Pamunowakana munonga maamba mhuri ipsva. Izvirokwazvo kuti mucarumbwa mecida abereki enyu uye kuareremedza, asi, wamakawakana naye ndiye wamunodikana kuda maningi kudarika anhu ese ari pa nyika. Izvi zvingashuphira hama dzenyu kuti dzitenderane nazvo. Asi zvinorekethwa nge Bhaibheri zvingamubetsera kuziya pekugumira, kuitira kuti murumbwe mune runyararo no anyaukama enyu uye kuseenza no simba kuti mubambise mhuri yenyu.

ZVINOREKETHWA NGE BHAIBHERI: “Kudza baba na mai ako.” (Aefeso 6:2) Azvinei nokuti makura zvakadini, munodikana kurumbwa mecikudza uye kureremedza abereki enyu. Munodikana kuziyawo kuti wamakawakana naye ane apsvari kana kuti anyaukama ake ekuti anodikanawo kuareremedza. “Rudo arina shanje,” hino musamborangarire kuti mwamuna wenyu kana kuti mukadzi wenyu wamusiya sure nge ndaa yekupindirana kaanonga eciita no abereki ake.—1 Akorinti 13:4; Agaratiya 5:26.

ZVAMUNGAITA:

• Siyai kureketa masoko akaita hingana, “Hama dzako dzinogara dzecindiona hinga munhu asikarangariri” kana kuti “Mai ako aambopfariri zvandinoita”

• Edzai kuona zviro hinga maonero anoita mudoni wenyu

ZVINOREKETHWA NGE BHAIBHERI: “Mwanarume acasiya baba ake na mai ake uye acabatana no mukadzi wake, uye acagara nyama imwe.” (Genesi 2:24) Pamunowaka kana kuwakwa, abereki enyu angaona hingana kuti acino basa rekumucengeta, uye angapedzesera apindira mu mucato wenyu kudarika zvaanodikana kuita.

Zvicatsamira kamuri no wamakawakana naye kuti mutenderane paanodikaka kugumira mowabvunza zvakanaka uye no rudo. Abudirei pamhene musikareketi zve hasha asi mecipangidza rureremedzo. (Zvierengo 15:1) Kudzidodosa, upfawi, uye mwoyo unononoka kutsamwa zvicamubetsera kuti mupindirane no hama dzenyu uye kuti murumbwe “mecipangidza rudo ku umwe na umwe.”—Aefeso 4:2.

ZVAMUNGAITA:

• Kana mecineseka ngo kupindira kuri kuita anyaukama mu mucato menyu, cedzai nge zvazvo no mudoni wenyu zviro pazvinonga zvakanaka

• Tenderanai kuti ngazvipi zvamucaita