FUNDO 35

Tingaita Kudini Zvisananguro Zvakanaka?

PLAY

Isusu tese tinodikana kuita zvisananguro. Zvimweni zvakhona zvingaita musiyano wakakura mu upenyu wedu uye zvingabata-bata ushamwari wedu na Djehovha. Ngo muezaniso, isusu pamweni tinodikana kusanangura katicararamira, zvaticaita kuti tidziriritire, uye kusanangura kuti tocata here kana kuti haiwa. Kana tikaita zvisananguro zvakanaka, upenyu wedu ucagara nomupfaro uye ticapfadza Djehovha.

1. Mungaseenzesa kudini Bhaibheri kuti muite zvisananguro zvakanaka?

Musati maita cisananguro, itai munamato mecikumbira rubetso ra Djehovha uye onaiwo kuti Bhaibheri rinobhuyei nge zve nyaya iyona. (Erengai Zvierengo 2:3-6.) Panguwa dzimweni Djehovha anopasa mitemo yakadjeka. Kana zvakadaro, cisananguro cakanaka camungaita nge ce kuzwira mitemo iyona.

Asi kana mu Bhaibheri musina mitemo yakadjeka inobhuya zvamunodikana kuita? Kunyazi zvakadaro, Djehovha acamutungamirira ‘mugwanza ramunodikana kuhamba naro.’ (Isaya 48:17) Anozviita kudini? Bhaibheri rino cokwadi cisikacinji cicamubetsera. Cokwadi cisikacinji ce mu Bhaibheri izvokwadi zve Bhaibheri zvinotifundisa zvinorangarirhwa na Djehovha nge zve nyaya dzimweni. Kajinji kakhona isusu tinoona zvinorangarirhwa na Djehovha patinoerenga nyaya dze mu Bhaibheri. Tinokwanisa kuita zvisananguro zvinopfadza Djehovha patinozwisisa kuti iyena anozwa kudini.

2. Ngazvipi zvamunodikana kurangarira musati maita cisananguro?

Bhaibheri rinoti: “Munhu akangwara anonyasa kurangarira asati aita danho rimwe na rimwe.” (Zvierengo 14:15) Izvi zvinoreya kuti tisati taita cisananguro tinodikana kutanga tarangarira zvese zvinobatanidzwepo. Dzibvunzisei kuti: ‘I cokwadi cipi cisikacinji co mu Bhaibheri cingaseenza panyaya iyi? Cisananguro ici cicaita kuti ndigare murunyararo here? Cisananguro cangu cingabata-bata kudini amweni?’ Uye cinonyanya kukosha nge ce kuti: ‘Cisananguro ici cicapfadza Djehovha here?’—Dheuteronomiyo 32:29.

Djehovha ndiyena akasisira kumubvunza kuti ngazvipi zvakanaka uye zvakashata. Kana tikanyasa kuziya mitemo nezvokwadi zvisikacinji zva Djehovha uye tosanangura kuizwira, hana yedu inogara yakanyasa kufundiswa. Hana icipo catinaco cokukwanisa kusiyanisa ciro cakanaka no cakashata. (Aroma 2:14, 15) Hana yakanyasa kufundiswa icatibetsera kuita zvisananguro zvakanaka.

FUNDAI ZVAKAWANDA

Ongororai kukosha kazvinoita kuziya marangariro a Djehovha teciseenzesa Bhaibheri kuti tigare no hana yakafundiswa patinonga tecida kuona kuti tosanangura zvipi.

3. Siyai Bhaibheri rimutungamirire

Zvokwadi zve Bhaibheri zvingatitungamirira kudini patinoita zvisananguro? Ridzai VHIDHIYO, pedzepo cedzai nge zve mibvunzo dzinoteera.

VHIDHIYO: Itai Kuti Mitemo Iri mu Bhaibheri Imutungamirire (5:54)

Cinyi cinozwi rusudzunuko rekusanangura?
Ngei Djehovha akatipasa rusudzunuko rekusanangura?
Djehovha akatipasei kuti tiite zvisananguro zvakanaka?

