa maningi mu upenyu wenyu. Iwona unosisira kugara pa mbuto ye kutanga.

Djehovha anoda kuti imwimwi mudzipire kune wamakawakana naye uye kuti “mupfadzwe no upenyu” muri mwese. (Muparidzi 9:9) Iyena anodjekesa kuti amudikani kusiya umweni wenyu asi kuti mwese mupsvake zvamungaita kuti mupfadzane. (1 Akorinti 10:24) Itai kuti mudoni wenyu azwe kuti unodikanwa maningi.

ZVAMUNGAITA:

• Torai nguwa yekuti mugare mwese, nguwa yekurangarira nge zve mudoni wenyu basi

• Rangarirai hinga kazado: Rekerai kubhuya kuti “inini” asi “isusu”

ZVINOREKETHWA NGE BHAIBHERI: “Munhu wese anorumbwa akaringira mwanakadzi zvekuti anomusirira atoita useki naye mu mwoyo make.” (Mateu 5:28) Kana munhu akarumbwa ecirangarira zviro zve bonde no umweni waasikazi kuwakana naye, anonga asiripi kugondeka kune umweni wake.

Djehovha anoti munodikana “kucengetedza mwoyo yenyu.” (Zvierengo 4:23; Djeremiya 17:9) Kuti mudaro, munodikana kurinda madziso enyu. (Mateu 5:29, 30) Teedzerai muezaniso wa Djobo, iyena wakaita citenderano no madziso ake kuti asasirire mwanakadzi umweni. (Djobo 31:1) Itai cisananguro cekusamboona pornografiya kana kuti zve umitu-mitu. Uye amudikani kusirira kuita zve bonde no munhu upi hake kunza kwe wamakawakana naye.

ZVAMUNGAITA:

• Pangidzai pamhene kuti imwimwi makadzipira zvakadzara kune wamakawakana naye

• Rangarirai nge zve mazwiro e umweni wenyu, uye kasikai kugura ushamwari upi hawo usikapfarirhwi no umweni wenyu