FUNDO 26
Ngei Zviro Zvakashata Zveciitika uye Ngei Tecishuphika?
Panoitika tsawana, kajinji anhu anosodzibvunzisa kuti: “Ngei zviro izvi zveciitika?” Zvinopfadza mangi kuziya kuti Bhaibheri rinotipasa mhinduro ye mubvunzo uu!
1. Zviro zvakashata zvakatanga kudini mu nyika?
Sathani Dhiyabhurosi wakapandukira Djehovha. Iyena waida kutonga amweni ndiyo ndaa wakacengedzera anhu e kutanga, Adhamu na Evha kuti abatane naye pakupandukira Mwari. Sathani wakazviitisa kudini? Iyena wakanyepera Evha. (Genesi 3:1-5) Iyena wakaita kuti Evha arangarire kuti Djehovha ainga asikadi kumupasa zviro zvakanaka. Sathani wakapangidza kuti anhu angapfara kana akasazwira Mwari. Iyena wakareketa manyepo e kutanga ecinyepera Evha kuti anhu aisazofapi. Ndiyo ndaa Bhaibheri reciti Sathani “munyepi uye baba we manyepo.”—Juau 8:44.
2. Adhamu na Evha akasanangura kuitei?
Djehovha akabata zvakanaka Adhamu na Evha. Djehovha akati aikwanisa kurhya micero ye miti yese ye mu munda we Edheni kusiya muti umwe basi. (Genesi 2:15-17) Asi awona akasanangura kurhya mucero we muti uya waakarambidzwa kurhya. Evha “wakatora mucero wakhona otanga kuurhya.” Gare gare, Adhamu “wakatangawo kurhya.” (Genesi 3:6) Adhamu na Evha ainga akakwana ndiyo ndaa zvainga zvisikaanetseri kuita zvakanaka. Asi awona akasanangura kusazwira Djehovha. Paakaita izvi, awona akaita citema uye akaramba kutongwa na Mwari. Zvaakaita zvakaunzisa matambudziko akawanda kaari.—Genesi 3:16-19.
3. Zvakasanangurhwa ndi Adhamu na Evha zvakashaisha kudini upenyu wedu?
Adhamu na Evha paakaita citema, awona akagara anhu asikazi kukwana, uye izvi zvakaita kuti abararise kusakwana ku ana awo ese. Nge zva Adhamu, Bhaibheri rinoti: “Citema cakapinda mu nyika ngo ndaa yo munhu umwe basi, uye rufu rakapinda ngo ndaa yo citema, ngokudaro rufu rakabararika ku anhu ese.”—Aroma 5:12.
Hino ngei tecishuphika? Pamweni paya tinoshuphika nge ndaa ye zvisananguro zvatinoita. Nguwa dzimweni, tinoshuphika nge ndaa ye zvisananguro zvakashata zvinoizwa nge anhu amweni. Uye nguwa dzimweniwo tinoshuphika ngekuti tinonga tiri pa mbuto ne nguwa yakashata.—Erengai Muparidzi 9:11.
FUNDAI ZVAKAWANDA
Onai kuti ngei teciti Mwari andiepi anokonzera matambudziko ari mu nyika nyamasi uno. Onaiwo kuti ayena anozwa kudini patinoshuphika.
4. Ndiyani anokonzera matambudziko?
Anhu akawanda anotenda kuti Mwari ndiye anotonga nyika. Kodi zvirokwazvo here? Ridzai VHIDHIYO.
Erengai Tiyago 1:13 uye 1 Juau 5:19, uye pedzepo cedzai nge zve mubvunzo unoteera:
-
Mwari ndiye anokonzera matambudziko e anhu here?
5. Onai zvakaitika kubvira Sathani paakatanga kutonga
Erengai Genesi 3:1-6, pedzepo cedzai nge zve mibvunzo dzinoteera:
-
Manyepo api akarekethwa ndi Sathani? —Onai mavherisikuro 4, 5.
-
Sathani wakanyepera kudini Djehovha kuti ano zvakanaka zvaainyima anhu?
-
Maererano no zvinorekethwa na Sathani, anhu anodikana kutungamirirhwa no utongi wa Djehovha kuti apfare here?
Erengai Muparidzi 8:9, uye pedzepo cedzai nge zve mubvunzo unoteera:
-
Anhu arikutongana kudini paasiripi kutungamirirhwa na Djehovha?
-
Adhamu na Evha ainga ari anhu akakwana uye aigara mu Paraizo. Asi aona akateerera Sathani uye akapandukira Djehovha
-
Paakapanduka, nyika yakagara ne citema matambudziko uye rufu zvakapinda mu nyika
-
Djehovha acapedza citema, matambudziko uye rufu. Anhu acahwirirazve kugara akakwana uye kurarama mu Paraizo
6. Djehovha acapedza matambudziko edu
Kodi Djehovha anorangarira nge zve matambudziko edu here? Ngatione zvakatarhwa na Mambo Dhavhidhi uye no muphostori Pedru. Erengai Pisarema 31:7 uye 1 Pedru 5:7, pedzepo cedzai nge zve mubvunzo unoteera:
-
Munozwa kudini ngo kuziya kuti Djehovha anorangarira nge zve matambudziko edu?
7. Mwari acapedza kushuphika kese ke anhu
Erengai Isaya 65:17 uye Zvakapangidzwa 21:3, 4, pedzepo cedzai nge zve mubvunzo unoteera:
-
Zvakanakirei kuziya kuti Djehovha acapedza zviro zvese zvakashata zvinoshupha anhu?
Maizviziya here?
Sathani paakareketa manyepo e kutanga, wakasvipisa zina ra Djehovha. Iyena wakaita izvi ngokuita kuti zvioneke hinga kuti Djehovha Mutongi wakashata uye asina rudo. Nokukasika, Djehovha acapedza kushuphika kese uye acapangidza pamhene kuti utongi wake ndiwo utongi wakanakisisa. Izvi pazvicaitika, ayena acacenesa zina rake pamanyepo ese. Ndico ciro cakanakisisa mu nyika yese.—Mateu 6:9, 10.
ANHU AMWENI ANOTI: “Kushuphika muedzo unobva kuna Mwari.”
-
Mukazwa munhu ecidaro, mungamudaira kudini?
MUCIGWAGWA
Sathani Dhiyabhurosi no anhu airi e kutanga ndiwo akakonzera zviro zvakashata zviri pa nyika. Djehovha anotirangarira maningi, uye nokukasika acapedza kushuphika kese.
Mibvunzo yekuhwirinzira
-
Sathani wakareketa manyepo api kuna Evha?
-
Kupanduka ka Adhamu na Evha kakashaisha kudini upenyu wedu?
-
Tinozviziya kudini kuti Mwari anorhwadziwa patinoshuphika?
ZIYAI ZVAKAWANDA
Cinyi cinozwi citema? Onai mhinduro mu Bhaibheri.
Erengai zvakawanda zvakaringana no mubvunzo wakaizwa ndi Sathani Dhiyabhurosi mu munda we Edheni.
“Nei Mwari Achibvumira Kutambura?” (Murindiri wa 1 ya Mavhiza wa 2014, mu ciShona)
Onai mhinduro ye mubvunzo unopandisa musoro.
“Ngei Adjudha Akauraiwa ne Utongi we a Nazi? Ngei Mwari Asikazi Kupindira?” (Fundo ye mu saite)
Onai kuti mwanarume umweni wakafundei nge zve matambudziko aainga eciona eciitika.
