Djehovha a Mwari ndiye akaita mucato we kutanga. Bhaibheri rinobhuya kuti iyena akasika mwanakadzi we kutanga uye “akamuunza ku mwanarume.” Adhamu wakapfara maningi zvokuti wakati: “Uu ndiye godo re makodo angu kamare ne nyama ye nyama yangu.” (Genesi 2:22, 23) Djehovha aciri kuda kuti anhu akawakana agare ecipfara.

Pamakawaka kana kuwakwa, pamweni makarangarira kuti zvese zvaizonga zvakakwana. Asi, zvirokwazvo nge zvekuti, kunyazi mwamuna no mukadzi anodanana maningi anosongana no zvineso. (1 Akorinti 7:28) Mu bhurushura rino, mucagumira mazano e Bhaibheri acamubetsera kuti mugare no mupfaro mu mucato menyu uye mu mhuri menyu.—Pisarema 19:8-11.

ZVINOREKETHWA NGE BHAIBHERI: Mwamuna ndiye musoro we mhuri.—Aefeso 5:23.

Kana muri mwamuna, Djehovha anoda kuti  mubate mukadzi wenyu no upfawi. (1 Pedru 3:7) Iyena akasika mwanakadzi kuti agare mubetseri wenyu, uye anoda kuti mumureremedze uye mumude. (Genesi 2:18) Munodikana kuda mukadzi wenyu zvikuru zvekuti munozwa mecida kukanda zvido zvake pamberi pezvido zvenyu.—Aefeso 5:25-29.

Kana muri mukadzi, Djehovha anoda kuti mureremedze no mwoyo wese mwamuna wenyu uye kuti mumubetsere kuita basa rake. (1 Akorinti 11:3; Aefeso 5:33) Tsigirai zvisananguro zve mwamuna wenyu uye mubetsei no mwoyo wese. (Akorosi 3:18) Kana mukadaro, mucapfarirhwa no mwamuna wenyu uye na Djehovha.—1 Pedru 3:1-6.

ZVAMUNGAITA:

• Bvunzisai wamakawakana naye kuti cinyi camungaita kuti   mugare mwamuna kana mukadzi wakanaka. Nyasai kupurutana, uye itai zviri zvese kuti mutondoedze zvaanobhuya

• Garai munhu unononoka kutsamwa. Zvingatora nguwa kuti mwese muri airi muziye zvamungaita kuti mupfadzane

ZVINOREKETHWA NGE BHAIBHERI: Munodikana kugara mecirangarira nge zve mazwiro e mudoni wenyu. (Afiripi 2:3, 4) Batai wamakawakana naye hingana oro inodikanwa maningi, meciedzurira kuti Djehovha anoda kuti aseenzi ake agare no “upfawi no anhu ese.” (2 Timoti 2:24) “Masoko anorekethwa asikazi kumborangarirhwa anobaya hingana supada, asi ririmi re akangwara rinoporesa.” Hino munodikana kungwarira zviya zvamunoreketa. (Zvierengo 12:18) Mwiya wa Djehovha ucamubetserai kuti murekete no usisi uye no rudo.—Agaratiya 5:22, 23; Akorosi 4:6.

ZVAMUNGAITA:

• Musati macedza nge zve shwiro inodikanwa maningi no mwamuna wenyu kana kuti mukadzi wenyu, tangai manamata kuna Djehovha mecikumbira kuti amubetserei kugara makaterama uye kuti mukwanise kupurutana mudoni wenyu

• Rangarirai zvakanaka zvamucareketa uye mushobo wamucazvireketa

ZVINOREKETHWA NGE BHAIBHERI: Pamakawakana, “makagara nyama imwe” no wamakawakana naye. (Mateu 19:5) Kunyazi zvakadaro imwimwi muri anhu airi akasiyana uye mune maonero akasiyana. Hino, munodikana kufunda kugara makabatana mu ndangariro uye mu mazwiro amunoita. (Afiripi 2:2) Kubatana kunodikanwa maningi kajinji pamunonga mecida kuita zvisananguro. Bhaibheri rinoti: “Zvirongwa zvinobudirira kana mecipasana mazano.” (Zvierengo 20:18) Itai kuti Bhaibheri rimutungamirire pamunoita zvisananguro zvinodikanwa maningi.—Zvierengo 8:32, 33.

ZVAMUNGAITA:

• Itai kuti mudoni wenyu aziye mazwiro enyu, haiwa masoko basi kana kuti maonero enyu

• Tangai mabvunzisa wamakawakana naye musati mapangana zviro no amweni