FUNDO 55
Tsigirai Ungano Yamunopinda
Mamirionji e anhu anopfarira kunamata Djehovha mu zviuru zve ungano mu nyika yese. Awona anotenda kufundiswa no kutungamirirhwa kaanoizwa, uye anotsigira ungano yawo nge mishobo yakawanda. Kodi imwimwi munotendawo zvamunoizirhwa no ungano yenyu here?
1. Ngaipi mishobo imweni yamungatsigira nayo ungano meciseenzesa nguwa yenyu ne simba renyu?
Tese tinokwanisa kubetsera ungano. Ngo muezaniso, mu ugano menyu mune hama dzacembera kana kuti anorhwara here? Mungaabetsera kuenda nawo ku misangano here? Kana kuti mungaabetserawo pa kuita zviro zvimweni, zvakaita hingana basa re pa nyumba kana kuabetsera kuenda kootenga zviro zvaanoda? (Erengai Tiyago 1:27.) Tingakwanisawo kudzipira pakupsvaira no kucenesa Nyumba ye Umambo yatinopindira kana kugadzirisa zviro zvimweni. Apana unotibambidzira kuita mabasa aya. Kuda katinoita Djehovha no hama dzedu ndiko kunoita kuti tidzipire “no mwoyo wese.”—Pisarema 110:3.
Apupuri akabhabhatidzwa anokwanisa kubetsera ungano nge mishobo imweni. Hama dzinosisira dzinokwanisa kuseenza hinga abati anoseenzera e ungano, uye no kuhamba ke nguwa, angakwanisa kuzogara akuru. Hama no hanzvadzi dzinoseenza no simba mu basa rekuparidzira dzingaseenza hinga mapionero. Apupuri amweni anokwanisa kubetsera pa kuwaka zviwako zve kunamatira kana kuti kuenda kune ungano dzimweni dzinonga dzecida rubetso.
2. Tingaseenzesa kudini zviro zvatinazvo kuti tisigire ungano?
Tingakwanisa “kukudza Djehovha no zviro zvedu zvinokosha.” (Zvierengo 3:9) Tinopfara ngekuti tinokwanisawo kupasa mare no zviro [zvedu] kuti titsigire ungano yatinopinda no basa rekuparidzira ririkuizwa mu nyika yese. (Erengai 2 Akorinti 9:7.) Zvipo zvedu zvatinobvisa zvinobetserawo kana pakaitika njodzi dzinoitika dzega. Akawanda anogara akatoronga “kucengeta ciro” kuti aite mupiro. (Erengai 1 Akorinti 16:2.) Tingakwanisa kupasa mare teciseenzesa mabhokisi e mupiro anooneka matinonamatira kana kuti tingaseenzesa donate.pr418.com pa Interneti. Djehovha anotipasa mukana we kupangidza kuti tinomuda nge maseenzesere atinosanangura kuita zviro zvatinazvo.
FUNDAI ZVAKAWANDA
Fundai mishobo dzimweni dzamungabetsera nadzo ungano.
3. Tingakwanisa kuseenzesa zviro zvatinazvo
Djehovha na Djesu anoda anhu anopa ne mwoyo wese. Ngo muezaniso, Djesu akaona mufirhwakadzi umweni murombo ecipasa mupiro. Erengai Ruka 21:1-4, pedzepo cedzai nge zve mibvunzo dzinoteera:
-
Kuti tipfadze Djehovha tinodikana kupasa mipiro yakawanda basi here?
-
Djehovha na Djesu anozwa kudini patinopasa no mwoyo wese?
Kuti muziye kuti mipiro yedu inoseenzeswa kudini, ridzai VHIDHIYO. Pedzepo cedzai nge zve mubvunzo unoteera.
-
Mipiro inobviswa inoseenzeswa kudini pakubetsera ungano dziri mu nyika yese?
4. Tingakwanisa kudzipira kuti tibetsere
Mu nguwa ye Aisraeri, anamati a Djehovha aiita zvese zvaaikwanisa kuti acengetedze mbuto dze kunamatira. Asi kuita izvi kaibatanidza zviro zvakawanda kupinda kubvisa mare basi. Erengai 2 Makoronika 34:9-11, pedzepo cedzai nge zve mubvunzo unoteera:
-
Aisraeri akaitei kuti acengetedze tempro?
Kuti muone kuti Apupuri a Djehovha ari kuteedzera kudini muezaniso uu we Bhaibheri, ridzai VHIDHIYO. Pedzepo cedzai nge zve mibvunzo dzinoteera.
-
Ngei zvecikosha kuti ticengetedze Nyumba ye Umambo yatinoseenzesa?
-
Mungabetserawo nge mushobo upi?
5. Hama dzingakwanisa kuitira ungano zvakawanda
Bhaibheri rinokohomedzesa anarume e cikristu kuti apete masimba ari ese kuti atsigire ungano. Kuti muone muezaniso umweni, ridzai VHIDHIYO. Pedzepo dairai mubvunzo unoteera.
-
Mu vhidhiyo yataona, Ryan wakaitei kuti atunhudzire pa zviro zvaiita pa kutsigira ungano?
Bhaibheri rinopanganidza mararamiro anodikana kuizwa nge hama kuti dzikwaniriswe kuzoseenza hinga abati anoseenzera e ungano kana kuti akuru. Erengai 1 Timoti 3:1-13, pedzepo cedzai nge zve mibvunzo dzinoteera:
-
Ngazvipi zvinoimirhwa ku hama dzinoda kugara abati anoseenzera uye akuru?
-
Mhuri dzawo dzinodikana kugara dzakadini?—Onai mavhersikuro 4 na 11.
-
Kana hama dzecipeta masimba kuti dzirarame maererano no zviri kurekethwa no mavhersikuro aya, anhu ese ari mu ungano anobetsereka kudini?
KANA MUNHU AKAMUBVUNZISA KUTI: “Apupuri a Djehovha anoonepi mare ye kuseenzesa pa basa rawo?”
-
Mungamudaira kudini?
MUCIGWAGWA
Djehovha anopfara maningi patinoseenzesa nguwa yedu, simba redu uye zviro zvedu pa kutsigira ungano.
Mibvunzo yekuhwirinzira
-
Tingaseenzesa kudini nguwa yedu ne simba redu pa kutsigira ungano?
-
Tingaseenzesa kudini zviro zvatinazvo kuti titsigire ungano?
-
Mishobo ipi imweni yamungadawo kubetsera nayo ungano?
ZIYAI ZVAKAWANDA
Onai kuti ngei Mwari asikacaiti kuti anhu anomunamata abvise zvegumi.
“Bhaibheri Rinobhuyei nge zve Kubvisa Cegumi?” (Fundo ye mu saite)
Onai kuti cinyi cinozwi “kupeta masimba” mu ungano.
“Muri Kupsvaka Kugara Muonereri Here?” (Murindiri wa 15 ya Setembro wa 2014)
Onai Apupuri amweni akashinga akaita rhwendo rinoshupha kuti aendesere anhu amweni mabhuku.
Fundai musiyano uripo pakati pedu no magereja amweni pamaonero atinoita mare ye kutsigira basa redu.
“Apupuri a Djehovha Anoona Kupi Mare Yekutsigira Basa Rawo?” (Fundo ye mu saite)
