Kubarhwa ke mwana kungakwanisa kupfadza uye kushuphira akawakana. Hinga abereki apsva, mungashamisika ngo kuona kuti nguwa yenyu yakawanda no simba zvinonga zvaakuperera pakuonerera mwana wenyu. Kutama kuwata zvakakwana pamwepo nokucinja kunonga kaita mazwiro enyu zvingabara zvineso pa ushamwari wenyu hinga mwamuna no mukadzi. Imwimwi muri airi mucadikana kucinja zviro zvimweni kuti muonerere mwana wenyu uye kuti mucengetedze mucato wenyu. Mazano e Bhaibheri angamubetsera kudini kuti mukurire matambudziko aya?

ZVINOREKETHWA NGE BHAIBHERI: “Rudo rine mwoyo unonoka kutsamwa uye rino usisi.” Uye, rudo “arizvipsvakiri zvakarinakira pacaro, aritsamwi.” (1 Akorinti 13:4, 5) Zvino zvamagara mai apsva, nge zve cibarirhwe kuti munonyanya kurangarira nge zve mwana wenyu. Zvakadaro, mwamuna wenyu angatanga kuzwa hingana kuti waakusiiwa sure, hino musakanganwe kuti iyena anodawo kupangidirhwa rudo. No mwoyo unonoka kutsamwa, betserai mwamuna wenyu kuti aone kuti iyena anokosha kwamuri uye kuti anobatanidzwawo pakurera mwana wenyu.

“Amuna . . . Rumbwai mecigara no akadzi enyu maererano no ruziyo.” (1 Pedru 3:7) Zwisisai kuti mukadzi wenyu ucaseenzesa simba rake rakawanda ecionerera mwana wenyu. Waane zvimweni zvekuita, hino iyena angamboneseka mu ndangariro, angazwa akaremba kana kutodzirhya mwoyo. Nguwa dzimweni, angatomutsamwirai, asi edzai kuita zviri zvese kuti murumbwe makaterama, ngokuti “munhu unononoka kutsamwa ari nani kudarika mwanarume ane simba.” (Zvierengo 16:32) Pangidzai ungwaru, uye tsigirai mukadzi wenyu. —Zvierengo 14:29.

ZVAMUNGAITA:

• Anababa: Betserai mukadzi wenyu kuonerera mwana wenyu, kunyazi pakati pe usiku. Itai kuti nguwa yamunopedza meciita zviro zvimweni igare doko kuitira kuti muone nguwa yakawanda ye kugara no mukadzi wenyu pamwepo no mwana wenyu

• Anamai: Kana mwamuna wenyu akadzipira kuti amubetserei kuonerera mwana, tenderai rubetso rake. Kana asikakwanisi kunyasa   kuita basa rakhona, musamureketere, asi mupangidzei no rureremedzo mushobo wazvinoizwa

ZVINOREKETHWA NGE BHAIBHERI: “Acagara nyama imwe.” (Genesi 2:24) Kunyazi hazvo mabarhwa munhu umweni mu mhuri menyu, edzurirai kuti imwimwi muciri “nyama imwe.” Edzai zviri zvese kuti ushamwari wenyu urumbwe wakabamba.

Akadzi, tendai kubetserhwa uye kutsigirhwa kwamunoizwa no mwamuna wenyu. Masoko enyu e kutenda anokwanisa “kuporesa.” (Zvierengo 12:18) Amuna, bvunzai akadzi enyu kuti munoada uye kuti iyena wakaita hingana oro inodikanwa maningi kamuri. Mutendei no kuonerera kaanoita mhuri yenyu.—Zvierengo 31:10, 28.

“Umwe na umwe wenyu ngaapsvake, haiwa zvakamunakira basi, asi zvakanakirawo amweni.” (1 Akorinti 10:24) Garai meciita zvakanakira mudoni wenyu nguwa dzese. Hinga mwamuna no mukadzi, psvakai nguwa yekucedza, yekurumbidzana, uye kupurutana mudoni wenyu paanonga ecireketa. Musandorangarira zvamunoda basi pa shwiro dze zvebonde. Rangariraiwo zvinodiwa no mudoni wenyu. Bhaibheri rinoti: “Musanyimane, kunza kwe kupindirana kamunonga maita.” (1 Akorinti 7:3-5) Hino cedzai nge zve shwiro ii muri airi mecibudirana pamhene. Mwoyo yenyu inononoka kutsamwa no kuzwisisa kwenyu zvicabambisa ushamwari wenyu.

ZVAMUNGAITA:

• Musakanganwe kupsvaka cinguwa cekuti mugare mwese muri airi basi

• Pangidzai kunyazi pa zviro zvidoko kuti munoda mudoni wenyu, zvakadai hingana kutara kacitsamba kane masoko akarungama kana kuti kumupasa cipo

ZVINOREKETHWA NGE BHAIBHERI: “Kubvira paudoko wakaziya zvitarhwa zvicena, zvinokwanisa kuita kuti ugare no ungwaru kuitira kuti uponeswe.” (2 Timoti 3:15) Rongai zvamungaita kuti mufundise mwana wenyu. Iyena unokwanisa kufunda, kunyazi asati abarhwa. Paanonga aciri mundani ma mai, mwana wenyu unokwanisa kuzwa izwi renyu uye unoita zvinoenderana no mazwire amunonga meciita. Muerengerei aciri mudoko. Kunyazi asikazwisisi zvamunonga mecierenga zvingamubetsera kuti azopfarira kuerenga paacakura.

Zvakanaka maningi kuti murekete naye nge zva Mwari aciri mudoko. Itai kuti azwewo pamunonga mecinamata kuna Djehovha. (Dheuteronomiyo 11:19) Kunyazi pamunotamba mwese, reketai nge zve zviro zvakasikwa ndi Mwari. (Pisarema 78:3, 4) Mwana wenyu paanokura, iyena ucaona kuti munoda Djehovha uye ucafunda kudawo Djehovha.

ZVAMUNGAITA:

• Namatai mecikumbira ungwaru we kufundisa mwana wenyu

• Phindai masoko uye mafundo makuru pamunonga mecifundisa kuitira kuti atange kufunda aciri mudoko