FUNDO 24
Ngirozi Ndiyani uye Dzinoitei?
Djehovha anoda kuti tifunde nge zve mhuri yake ye kudenga. Mhuri ii inobatanidzawo ngirozi dzinodainzwa “ana a Mwari.” (Djobo 38:7) Bhaibheri rinobhuyei nge zve ngirozi? Dzinoitei mu upenyu we anhu? Ngirozi dzese dzinobatanidzwa mu mhuri ya Mwari here?
1. Ngirozi cinyi?
Djehovha akasika ngirozi asati asika nyika. Hinga Djehovha, ngirozi adzioneki uye dzinorarama kudenga. (Ahebheru 1:14) Kune mamirionji e ngirozi uye imwe na imwe yadzo ine unhu wayo. (Zvakapangidzwa 5:11) ‘Dzinoita kuda ka Djehovha, dzecipurutana izwi rake.’ (Pisarema 103:20) Kareko, nguwa dzimweni Djehovha aiseenzesa ngirozi kuti dzitumire masoko ku anhu ake, kuti dziabetsere kana kuti dziaponese. Nyamasi uno, ngirozi dzinobetsera aKristu kuti agumire anhu anoda kufunda nge zva Mwari.
2. Sathani ne madhimoni ake ndi anaani?
Ngirozi nganani adzizi kurumbwa dzakagondeka kuna Djehovha. Ngirozi yakatanga kupanduka “inozwi Dhiyabhurosi uye Sathani, uye uri kucengedza nyika yese.” (Zvakapangidzwa 12:9) Sathani wakada kutonga pa mbuto ya Mwari. Ndiyo ndaa, iyena wakakwanisa kuita kuti Adhamu na Evha kutobatanidzawo ngirozi dzimweni kuti dzibatane naye pakupanduka. Ngirozi idzi dzakapanduka dzinozwi madhimoni. Djehovha akadzingira ngirozi idzi kudenga uye zvino dziri pa nyika pano. Asi idzona dzicaparadzwa.—Erengai Zvakapangidzwa 12:9, 12.
3. Sathani ne madhimoni ake anoedza kuticengedza kudini?
Sathani ne madhimoni ake anocengedzera anhu akawanda eciseenzesa zvemudzimu. Anhu paanoita zvemudzimu, anonga eciedza kureketa no madhimoni. Izvona zvakashata. Ngo muezaniso, anhu anobvunzisa aya anoongorora nyeredzi, afemberi, maphorofiti uye n’anga. Amweni anopsvaka kuraphwa no mushobo une cokuita no zvemudzimu. Sathani unoitawo kuti anhu atendere kuti angakwanisa kureketa no akafa. Asi Djehovha anoti: “Musaende kune aya anoreketa no mudzimu uye musabvunzise afemberi.” (Revhitiko 19:31) Ayena anotingwadza kuti atidziirire pana Sathani ne madhimoni ake. Awona azondi a Mwari uye aadi zvakatinakira.
FUNDAI ZVAKAWANDA
Fundai zviro zvakanaka zvinoizwa nge ngirozi, ngozi iripo pakuita zvemudzimu uye tingadzidziirira kudini kuna Sathani no madhimoni.
4. Ngirozi dzinobetsera anhu kufundira nge zva Djehovha
Ngirozi adziparidziri ku anhu. Asi dzingakwanisa kubetsera aseenzi a Djehovha kuti agumire anhu anoda kufunda nge zva Djehovha. Erengai Zvakapangidzwa 14:6, 7, pedzepo cedzai nge zve mibvunzo dzinoteera:
-
Ngei tecida rubetso re ngirozi pakuparidzira?
-
Zvinobambisa kuziya kuti ngirozi dzingakwanisa kumubetsera kuti mugumire anhu anoda kufunda nge zve Bhaibheri here? Ngei mecirangarira kudaro?
5. Garai kure no zvemudzimu
Sathani ne madhimoni azondi a Djehovha. Awona azondi eduwo. Erengai Ruka 9:38-42, pedzepo cedzai nge zve mubvunzo unoteera:
-
Madhimoni anotambudza kudini anhu?
Atidi kusiya kuti madhimoni apinde mu upenyu wedu. Erengai Dheuteronomiyo 18:10-12, pedzepo cedzai nge zve mibvunzo dzinoteera:
-
Mishobo ipi inoseenzeswa no madhimoni kuti apinde mu upenyu wedu uye kuti aedze kureketa na isusu? Zviro zvipi zvecidhimoni zvinonyanya kuizwa kamunogara?
-
Munoonawo kudini kurambidzwa katinoizwa na Djehovha kuti tisaite zvemudzimu? Ngei?
Ridzai VHIDHIYO, pedzepo cedzai nge zve mibvunzo dzinoteera.
-
Munoona kuti citambo cainga cakasungirhwa pa muoko we mwana wa Rita caizobara ngozi here? Ngei meciona kudaro?
-
Rita waidikana kuitei kuti adzidziirire ku madhimoni?
AKristu e zvirokwazvo anorhwisa madhimoni nguwa dzese. Erengai Zviito 19:19 uye 1 Akorinti 10:21, pedzepo cedzai nge zve mubvunzo unoteera:
-
Ngei zvecikosha kuparadza ciro cipi haco cine cokuita no zve mudzimu?
6. Kundai pakurhwisana na Sathani ne madhimoni ake
Madhimoni anotongwa na Sathani. Asi ngirozi dzakagondeka dzinotongwa no mukuru-kuru we ngirozi dzese, arkanjo Migeri. Iri i zina rimweni ra Djesu. Migeri ano simba rakadini? Erengai Zvakapangidzwa 12:7-9, pedzepo cedzai nge zve mibvunzo dzinoteera:
-
Ndiyani ano simba pakati pa Migeri no ngirozi dzake, uye Sathani no madhimoni ake?
-
Munorangarira kuti ateeri a Djesu anodikana kuthya Sathani ne madhimoni ake here?
Mungakunda pakurhwisana na Sathani ne madhimoni. Erengai Tiyago 4:7, pedzepo cedzai nge zve mubvunzo unoteera:
-
Mungadzidziirira kudini kuna Sathani ne madhimoni?
ANHU AMWENI ANOTI: “Apana cakashata kutamba mavhidhiyogemi kana kuona firme inocokuita no zvemudzimu. Kutambawo hako.”
-
Ngei zvakashata kurangarira kudaro?
MUCIGWAGWA
Ngirozi dzakagondeka dzinotibetsera. Sathani no madhimoni ake azondi a Djehovha uye anoseenzesa zvemudzimu kuti acengedzere anhu.
Mibvunzo yekuhwirinzira
-
Ngirozi dzinobetsera kudini anhu kuti afundire nge zva Djehovha?
-
Sathani ne madhimoni ake ndi anaani?
-
Ngei mecida kugara kure no zve cidhimoni?
ZIYAI ZVAKAWANDA
Onai zviro zvinopangidza kuti Djesu ndi arkanjo Migeri.
Onai zvinopangidza kuti Dhiabhurosi munhu kamare, haiwa basi kushata kuri mu mwoyo me munhu.
Onai kuti mwanakadzi umweni wakasudzunurhwa kudini pa simba re madhimoni.
“Iye Akawana Donzo Muupenyu” (Murindiri, wa 1 ya Khunguru wa 1993, mu ciShona)
Onai kuti Sathani unoseenzesa kudini zvemudzimu kuti acengedzere anhu.
“Chokwadi Pamusoro Pemashiripiti Nouroyi” (Mugwagwa Unoenda Kuupenyu, dii 5, mu ciShona)
