Hingana zvamafunda mu bhurushura rino, Bhaibheri rino mazano akawanda anobetsera imwimwi no mhuri yenyu. Djehovha anoda kuti mupfare. Iyena anogondesa kuti kana mukakanda kunamata pa mbuto ye kutanga, “zviro zvese zvimweni zvicatunhudzirhwa kamuri.” (Mateu 6:33) Iyena anoda maningi kuti mugare shamwari yake. Senzesai mukana wese wamunoona kuti mubambise ushamwari wenyu na Mwari. Aya makomborero akakura kudarika ese angakwanisa kugara no munhu.—Mateu 22:37, 38.

ZVINOREKETHWA NGE BHAIBHERI: “‘Ndicagara baba enyu, uye imwimwi mucagara ana angu e anarume no e anakadzi,’ ndizvo zvinobhuya Djehovha.” (2 Akorinti 6:18) Mwari anoda kuti mugare shamwari yake yepadhuze. Munamato ndiro gwanza rimweni rekuita kudaro. Djehovha anomupikai kuti “murumbwe mecinamata.” (1 Atesaronika 5:17) Iyena anoda maningi kuzwa marangariro enyu no kuona zvinomutambudzai zviri mukati–kati me mwoyo menyu. (Afiripi 4:6) Pamunonamata no mhuri yenyu, awona acaona kuti munonyasa kutenda kuti Mwari ariyo.

Kutunhudzira pakureketa na Mwari, munodikana kumupurutana. Mungakwanisa kuita izvi no kufunda Soko rake uye mabhuku anopanganidza nge zve Bhaibheri. (Pisarema 1:1, 2) Nyasai kurangarira zviya zvamunofunda. (Pisarema 77:11, 12) Kupurutana Mwari kunobatanidzawo kugara mecipinda misangano ye ciKristu.—Pisarema 122:1-4.

Kureketa no amweni nge zva Djehovha ndi rimwe gwanza rinodikanwa maningi re kubambisa ushamari wenyu naye. Kugara meciita izvi kucaita kuti mutunhudzire kuzwa muri padhuze naye.—Mateu 28:19, 20.

ZVAMUNGAITA:

• Psvakai nguwa ye kuerenga Bhaibheri zuwa no zuwa uye kunamata

• Hinga mhuri, munodikana kudisisa zviro zvinocokuita no kunamata kudarika zviro zve kudziwaraidza nazvo

ZVINOREKETHWA NGE BHAIBHERI: “Khwederai dhuze na Mwari, uye iyena acakhwedera dhuze naimwimwi.” (Tiyago 4:8) Munodikana kuronga zvamucaita pakunamata ke mhuri moona kuti muri kuzviita nguwa dzese here. (Genesi 18:19) Asi pane zvakawanda zvinodikanwa. Munodikana kurarama upenyu wenyu zuwa rimwe na rimwe mecitungamirirhwa na Mwari. Itai kuti mhuri yenyu igare no ushamwari wakabamba na Mwari ngo kureketa nge zvake “pamunogara mumba menyu no pamunohamba mu gwanza no pamunowata pasi no pamunopurumuka.” (Dheuteronomiyo 6:6, 7) Garai no cido cekuda kuita hingana Djoshuwa, uwo wakati: “Inini no nyumba yangu, ticaseenzera Djehovha.”—Djoshuwa 24:15.

ZVAMUNGAITA:

• Garai no urongwa we kufunda unoita kuti mucedze nge zve zviro zvingabetsera umwe na umwe uri mu mhuri menyu