Kunyazi mukaedza zvese zvamunokwanisa kuti mugare no mucato unopfadza uye mhuri inopfara, zviro zvisikakarirhwi zvingakwanisa kubvisa mupfaro wenyu. (Muparidzi 9:11) Mwari anotibetsera no rudo patinosongana no matambudziko. Kana mukaseenzesa mazano anoteera ari mu Bhaibheri, imwimwi no mhuri yenyu mucakwanisa kushingirira, kunyazi mumagarire ezviro akashata maningi.

ZVINOREKETHWA NGE BHAIBHERI: “Mecikanda zvese zvinomurhya mwoyo kaari, ngokuti iyena anomucengetai.” (1 Pedru 5:7) Edzurirai nguwa dzese kuti Mwari andiyepi anobara matambudziko enyu. (Tiyago 1:13) Pamunonga mecimukhederera, iyena acamubetserai ngo mishobo yakanaka maningi. (Isaya 41:10) “Dururai mwoyo yenyu pamberi pake.”—Pisarema 62:8.

Mucanyaradzwawo pamunoerenga no kufunda Bhaibheri zuwa no zuwa. Ngokudaro, mucaona kuti Djehovha “anotinyaradza kudini pamatambudziko edu ese.” (2 Akorinti 1:3, 4; Aroma 15:4) Iyena anogondesa kumupasa “runyararo ra Mwari rinodarika kurangarira kwese.”—Afiripi 4:6, 7, 13.

ZVAMUNGAITA:

• Namatai kuna Djehovha kuti amubetserei kugara makaterama uye kuti murangarire zviro zvakanaka

• Nyasai kuona zvese zvamungakwanisa kusanangura uye sanangurai zviya zvakamunakirai

ZVINOREKETHWA NGE BHAIBHERI: “Mwoyo we munhu unozwisisa unogara no uzii, uye nzee dze akangwara dzinopsvaka kugara no uzii.” (Zvierengo 18:15) Onai zvese zvinobatanidzwa. Ziyai zvinodiwa no munhu wese we mu mhuri yenyu. Cedzai nawo. Purutanai zvaanoreketa.—Zvierengo 20:5.

Hino kana munhu wamunoda akafa? Musathye kubudisa mazwiro enyu. Edzurira kuti kunyazi Djesu “wakacema.” (Juau 11:35; Muparidzi 3:4) Zvinokoshawo maningi kuti mutore nguwa yekuzorora no ye kuwata. (Muparidzi 4:6) Izvi zvicaita kuti zvigare nyore kushingirira zviro zvinonesa.

ZVAMUNGAITA:

• Garai mecicedza no mhuri yenyu, matambudziko asati aitika. Panozomuka matambudziko, awona acagara akasudzunuka kureketa naimwimwi

• Reketai no anhu amweni akambosongana no matambudziko akadaro

ZVINOREKETHWA NGE BHAIBHERI: “Shamwari ye zvirokwazvo ino rudo nguwa dzese, uye i hama yakaberekwa kuti ibetsere pa nguwa ye matambudziko.” (Zvierengo 17:17) Shamwari dzenyu dzinoda kumubetserai, asi awona angatama kuziya zvekuita. Hino, abvunzei zvese zvamunoda. (Zvierengo 12:25) Uye, psvakaiwo rubetso pane zvekunamata kune aya anozwisisa Bhaibheri. Mazano aacamupasai anobva mu Bhaibheri acamubetserai maningi.—Tiyago 5:14.

Mucaona rubetso ramunoda kana mukagara padhuze no anhu ane kutenda ke zvirokwazvo muna Mwari uye anogonda no zvaanopikira. Mucanyaradzwawo maningi pamunobetsera amweni anoda kushingiswa. Abvunzei nge zve kutenda kenyu muna Djehovha uye muzvipikirhwa zvake. Rumbwai makabatikana pakubetsera anhu anoda kubetserhwa, uye musagare kure no aya anomuda uye ane usisi naimwimwi.—Zvierengo 18:1; 1 Akorinti 15:58.

ZVAMUNGAITA:

• Cedzai no shamwari dze padhuze uye siyai kuti dzimubetserei

• Nyasai kureketa zvamunoda