FUNDO 20

Ungano Yakarongwa Kudini

PLAY

Djehovha ndi Mwari akarongeka. (1 Akorinti 14:33) Ngo kudaro, tinoetsera kuti anhu ake agare akarongeka. Ungano ye cikristu yakarongwa kudini? Tingabetsera kudini kuti ungano i hambe zvakanaka?

1. Musoro we ungano ndiyani?

“Kristu ndiye musoro we ungano.” (Aefeso 5:23) Ari kudenga, iyena anoonerera mabasa e anhu a Djehovha mu pasi rese. Djesu akagadza “muranda wakagondeka uye wakangwara”—cikwata cidoko ce akuru akakura pa kunamata anoziikanwa kuti Dare Rinotungamirira. (Erengai Mateu 24:45-47.) Hingana aphostori uye akuru e mu zana rekutanga e mu Djerusarema, Dare Rinotungamirira rinopasa nhungamiriro ku ungano dze nyika dzese. (Zviito 15:2) Asi anarume aya andiwopi atungamiriri e sangano redu. Awona anotungamirirhwa na Djehovha ne Soko rake uye anodzikanda pasi pe musoro we ungano Djesu.

2. Ngaripi basa re akuru?

Akuru e Cikristu akakura pakunamata. Anofundisa eciseenzesa Matarhwa uye anotungamirira anhu a Djehovha eciabetsera uye eciabambisa. Awona aaripwi nge basa raanoita. Pane kudaro, awona anoseenza, “zvecibva mu mwoyo hinga zvinodiwa na Mwari asikazviiti nge kuda upfumi, asi no mwoyo wese.” (1 Pedru 5:1, 2) Akuru anobetserhwa nge abati anoseenzera zvekuti no kuhamba ke nguwa, angakwaniriswa hingana akuru.

Dare Rinotungamirira rinogadza akuru amweni kuti agare aonereri e nharaunda. Awona anovhakacira ungano dzakawanda kuti apase nhungamiriro uye no kubambisa. Awona anogadza akuru no abati anoseenzera, asi anotanga kuona zvinorekethwa no Bhaibheri.—1 Timoti 3:1-10, 12; Tito 1:5-9.

3. Ngaripi basa re Mupupuri umwe na umwe?

Munhu wese ari mu ungano “anokudza zina ra Djehovha” ngekupinda misangano ye ungano uye kuita basa rekuparidzira maererano no migariro yawo.—Erengai Pisarema 148:12, 13.

FUNDAI ZVAKAWANDA

Fundai kuti Djesu mutungamiriri wakadini, uye kuti akuru anoedza kudini kuteedzera muezaniso wake, moonawo kuti tingaseenza kudini takabatana na Djesu uye no akuru.

4. Djesu mutungamiriri akanaka

Djesu anotibvunza masoko anonyaradza. Erengai Mateu 11:28-30, pedzepo cedzai nge zve mubvunzo unoteera:

Djesu mutungamiriri akaita kudini uye anoda kuti tizwe kudini nge zve utungamiriri wake?

Akuru anoteedzera kudini Djesu? Ridzai VHIDHIYO.

VHIDHIYO: Akuru Anobetsera Panoitika Cigidhigidhi ku Nepal (4:56)

Bhaibheri rinoreketa zvakadjeka kuti akuru angaita kudini basa rawo.

Erengai Isaya 32:2 uye 1 Pedru 5:1-3, pedzepo cedzai nge zve mibvunzo dzinoteera:

Munozwa kudini ne cido cino akuru cekuzorodza amweni hinga zvaiita Djesu?
Akuru anoteedzera kudini Djesu?

5. Akuru anoita maererano no zvaanofundisa

Djesu anoda kuti akuru aone kudini basa rawo? Onai VHIDHIYO.

VHIDHIYO: Akuru, Tungamirirai! (7:39)

Djesu akapangidza zvinodikanwa kuizwa nge aya ano ubaba mu ungano. Erenga Mateu 23:8-12, pedzepo cedzai nge zve mubvunzo unoteera:

Pa zviro zvinorekethwa no Bhabheri nge zve akuru, musiyano upi uripo unoshamisa wamunoona pakati pe akuru e ungano no atungamiriri e magereja?

Akuru ne mhuri dzawo anoita zviri zvese kuti arumbwe akabamba pakunamata
Akuru anorangarira anhu ase ari mu ungano
Akuru anoita basa rekuparidzira nguwa dzese
Akuru anofundisa ungano. Anoitawo mabasa amweni akadai hingana kucenesa mu Nyumba ye Umambo

6. Tingakwanisa kuseenza takabatana no akuru

Bhaibheri rinotipasa zvikonzero zvakanaka zvekuti tiseenze takabatana no akuru. Erengai Ahebheru 13:17, pedzepo cedzai nge zve mibvunzo dzinoteera:

Zvine musoro here Bhaibheri parinotikohomedzesa kuti tizwire uye kuti tidzikande pasi pe akuru? Imwimwi munozwawo kudini nazvo?

Erengai Ruka 16:10, pedzepo cedzai nge zve mubvunzo unoteera:

Ngei zvecikosha kuseenza takabatana no akuru kunyazi mu zviro zvinoita hinga zvidoko?

ANHU AMWENI ANOTI: “Amudikani henyu kugara no gereja kuti munamate Mwari.”

Munorangarira kuti munhu unobetserhwa kudini kana akanamata Mwari ari musangano rake?

MUCIGWAGWA

Djesu ndiyena musoro we ungano. Tinopfara kuseenza takabatana no akuru anoseenza ari pasi pake, ngekuti awona anotibambisa uye anotifundisa nge muezaniso wawo.