Makambofirhwa here? Pa mugarire we zviro unoshupha kudai, pamweni mungadzibvunzisa kuti: ‘Cinyi cinoitika ku munhu paanofa? Ndicazoonazve anhu aya andinoda here?’ Mu fundo ino no inoteera, ticaona mhinduro dze Bhaibheri dzinonyaradza.

1. Cinyi cinoitika munhu paanofa?

Djesu akaezanisa rufu no hope. Munhu paanonyasa kuwata aazii zvinonga zveciitika paari. Rufu rakaezana papi no hope? Mu masure mekuti munhu wafa, iyena aacarhwadziwi kana kushuphika. Aacazwi hinga kuti ari ega, azvinei no kuti aida hama dzake no shamwari. Bhaibheri rinoti, “Akafa apana caanoziya.”—Erengai Muparidzi 9:5.

2. Kuziya cokwadi nge zve akafa kunotibetsera kudini?

Anhu akawanda anothya kufa—uye anothya anhu akafa! Asi kuziya zvinofundiswa no Bhaibheri nge zve akafa kunotinyaradza. Djesu akati: “Cokwadi cicamusudzunura.” (Juau 8:32) Magereja amweni anosobhuya kuti anhu ese munyika ano mwiya usikafi, asi Bhaibheri arifundisi izvona. Ngo kudaro apana unorumbwa ecishuphika paanofa. Kusiya izvi, akafa aakwanisi kutikuwadza ngekuti apana caanoziya. Hino atidikani kuita zviro kuti tipfadze akafa kana kuanamata, uye atidikani kuanamatirira.

Anhu amweni anoti zvinokwanisika kureketa no akafa. Asi izvi azvingaitiki. Hinga zvetabva kufunda, “akafa apana caanoziya.” Kana munhu ecirangariria kuti unoreketa no hama yake kana shamwari yakafa, asi zve zvirokwazvo iyena unonga ecireketa no madhimoni anonyepera kugara munhu wakafa. Ndiyo ndaa, kuziya cokwadi nge zve akafa kunoticengetedza pa madhimoni. Djehovha anotingwadza kuti tisaedze kureketa no akafa ngekuti anozviziya kuti madhimoni anokuwadza.—Erengei Dheuteronomiyo 18:10-12.

3. Fundai cokwadi nge zve magarire e akafa

Mu nyika yese, anhu anorangarira zvakasiyana-siyana nge zve zvinoitika munhu paanofa. Uye zviri pamhene kuti, aaesepi anoreketa cokwadi.

• Kamunogara, anhu anotii nge zve mugarire we akafa?

 4. Kuziya cokwadi nge zve akafa kunotibetsera

Kuziya cokwadi nge pamusoro pe akafa kunotisudzunura pa kuthya akafa. Erengai Muparidzi 9:10, pedzepo cedzai nge zve mubvunzo unoteera:

• Akafa anokwanisa kutikuwadza here?

Kana tikaziya cokwadi ce Bhaibheri, atizotendi manyepo e kuti tinodikana kupfadza kana kunamata akafa. Erengai Isaya 8:19 uye Zvakapangidzwa 4:11, pedzepo cedzai nge zve mubvunzo unoteera:

• Munorangarira kuti Djehovha anozwa kudini munhu paanonamata akafa kana kukumbira rubetso ku anhu akafa?

5. Cokwadi nge zve akafa cinotinyaradza

Anhu akawanda akafunda kuti kana awona akazofa acazotambudzwa nge ndaa ye zviro zvakashata zvaakaita. Asi zvinonyaradza kuziya kuti atizotambudziki kana tikafa—kunyazi taiita zviro zvakashata. Erengai Aroma 6:7, uye pedzepo cedzai nge zve mubvunzo unoteera:

• Bhaibheri rinoti kana munhu akafa unosudzunurhwa zvitema zvake, kana kuti kuna Mwari zvitema zvake zvariphwa. Ngo kudaro, munorangarira kuti munhu paanofa unotambudzwa nge ndaa ye zvitema zvaakaita here?

Patinorumbwa tecifunda zvakawanda nge zva Djehovha, tinokwanisa kuzwisisa kuti Djehovha aangasii akafa ecishuphika. Erengai Dheuteronomiyo 32:4 uye 1 Juau 4:8, uye pedzepo cedzai nge zve mibvunzo dzinoteera:

• Mwari arikupanganidzwa mu mavhersikuro aya angatambudza munhu here?

• Kuziya kamakaita cokwadi nge zve rufu kakamunyaradza here? Ngei mecidaro?

 MUCIGWAGWA

Munhu paanofa aacazii ciro. Akafa aatambudziki uye aakwanisi kutikuwadza.

Mibvunzo yekuhwirinzira

• Cinyi cinoitika patinofa?

• Kuziya cokwadi nge zve rufu kunotibetsera kudini?

• Ngei kuziya cokwadi nge zve rufu kecinyaradza?