Kuti muone muezaniso we Bhaibheri, erengai Aefeso 5:15, 16. Pedzepo cedzai nge zve kuti mungaseenzesa kudini “nguwa yenyu zvakanaka” kuti . . .

muerenge Bhaibheri nguwa dzese.
mugare mwamuna kana mukadzi akanaka, abereki akanaka, uye mwana wakanaka.
mupinde misangano no ungano.

4. Fundisai hana yenyu kuita zvisananguro zvakanaka

Bhaibheri parinopasa mitemo yakadjeka nge zve nyaya yakhona, azvizotishuphiri kuziya zvekuita. Asi zvakadini kana Bhaibheri risikadjekesi nge zve nyaya yakhona? Ridzai VHIDHIYO, pedzepo cedzai nge zve mubvunzo unoteera.

VHIDHIYO: “Garai no Hana Yakanaka” (5:13)

Mu vhidhiyo ii, hanzvadzi yaitei kuti ifundise hana yayo uye kuti iite cisananguro cinopfadza Djehovha?

Ngei tisikadikani kukumbira amweni kuti atiitire cisananguro? Erengai Ahebheru 5:14, pedzepo cedzai nge zve mibvunzo dzinoteera:

Kukumbira amweni kuti atiitire cisananguro zvinoita hingana zvirinyore, asi cinyi cinodikana kuizwa ndi umwe na umwe wedu kuti akwanise kudzionera ega?
Hingana zvataona mu vhidhiyo, cinyi cingamubetsera kuti mufundise hana yenyu kuita cisananguro cakanaka?

Kuezana no mapa, hana yedu inotibetsera kusanangura ngwanza rokuhamba naro mu upenyu

5. Reremedzai hana dze amweni

Anhu akasiyana, ndiyo ndaa, anoita zvisananguro zvakasiyana. Hino tingapangidza kudini kuti tinoreremedza hana dze amweni? Onai miezaniso miiri:

Muezaniso 1: Hanzvadzi imweni inopfarira zvemakiyaje inocinja yoenda ku ungano imweni kune hanzvadzi dzakawanda dzisikapfariri kuona munhu ano makiyaje.

Erengai Aroma 15:1 uye 1 Akorinti 10:23, 24, pedzepo cedzai nge zve mibvunzo dzinoteera:

Maererano no mavhersikuro aya, hanzvadzi ii ingaita cisananguro cipi? Zvinyi zvamaizosanangura kuita mukagara no munhu unoona kuti zvakashata kuita zviro zvinoenderana no hana yenyu?

Muezaniso 2: Hama imweni inoziya kuti Bhaibheri arirambidzi kumwa no mudida, asi iyona inosanangura kurekera kumwa doro. Iyona inopikwa kuenda koorarira kumba ke hama imweni, asi iri ikona inoona hama yecimwa doro.

Erengai Muparidzi 7:16 uye Aroma 14:1, 10, pedzepo cedzai nge zve mibvunzo dzinoteera:

Maererano no mavhersikuro aya, hama ii pamweni ingasanangura kuitei? Imwimwi maizoitei kana mukaona munhu eciita zviro zvinokangaidza hana yenyu?

Munodikana kuitei kuti muite zvisananguro zvakanaka?

1. Namatai kuna Djehovha mecikumbira rubetso rake pamunosanangura zvekuita.—Tiyago 1:5.

2. Psvakisisai mu Bhaibheri no mabhuku anopanganidza nge zve Bhaibheri muziye kuti Mwari anorangarirei nge zvazvo. Bhuyaiwo no mukristu akakura pane zvekunamata kuti amubetsere pa kuita zvisananguro.

3. Rangaridzai kuti cisananguro cenyu cicabata-bata kudini hana yenyu no hana dze amweni.

ANHU AMWENI ANOTI: “Upenyu ngewangu, ndinoita zvandinoda. Andina basa no zvinorangarirhwa ne amweni.”

Ngei tecidikana kurangarira kuti Mwari uye amweni acazwa kudini no zvisananguro zvatinoita?

MUCIGWAGWA

Kuti tiite cisananguro cakanaka, tinodikana kuziya zvinorangarirhwa na Djehovha nge zvazvo, uye kuona kuti cisananguro cedu cicabata-bata kudini amweni.