FUNDO 30
Anhu Amunoda Acararamazve!
Rufu rinounzisa marhwadzo uye kushuphika. Ndiyo ndaa, Bhaibheri rinobhuya nge zve rufu kuti muzondi. (1 Akorinti 15:26) Mu fundo 27, makafunda kuti Djehovha acatsakatisa muzondi uu. Asi cinyi cicaitika kuno anhu aya akafa? Mu fundo ino, mucafunda nge zve cipikirhwa cimwenizve cinoshamisa ca Djehovha cekuti ayena acamutsa mamirionji e anhu kuti ararame nokusikaperi. Asi izvona zvicaitikadi kamare here? Awona acamutswa kuti araramire kupi? Kudenga here kana kuti pa nyika pano?
1. Djehovha anoda kuitei ku hama no shamwari dzedu dzakafa?
Djehovha anoda maningi kumutsa anhu aya akafa. Mwanarume wainga akagondeka unozwi Djobo wainga ano rugondo rekuti Mwari ainga asikazomukanganwi kana akafa. Iyena wakati kuna Mwari: “Mucadainza uye ndicamudaira [kubva kumakuwa].”—Erengai Djobo 14:13-15.
2. Tinoziya kudini kuti anhu akafa angamutswa?
Djesu paainga ari pa nyika, Mwari akamupasa simba rekumutsa anhu akafa. Ngo muezaniso, Djesu akamutsa musikana wainga ano makore 12 uye mwana wemufirhwakadzi. (Marko 5:41, 42; Ruka 7:12-15) Ayena akamutsawo shamwari yake Razaro. Kunyazi Razaro wainga afa uye aigwa ke mazuwa marongomuna, Djesu akamumutsa. Djesu akatanga aita munamato kuna Mwari, uye akati: “Razaro, buda!” Uye “mwanarume wainga akafa wakabuda” mu guwa ari mupenyu! (Juau 11:43, 44) Rangaridzai kupfara kakaita hama no shamwari dza Razaro!
3. Pano kariro yekuti hama ne shamwari dzenyu dzicamutswa here?
Bhaibheri rinogondesa kuti: “kucaoneka rumuko.” (Zviito 24:15) Anhu akamutswa na Djesu mu nguwa yekare aazi kuenda kudenga. (Juau 3:13) Awona akapfara ngekuhwirira kuti araramezve pa nyika. Ngo mushobo umwewo, nokukasika Djesu acamutsa mabhirionji e anhu kuti ararame nokusikaperi mu paraizo pa nyika. Ayena akati “ese aya ari mu makuwa e anorangarirhwa” acazomutswa. Izvi zvinoreya kuti ese ari mundangariro ya Mwari acararamazve, kunyazi aya asikacaedzurirhwizve no anhu kuti akamborarama.—Juau 5:28, 29.
FUNDAI ZVAKAWANDA
Onai mu Bhaibheri zviro zvinopangidza kuti akafa angakwanisa kumutswa uye kuti izvona zvicaitika kamare. Onaiwo kuti rumuko ringamupasa kudini nyaradzo uye kariro.
4. Djesu akapangidza kuti anokwanisa kumutsa akafa
Nyasai kuongorora zvakaizwa na Djesu ku shamwari yake Razaro. Erengai Juau 11:14, 38-44, pedzepo cedzai nge zve mibvunzo dzinoteera:
-
Tinoziya kudini kuti Razaro wainga akafadi kamare? —Onai vhersikuro 39.
-
Djesu akamutsa Razaro kuti araramezve pa nyika pano. Kudai Razaro akaenda ku denga, munorangarira kuti Djesu aizoita izvona here?
5. Anhu akawanda acazomutswa!
Erengai Pisarema 37:29, pedzepo cedzai nge zve mubvunzo unoteera:
-
Mabhirionji e anhu acamutswa. Acararamira kupi?
Pane kumutsa basi aseenzi akagondeka a Djehovha, Djesu acamutsawo anhu amweni akawanda. Erengai Zviito 24:15, pedzepo cedzai nge zve mubvunzo unoteera:
-
Ndiani wamaizopfarira kuonazve pa rumuko?
Zviri nyore kuti baba amutse mwana wawo wakawata. Ngo mushobo umwewo, zviri nyore maningi kuna Djesu kuti amutse munhu akafa
6. Rumuko ringamupasa nyaradzo uye kariro
Kuerenga mu Bhaibheri zvakaitika ku mwana wa Djairo, zvinonyaradza uye zvinobambisa anhu akawanda anoshuphika nge ndaa yekufirhwa. Erengai ngano iri pana Ruka 8:40-42, 49-56.
Asati amutsa mwana wa Djairo, Djesu akabvunza baba ake kuti: “Usathye hako, asi gara nokutenda.” (Onai vhersikuro 50.) Kariro ye rumuku ingamubetsera kudini kana . . .
-
munhu wamunoda akafa?
-
upenyu wenyu uri pa ngozi?
Ridzai VHIDHIYO, pedzepo cedzai nge zve mubvunzo unoteera.
-
Kariro ye rumuko yakanyaradza nokubambisa kudini abereki a Phelicity?
ANHU AMWENI ANOTI: “Anditenderi kuti anhu akafa acamutswa.”
-
Munorangarirawo kudini?
-
I tsamba ipi yamaizoseenzesa kuti mupangidze kuti rumuko ricaitikadi kamare?
MUCIGWAGWA
Bhaibheri rinogondesa kuti mamirionji e anhu akafa acamutswa. Djehovha anoda kuti awona araramezve uye ayena akapasa Djesu simba rekuita kuti izvi zviitike.
Mibvunzo yekuhwirinzira
-
Cinyi cicaizwa na Djehovha uye na Djesu ku aya akafa?
-
Mamirionji e anhu acamutswa acararama kupi—kudenga here kana kuti pa nyika pano? Ngei mecibhuya kudaro?
-
Cinyi cinoita kuti mugare no rugondo rekuti adiwa enyu akafa acararamazve?
ZIYAI ZVAKAWANDA
Onai zvamungaita kuti mukwanise kushingirira marhwadzo e kufirhwa.
“Mazano Ekubatsira Vakafirwa” (Mukai! N.° 3 2018, mu ciShona)
Mazano e Bhaibheri angakwanisadi kamare kubetsera munhu urikurhwadziwa nge kufirhwa here?
Tingabetsera kudini mwana mudoko kuti ashingirire marhwadzo e kufirhwa?
Munhu ucamutswa kuti araramire kudenga here? Ndiyani usikazomutswi?
“Zvinorevei Kuti Vakafa Vachamutswa?” (Fundo ye mu saite, mu ciShona)
