FUNDO 12
Cinyi Cicamubetsera kuti Murumbwe Mecifunda Bhaibheri?
Kufunda Bhaibheri kunounza mibairo yakawanda. Asi azvirinyorepi. Nguwa dzimweni, pamweni mungambodzibvunzisa kuti andizokwanisi kurumbwa ndecifunda Bhaibheri. Asi zvakanakira papi kurumbwa mecirifunda? Mungaitei kuti murumbwe mecifunda Bhaibheri kunyazi mecisongana no zvinetso?
1. Ngei kufunda Bhaibheri kecikosha?
“Soko ra Mwari ripenyu uye rino simba.” (Ahebheru 4:12) Kufunda Bhaibheri kunokosha ngekuti rinotibvunza kuti Mwari anodei ne zvedu uye anotiona kudini. Mecibetserhwa nge Bhaibheri, munoguma pakufunda zviro zvipsva, kugara no uzii uye no kariro. Uye cinonyanya kukosha ngecekuti, rinobetsera kuti tigare ne ushamwari na Mwari. Pamunofunda Bhaibheri, siyai kuti irona ricinje upenyu wenyu.
2. Ngei zvakanaka kuti tibate no nyara mbiri cokwadi cinofundiswa mu Bhaibheri?
Cokwadi ciri mu Bhaibheri cakaita hingana pfuma. Ndiyo ndaa irona recitibvunza kuti ‘titenge cokwadi uye tisambocitengese’. (Zvierengo 23:23) Kana tikagara tecirangarira cokwadi ciri mu Bhaibheri, ticaseenza ne simba kuti tirifunde kunyazi pano zvinetso.—Erengai Zvierengo 2:4, 5.
3. Djehovha angamubetsera kudini kuti murumbwe mecifunda?
Djehovha, Musiki wemasimba ese uye Shamwari, anoda kumuziya kupinda munhu upi hake uye anoda kumubetsa kuti mumuziye. Ayena anokwanisa kumupasa “cido cekuita zviro uye simba rekuzviita.” (Erengai Afiripi 2:13.) Ngokudaro, paya pamunozwa musina cido cekufunda, kana kuti pamunoona zvecishupha kuseenzesa zvamunofunda, iyena acamubetsera. Kana mukada simba rekuti mukunde zvinetso kana matambudziko, Djehovha acamubetsera. Itai munamato nguwa dzese kuna Djehovha kuti iyena amubetsere kurumbwa mecifunda Bhaibheri.—1 Atesaronika 5:17.
FUNDAI ZVAKAWANDA
Onai kuti mungarumbwa mecifunda kudini Bhaibheri kunyazi anhu amweni ecimushora kana kuti paya pamunonga mune zvakawanda zvekuita. Onai zvingaizwa ndi Djehovha kuti amubetsere kuti musarekere kufunda.
4. Kufunda Bhaibheri ngakugare pa mbuto yekutanga mu upenyu wenyu
Nguwa dzimweni, tingawandirhwa ne zviro zvakawanda zvekuita zvekuti tinoona hingana tisina nguwa yekufunda Bhaibheri. Cinyi cingamubetsera? Erengai Afiripi 1:10, pedzepo cedzai nge zve mibvunzo dzinoteera:
-
Mu maonero enyu, ngazvipi zvamungati ndizvona “zviro zvinokosha maningi kudarika zvimweni” mu upenyu?
-
Mungapangidza kudini kuti kufunda Bhaibheri kunokosha mu upenyu wenyu?
-
Kana mukatanga kudzadza bhardhi no madjeca uye mozoedza kukanda mapuwe, mapuwe aona aazopindi ese
-
Asi kana mukatanga kukanda mapuwe, pacasara mukana ucakwana kupinda madjeca akawanda. Nge mushobo umwewo, kana mukatanga kuita “zviro zvinodikanwa maningi kupinda zvimweni”, pacasara nguwa yekuti muite zviro zvimweni
Kufunda Bhaibheri kunodzadzisa zvinodikanwa zvedu zvekumwiya, kana kuti kunodzadzisa cido cedu cekuda kuziya uye kunamata Mwari. Erengai Mateu 5:3, pedzepo cedzai nge zve mubvunzo unoteera:
-
Makomborero api aticaona kana tikarumbwa tecikoshesa fundo ye Bhaibheri?
