Djehovha paakasika mhuri, akaita kuti ana agare mu nyara dze abereki awo. (Akorosi 3:20) Iri i basa renyu aberekeki rekufundisa mwana wenyu kuda Djehovha uye kuti agare munhu unoziya zvaanoda kuiita azokura. (2 Timoti 1:5; 3:15) Munodikanawo kuziya zviri mu mwoyo me mwana wenyu. Muezaniso wenyu, unodikanwa maningi. Mucakwanisa kunyasa kufundisa mwana wenyu Soko ra Djehovha kana imwimwi mukatanga kuita kuti rigare mu mwoyo menyu.—Pisarema 40:8.

ZVINOREKETHWA NGE BHAIBHERI: “Kasikai kuzwa, nonokai kureketa.” (Tiyago 1:19) Munodikana kuita kuti ana enyu azwe akasudzunuka kuti arekete naimwimwi. Awona anodikana kuziya kuti makagadzirira kupurutana paanonga ecida kureketa. Itai kuti azwe akasudzunuka kureketa zviri mu mwoyo mawo. (Tiyago 3:18) Kana akarangarira kuti mucaareketerera no hasha kana kuti mucarangarira zvisirizvopi, awona aazofunguri mwoyo wawo kamuri. Garai no mwoyo unononoka kutsamwa no ana enyu, uye pangidzai pamhene kuti munowada.—Mateu 3:17; 1 Akorinti 8:1.

ZVAMUNGAITA:

• Pasai nguwa ana enyu paanoda kureketa naimwimwi

• Garai mecicedza no ana enyu, haiwa basi pamuka matambudziko

ZVINOREKETHWA NGE BHAIBHERI: “Munhu anoteramisa pfungwa dzake kana pamuka nyaya acabudirira.” (Zvierengo 16:20) Nguwa dzimweni munodikana kupsvaka kuzwisisa zviri sure ke masoko anonga ecirekethwa no ana enyu. Kajinji madjaha anokhona-khona maningi kana ecida kureketa ciro. “Kana munhu ecidaira nyaya asati azwa masoko ese, unonga uri upenzi.” (Zvierengo 18:13) Musakasike kunyangadzwa.—Zvierengo 19:11.

ZVAMUNGAITA:

• Edzai kuita zviri zvese kuti musaagurire kana kushatirhwa, pasinei no zvingarekethwa no ana enyu

• Edzai kuedzurira mazwiro amaiita uye zviro zvamaiona hingana zvinodikanwa maningi pamainga mune thunga rawo

ZVINOREKETHWA NGE BHAIBHERI: “Mwana wangu, purutana mupango wa baba wako, uye usarambe kufundisa ka mai ako.” (Zvierengo 1:8) Djehovha akagadza baba na mai kuti aonerere ana awo. Munodikana kufundisa ana enyu kuti amureremedzei uye kuti amupurutanei. (Aefeso 6:1-3) Ana enyu angakwanisa kuzviona kana abereki awo asikazi “kunyasa kubatana mu maonero.” (1 Akorinti 1:10) Kana musikapindirani, ngwarirai kuti musaitirane hasha pamberi pe ana enyu, ngokuti zvingakwanisa kuita kuti ana enyu asamureremedzei hinga abereki awo.

ZVAMUNGAITA:

• Cedzai kuti mutenderane mapangire amungaita ana enyu

• Kana mudoni wenyu ano maonero akasiyana pakufundisa ana enyu, edzai kuzwisisa maonero ake

ZVINOREKETHWA NGE BHAIBHERI: “Fundisai mwana wenyu maererano no gwanza rakamunakira.” (Zvierengo 22:6) Kubudirira pakufundisa ana azviitiki zvega. Munodikana kuronga zvekuita pakufundisa ana enyu, zvingabatanidza kupanga ana enyu. (Pisarema 127:4; Zvierengo 29:17) Kupanga akureyi kuphanica basi, asi kunobatanidzawo kubetsera ana enyu kuti azwisise zvinoita kuti pagare no mitemo. (Zvierengo  28:7) Afundiseiwo kuti ade Soko ra Djehovha kuti azwisise zvarinoreketa. (Pisarema 1:2) Izvi zvicaabetsera kuti agare no hana yakanaka.—Ahebheru 5:14.

ZVAMUNGAITA:

• Fundisai ana enyu kuti aone Mwari hinga Munhu kamare waangagonda naye

• Abetserei kuti afunde kuziya uye kutiza zviro zvakashata, zvakadai hingana zviya zvinooneka pa Interneti no mu redhes sosiais. Afundisei kuti angangwarira kudini mabhinya