FUNDO 01

Bhaibheri Ringamubetsera Kudini?

PLAY

Tese isusu tino mibvunzo yakaringana ne upenyu, kushuphika, rufu uye nge zve ramangwana. Uye tinonetsekawo nge zve zuwa ne zuwa, zvakaita hingana zve kudziriritira nazvo, uye kugara no mhuri inopfara. Anhu akawanda anoona kuti Bhaibheri aribetseri basi pa kudaira mibvunzo mikuru ye upenyu, asiwo rinopasa mazano anobetsera mu upenyu. Imwimwi munoona kuti Bhaibheri, ringabetsera munhu wamunoziawo here?

1. Mibvunzo dzipi dzinodairhwa ne Bhaibheri?

Bhaibheri rinodaira mibvunzo idzi dzinokosha: Upenyu wakatanga kudini? Ngacipi cinangwa ce upenyu? Ngei anhu asina ndaa ecishuphika? Cinyi cinoitika munhu paanofa? Kana munhu wese ecida runyararo, ngei keciitika hondo? Cinyi cicaitika ne nyika ino mune ramangwana? Bhaibheri rinotikohomedzesa kuti tipsvake mhinduro dze mibvunzo idzi, uye anhu akawanda akagumira mhinduro dzinopfadza.

2. Bhaibheri ringatibetsera kudini kuti tipfare mu upenyu wedu we zuwa ne zuwa?

Bhaibheri rinotipa mazano akanaka. Nge muezaniso, irona rinofundisa kuti mhuri dzingapfara kudini. Rinopasa mazano anocokuita patinosongana ne zviro zvinopisisa musoro, uye kupfadzwa katingaita ne basa redu. Imwimwi mucafunda zvinofundiswa ne Bhaibheri zvakaringana ne misoro ii uye ne zvimweniwo, paticacedza tiri tese pamwepo. Imwimwi mungakwanisa kuzotenderawo kuti “Matarhwa ese . . . anobetsera.”—2 Timoti 3:16.

Bhuku iri aricinji Bhaibheri. Asi ricamubetsera kuti muongorore Bhaibheri imwimwi pacenyu. Ndiyo ndaa tinomukohomedzesa kuti muerenge tsamba dziri mufundo uye dziezanisei ne zviya zvamuri kufunda.

FUNDAI ZVAKAWANDA

Onai kuti Bhaibheri rakabetsera kudini anhu akawanda, ngazvipi zvamungaita kuti mupfarire kurierenga, uye ngei zvakanaka kuona rubetso kuti murizwisise.

3. Bhaibheri rinokwanisa kutitungamirira

Bhaibheri rakaita hingana ruvheneko rine simba. Tingaseenzesa Bhaibheri kuti ritibetsere patinosanangura zvokuita, uye kutibetsera kuona zviro zviri mberi.

Erengai Pisarema 119:105, pedzepo cedzai nge zve mibvunzo dzinoteera:

Mutari we Pisarema iri, waiona kudini Bhaibheri?
Munoonawo kudini Bhaibheri?

4. Bhaibheri ringadaira mibvunzo yedu

Mwanakadzi umweni wakaona kuti Bhaibheri rakapa mhinduro dze mibvunzo dzaainga anadzo ke makore akawanda. Ridzai VHIDHIYO, pedzepo cedzai nge zve mibvunzo dzinoteera.

VHIDHIYO: Musamboruze Kariro! (1:48)

Mwanakadzi wataona mu vhidhiyo wainga ano mibvunzo dzipi?
Iyena wakabetserhwa kudini nge kufunda Bhaibheri?

Bhaibheri rinotikohomedzesa kuti tiite mibvunzo. Erengai Mateu 7:7, pedzepo cedzai zvinoteera:

Mibvunzo dzipi dzamunadzo, dzamunoda kuti Bhaibheri ridaire?

5. Mungakwanisa kupfara nge kuerenga Bhaibheri

Anhu ajinji arikupfara nge kuerenga Bhaibheri uye arikubetserhwa ndirona. Ridzai VHIDHIYO, pedzepo cedzai nge zve mibvunzo dzinoteera.

VHIDHIYO: Kuerenga Bhaibheri (2:05)

Mu vhidhiyo yetaona, madjaha akazwa kudini nge kuerenga Bhaibheri?
Ngei ano maonero akasiyana-siyana nge zve kuerenga Bhaibheri?

Bhaibheri rinoti rinokwanisa kutipa nhungamiriro inotinyaradza uye rinotipa kariro. Erengai Aroma 15:4, pedzepo cedzai nge zve mubvunzo unoteera:

Zvipikirhwa zve Bhaibheri uye kariro zvinomupfadza here?

6. Amweni angatibetsera kuti tizwisise Bhaibheri

Pa kutunhudzira kuerenga Bhaibheri ke munhu ega, anhu ajinji akaona kuti kucedza ne amweni kunobetsera. Erengai Zviito 8:26-31, pedzepo cedzai nge zve mubvunzo unoteera:

Tingazwisisa kudini Bhaibheri?—Onai mavhersikuro 30, 31.

Mwanarume we ku Etiopiya waida rubetso rokuti anyase kuzwisisa Matarhwa. Anhu akawanda nyamasi anoona zvecibetsera kucedza nge zve Bhaibheri ne amweni

ANHU AMWENI ANOTI: “Kufunda Bhaibheri kupedza nguwa.”