Tese hedu tinoda mare kuti tiriritire mhuri dzedu. (Zvierengo 30:8) Uye, “mare inodziirira.” (Muparidzi 7:12) Hinga mwamuna no mukadzi, zvingashupha kureketa nge zve mare, asi musasiye kuti mare imutse matambudziko mu mucato wenyu. (Aefeso 4:32) Mwamuna no mukazi anodikana kugondana uye kubatana paanoita zvisananguro zvakaringana no maseenzesere aacaita mare.

ZVINOREKETHWA NGE BHAIBHERI: “Ndiyani pakati penyu anoti kana ecida kuwaka nyumba asikatangi agara pasi kuti aerenge zvinodikanwa oona kuti anazvo zvinokwana here kuti azoipedze?” (Ruka 14:28) Zvakanaka maningi kuti muronge pamwepo masenzesere amucaita mare yenyu. (Amosi 3:3) Sanangurai zvamunoda kutenga uye kuti mucaseenzesa marei. (Zvierengo 31:16) Kugara no mare inokwana kutenga zviro zvakawanda azvireyi kuti munodikana kutenga zvirozvo. Edzai kuita zviri zvese kuti musagare no magaa. Senzesai mare yamunayo haiwa yamusina.—Zvierengo 21:5; 22:7.

ZVAMUNGAITA:

• Kana mukaona kuti pakupera ke mwedzi pane mare yasara pa urongwa wenyu we masenzeserhwe e mare, sanangurai mwese zvamucaita nayo

• Kana mare yenyu isikakwani, nyasai kuronga zvamungaita kuti mubvise zviya zvinomupedzera mare. Ngo muezaniso, pane kuti mutenge zvokurhya zvakabikwa kare mungaita henyu zvokubika mwega

ZVINOREKETHWA NGE BHAIBHERI: “Itai zviro zvese makathembeka haiwa pamberi pa Djehovha basi, asiwo pamberi pe anhu.” (2 Akorinti 8:21) Budiranai pamhene nge zve mare yamunotambira no yamunoseenzesa.

Izwai zvinorangarirhwa no mudoni wenyu pese pamunoda kuita zvisananguro zvakakura zvine cekuita no mare yenyu. (Zvierengo 13:10) Kucedzesana nge zve mare kucaita kuti mu mhuri menyu murumbwe mune runyararo. Onai mare yamunotambira, haiwa hinga mare yenyu pacenyu, asi hinga mare ye mhuri yenyu.—1 Timoti 5:8.

ZVAMUNGAITA:

• Tenderanai kuti umwe na umwe wenyu angaseenzesa mare yakawanda kudini asikabvunzisi umweni

• Musaimire kuti zvineso zvitange zvamuka kuti muzocedza nge zve mare