5. Musatendere kuti anhu aite kuti musiye kufunda Bhaibheri
Zvingaitika kuti anhu amweni angaedza kuita kuti musiye kufunda Bhaibheri. Onai muezaniso wa Francesco. Ridzai VHIDHIYO, pedzepo cedzai nge zve mibvunzo dzinoteera.
-
Mu vhidhiyo yataona, hama uye shamwari dza Francesco dzakaita kudini paakaabvunza zvaaifunda?
-
Wakakomborerhwa kudini nge kushingirira kake?
Erengai 2 Timoti 2:24, 25, pedzepo cedzai nge zve mibvunzo dzinoteera:
-
Hama ne shamwari dzenyu dzirikuona kudini zvamurikufunda?
-
Maererano no mavhersikuro aya, cinyi camunodikana kuita kana munhu akamurambidza kufunda Bhaibheri? Ngei mecidaro?
6. Gondai kuti Djehovha acamubetsera
Patinorumbwa tecikhwedera dhuze na Djehovha, tinorumbwawo tiino cido cekuda kumupfadza. Kunyazi zvakadaro, zvingashupha kuita cinjo mu upenyu kuti tirarame maererano no zvaanoda. Kana mukagara no mazwiro akadaro, musarembe. Djehovha acamubetsera. Ridzai VHIDHIYO, pedzepo cedzai nge zve mibvunzo dzinoteera:
-
Mu vhidhiyo yetaona, icinjo dzipi dzakaizwa ndi Jim kuti apfadze Djehovha?
-
• Pazviro zvaapanganidza, ngazvipi zvamupfadzawo?
Erengai Ahebheru 11:6, pedzepo cedzai nge zve mibvunzo dzinoteera:
-
Djehovha acaitei ku anhu aya “anomupsvaka ne mwoyo wese,” anoita zviri zvese kuti amuziye uye amupfadze?
-
Munorangarira kuti Djehovha anozwa kudini paanomuona mecipeta masimba kuti mufunde Bhaibheri?
KANA MUNHU AKAMUBVUNZISA: “Ngei mecifunda Bhaibheri?”
-
Maizodaira kudini?
MUCIGWAGWA
I zvirokwazvo kuti tingasongana no zvitsinzwa nge kufunda Bhaibheri. Asi kurifunda kucamubetsera kuti mupfare nokusikaperi. Rumbwai mecigonda na Djehovha, uye iyena acamukomborera.
Mibvunzo yekuhwirinzira
-
Ngei cokwadi ce Bhaibheri ciri pfuma kamuri?
-
Mungapangidza kudini kuti munokoshesa “zviro zvinodikanwa maningi kupinda zvimweni”?
-
Ngei mecidikana kukumbira rubetso ra Djehovha kuti murumbwe mecifunda Bhaibheri?
ZIYAI ZVAKAWANDA
Onai mazano marongomuna akabetsera anhu akawanda kuti aseenzese zvakanaka nguwa yawo.
“Zvamungaita Kuti Museenzese Nguwa Yenyu Zvakanaka” (Mukai! ya Fevrero ya 2014)
Mwamuna wa Grace wainga asikazwisisi kuti ngei Grace waida kuuseenzera Mwari. Onai kuti Djehovha akabetsera kudini Grace.
Onai mabetserhwe akaizwa mwanarume umweni ngekushingirira ke mukadzi wake.
Nguwa dzimweni, Apupuri a Djehovha anopumhwa kuti anoparadza mhuri. I zvirokwazvo here?
“Apupuri a Djehovha Anoparadzanisa Mhuri Here Kana Kuti Anodzibatanidza?” (Fundo ye mu saite)
